السلام عليكم
حياكم على أكشن ولادتي ^_^
يوم السبت 9-7 حسيت من بعد المغرب بطلوق خفيفه تروح وتجي شد اخر البطن واحس البيبي ينزززل تحت لدرجه اتضايق من الجلوس
رحت لاهلي بعد ماصليت المغرب وتقهويت وسولفت ويجيني الطلق ويروح وانا مستبعده مرررره انها طلوق ولاده من كثر ماقريت بالتجمع اللي تقول جاني طلوق وعلى باللي ولاده ثم نمت وقمت والطلوق كلها رايحه
طوول معي لما تعشيت وخلصت وكان جاي لاهلي اخوي وزوجته وامي تشوفني تقول احس انك مطوله ماراح تولدين الحين قلت الدكتوره عطتني موعد الجمعه 15-7 واحس اني بجلس بعدها اسبوع ماولدت قالت امي ايه احس نفس الشي بتاخذين من العاشر اسبوع
المهم خلصنا متعشين وصارت 11راح اخوي وزوجته وكلمت على زوجي وجاء واخذي
من رحت وانا منسدحه عالسرير مغص كنه مغص الدوره لمابتجي بالضبط يعني محتمل وكنت اطقطق بالببي وارسل واسولف مع خواتي وبنتي شغلت لها اللاب توب وحطيت لها توم وجيري ابيها لما يجيها النوم وتنام
لما صارت 1ونص نومتها وشغلت اللاب اقرا في التجمع واشوف اخبار حفلتكم ههههههههههههه
بعدها بنص ساعه زاد الطلق واانا عالنت
اتصلت على زوجي كان سهران برا مع اخوانه قلت تعال احس اني تعبانه شوي قال اوك شوي وجاي بعدها بربع ساعه زااد الطلق مرره الم قوي ومغص
وصرت امشي بالغرفه ومعي تلفوني واقرا من الادعيه وايات تسهيل الولاده كتبتهم فيه قلت على اساس اذا كنت بالمستشفى اقرا
وامشي بالغرفه رايحه جايه ويد على بطني ويد ماسكه التلفون اقرا وكل شوي يزود اكثر واكثر واذا خف جلست عالسرير وكملت قراءه بالتجمع ههههههه
قلت بقوم اسويلي كاس حليب مع ملعقه عسل يمكن ماتكون طلوق ويخفف علي مستبعده الولاده مررررره مدري ليش يمكن لان اختي بولدها الاخير جاها طلوق قويه تقول قلت بس ولاده لما راحت المستشفى قالو مافي ولاده تقول ماولدت الا بعدها باسبوعين
نزلت وولعت عالغلايه وطلعت كوبي وحطيت الحليب والمويه رحت بطلع العسل جتني الطلقه ماقدرت اتحرك تمسكت بالكاونتر واتعصر من الالم سحبت الكرسي وجلست لما خفت الطلقه اتصلت على زوجي ويييييييينك تعال تعبانه مرررره انهبل قال وش فيك ولاده قلت لا بس تعبانه مرره وانا ابكي كل هالطلوق ومستبعده الولاده هههههههههه وكنت حاسبه بين كل طلقه والثانيه صار 5 دقايق
خف الطلق وقمت بسرعه وحطيت عسل ورقيت لغرفتي واكمل قراءه واشرب ودخل زوجي مافيني الا العافيه واقرا واشرب قال تكذبين علي هههههه تبغيني اجي وبس قلت حرام عليك والله الالم يجي ويروح
ماكملت كلمتي الا والطلقه جايه واتعصر عالسرير ودموعي تصب بدون صوت قال اوديك المستشفى قلت لامابي اروح ويلعبون فيني طلق وكشف من تحت ابصبر واقعد ادور وكل شوي رايحه للحمام تكرمون وماينزل شي بس نقط بس من قو الضغط ونزول البيبي
قلت له طلع مويتي من الثلاجه اللي قريت فيها واشرب واصب على بطني وامسح وامشي وانا ابكي واتعصر الله يعظم الاجر يااارب
قال طيب اوديك قلت لا قال تعالي عند التلفزيون قلت مااقدر اجلس عالارض ويحط لي مخده واجلس عليهاا ونتفر ج عالتلفزيون برنامج رياضي كالعاده ههههههههههه واسولف اذا خفت الطلقه واطالع المذيع اقول ياحظه ليتني رجال ويضحك على كلامي
وتجي طلقه قوووووويه طيرت عقلي وادنق بقوه على مخدت زوجي واعض على اصابعي واصيح وينهبل يابنت الحلال قومي لاتعذبين نفسك اكثر قلت لاتوني واقوم اجهز اوراق مراجعتي واحطهم بشنطه المستشفى عشان يشوفونها لاني اراجع بمركز خاص مونفس اللي ولدت فيه حكومي واحط شاحن التلفون واقعد عالسرير اقرا رغم الالم ههههه
وجاني وانا اتفرك عالسرير من الطلوق قال قومي بنزل البنت عند الخدامه والبسي عبايتك نروح قلت اصبر باقي ربع ساعه عالاذان بصلي واروح وقاعدين قدام اللاب توب انتظر برنامج الصلاه يأذن عشان اتوضى واصلي
ومن قال الله اكبر رحت اتوضى وقلتله جب الكرسي وافرش السجاده ماقدر اصلي وانا واقفه
ويجهز لي والبس الجلال واصلي الفريضه وانا واقفه عادي وجتني الطلوق وانا ساجده ماصدقت خلصت وسلمت وصليت السنه عالكرسي وانا ابكي
خلصت بدلت ولبست وقلتله ينزل بنتي عند الخدامه
ونزلت لها قلت افرشي فراشها عندك وشالها ابوها وحطها وعطيتها اغراضها من رضاعه وغيره بنتي كبيره بس ترضع بالليل ههههههه
وراح وجاب شنطتي ونزل وليست عبايتي وتوكلت على الله وانا احس بيقولون لامافي ولاده والا بيقولون 1سانتي واتحطم بعد الالم هذا كله
وبالطريق اسولف معه عادي واذا زادت الطلوق اجلس اهاوشه مابيه يتكلم واقول انكتمت افتح الشباك ههههههههه وطول الطريق نفتح الشبك ونسكر واقوله ياحظك ليتني رجال ):
يقول احمدي ربك كلها ساعه وتخلصين قلت ليتك تحس بالالم هالساعه قال حرام عليك خاااف ههههههههه
يوم قربنا من المستشفى جاني طلق قطع قلبي وامسك يده بقووووووووووووووووه انهبل فكي يدي خليني اعرف اسووووق وانا اضغط واتعصرررروصلنا قسم الطوارئ وقف وقال تقدرين تمشين والا اجيب لك عربيه قلت لامقدر جب لي ويروح يجيب لي بسررعه ويركبني ويدخلني وتحطني الممرضه بغرفه الكشف وتقيس الضغط وخذت تحليل دم وقاست حرارتي وركبت لي مغذي وانا اتعصررر من الطلوق وبعدهاا دفوني بالسرير لغرفة الولاده ):
لما دخلت استقبلوني ممرضات والدكتور حق الولاده قال كشف من تحت
بغيت انهبل ماكنت اتمنى يولدني رجال بس الشكوى لله كان هو الموجود بس
بس كان محترم واخلاق كشف علي من تحت وقال 6ونص 7سانتي ولاده
وتقومني الممرضه وتاخذ وزني وتدخلني وتعطيني لبس الولاده والبس وتوديني لسرير الولاده وانام عليه وتركب محلوم بدال اللي خلص قلت وشو طلق قال لاااا محلول وتحركه يمين ويسارر وكانت الساعه يوم ادخل المستشفى 4وربع الفجر يمكن
وخلوني بالغرفه وجاء الدكتور ويسالني اسئله عن اخر دوره وهل فيك امراض سكر ضغط الى اخرره وانا اجاوب وانا تعبااانه
ثم راح وخلاني ينتظر يفتح الرحم اكثر
وكل ماجت الممرضه تقول لسى وطبعا حطو على بطني من دخلت جهاز نبض الجنين ونايمه على ظهري تعبت وعورني ظهري اغير وانام على جنب واذا جت وشافتني قال لا نوم على ظهر
قال مفتوح 8ونص
وجاني الدكتور وانا اتالم اقول خلاص تعبت ويسوي لي تحريض اه بس ويفك مويه الراس عوررررني شكبر يده ههههههههههه
وابكي واتالم يقول حنا نحاول نساعدك واساله كم الساعه قال 6ونص انهرررت كنت اواسي نفسي اول ماجيت اقول على 6 ان شاء الله بكون خلصت وولدت وارتاح
خمس جت الممرضه قالت ولاده
وحطت رجولي على الي ترفع الرجول مدري شسمها ورفعت لي حديدتين امسكهم واشدهم وقت الطلقه تساعدني عالدفع
وجاء الدكتور وقال كل ماجتك الطلوق ادفعي وادفع وانا خلاص تعبانه ماعاد فيني حيل وهو يوسع من تحت ذبحني لما ولدت بالسلامه واقعد اردد الحمدلله واكررها واقول شكرا يادكتوررر وهو يقولي مبروك مبروك واقول بنت والا ولد قال بنت ويحطها على بطني ويشيلها على طول ويبدا يحاول يطلع المشيمه انجنيت منهاا ماصدقت اخلص والده
ويحط اصبعه على سري ويضغط بقوووووووووووووووووووووه وانا اصرخ اه عورتني لما طلعت المشيمه ياربيه ذبحني حسيت سري بينفتح من قو ضغطه ثم جلس وعقموني من تحت وخيطوني وخلوني ساعتين بغرفة الولاده خوف من النزيف من خلص مخيطني قلت للمرضه عطيني تلفوني من شنطتي وكلمت زوجي وبشرته وكلمت اختي ياحليلها كانت على الساعه 3 تراسلني بالببي تقول فيه فلم خطير لايفوتك تابعيه بالموقع الفلاني وصورته كذا وكذا ثم قالت ليش مالك حس اليوم قلبي ناغزني شكلك تولدين واحط لها ضحكه اقول لابس زوجي عندي ومخليه التلفون قالت اها بناتك مالهم حل وحده جايه بدري ووحده بتخلصين التاسع ماجت عاد لما كلمتها ابشرها ماصدقت قالت لالا قلت والله قالت يوم اقولك وانتي فيك طلوق قلت ايه بس مارحت توني وتضحك تقول صدق كنت فاضيه وكلمت امي وكانت بالدوام انهبلت يوم شافت اسمي تقول على بالي بتقولين تعالي معي بمرك بروح اولد ماصدقت اني قلت لها ولدت وخلصت مسكينه تقول امس انا وابوك حاطين تلفوناتنا عند راسنا خايفين تتصلين علينا مدري ليش حسينا انك بتولدين وكلمت ابوي وبشرته وارسلت للستتي وبشرتهم
وبعد ساعتين جتني الممرضه وكشفت علي من تحت نفس كشف الدكتور
حطت اصبعها بقووووه على سررري وكشفت من تحت وانا اصرخ تقول مقدر اوديك للغرفه الا بعد الكشف والحمدلله طلعت وودنوني لغرفتي وامي كانت براتنتظرني وابوي رجعوه قالو مافي زياره ,,
والحمدلله انتهى اكشن ولادتي بالتفصيل الممل..
وجبت بنوته وسميتها تالين الله يرزقني برها هي واختها يااارب...
06-18-2011, 01:54 AM
رد: تجمع الحوامل اللاتي سيلدن بشهر رجب 1432
سلسال بنتي 
جديد منتدى إستفسارات مرحلة الولادة
العرض العادي
