تجمع حوامل ليبيا

[ميراس]

اسمعوا حتى انا من راى اعتدال انخش سلام فى حد مافي حد باهى السلام المفروض انديروا ساعة معينة اخشوا فيها اكبر مجموعة منا

[ريم البراري]

مرحبتين والف مراحب ميراس تفضلي اي استفسار انا كنت في السعودية يارب كلكم تزوراها تهبل انا مشغولة شوية لاني بنمشي لليبيا المدة الجاية زيارة ونرجع بعد العيد ان شاء الله توا نشري في هدايا لاهلي ماعرفتش شنو نشريلهم نحوس نحوس في السوق ونقعد حايرة وفي النهاية نرجع فاضية اقترحوا عليا

[ريم البراري]

ام قصي تعرفي تعبت نفسيتي مش مصدقة بعد ماقلتلكم خذيت الحبوب تاخرت الدورة عليا اسبوع درت تحليل دم وطلعت حامل وكان موعد مناقشتي بعدها بأيام مانحكيلكش عالفرحة طبعا حسيت روحي في حلم وثاني يوم بعد المناقشة ماشية للجامعة للدكتور بخصوص التعديلات في البحث كيف بننزل من السيارة حسيت بألم رهيب ونزل مني دم طار بيا راجلي للمستشفى قالتلي الدكتورة اجهاض قلت ياسيدي الله اعطى والله اخذ الحمد لله على كل حال ان شاء الله ربي يكتبلي الحمل الثابت السليم عاجلا غير آجل وكل من يتمنى لهذا راجلي رفعني للسعودية هدية التخرج وتغييرت جو لان نفسيتي تعبت شوي وانا ماشية لليبيا زيارة الاسبوع الجاي وبنرجع ماليزيا بعد العيد ان شاء الله

[ام قصى محمد]

السلام عليكم
ريم ربى يعوضك بخير منه انا مجربه الاجهاض صعب
الحمدلله الله يعوضنى ويعوضك

[ام قصى محمد]

مشكورات وبارك الله فيكم والله فرحتونى باجماعكم عليا
بس عندى تعليق واحد بانسبه لمشاركتنا انا ما نحسش اننا نهملو فى مشاكل بعضنا بس نحن هنا نستفيدو من بعض فى التجارب الى عشناهم ولما وحده تطرح موضوع كلنا او اغلبنا انردو عليها ومرات تقرى المشاركات مش متناسقات فى الردود لانه انا عن نفسى عشان تقرا مشاركتكم لازم نكتب رد فمانعرفش شن كتبتوا نين يطلع ردى
اعتدال مشكوره على الفكره وانا معاكم بالنسبه لطنجره
انا عن نفسى تنقذ فيا يعنى مستعجله بس نتبل اللحم اى لحم كانى نبى نشويه ونحطه فيها وتعرفو عشان بدل البطاطا المقليه بس قطعى البطاطا زى المقليه بس اعرض شوى واسلقيهم نص طياب بعدها اذا حاطه لحم على الشبك حطى البطاطا تحتها فى الطنجره من لوطا وتقعد المرقه تنزل عليها فيها طعمه مانحكيلكم عليها
واذا مش دايره لحم حطيها على الشبك وطبعا ادهنيها قبل بزيت زيتون ورشى عليها كمون وخليها نين تنحمر
وكولى وادعيلى احسن من المقليه وافيد وافر فى الزيت

[ام قصى محمد]

ميراس ريم وينكم طلعتوا
مشكوره ميراس والله اخواتى وابى مسمعنا منهم شى لنا مده
ادعوا ان تتحرر سرت عن قريب على فكره انا منشوفش فى الاخبار من مده لانى خايفه نشوف شى خبر يرعشنى

[ام قصى محمد]

اعتدال بالنسبه لوليدك وين مشكلتك كيف متقدريش ترضعيه وهو محبش الصناعى كيف دايره توا

[ام قصى محمد]

ام اجنادين شوفى موضوع الحزن وانك ماتخشى فرح نين وين هذا والله فيه جهل يعنى ليش هكى انا امى ثالث يوم وفاه جدى ابوها قالت روحن وكحلن عيونكن انا واختى وماتحزننش صح لما نجى للعزا منكحلش لكن فى حوشى والحياه لا عادى
حبيبتى هذى الموضيع خلاص بس الحنه مش عارفه اذا راح تمشى لاهل الميت ماننصحك بيها عشان شوى مش حلوه
بس انا لما توفى ولد خالى شاب 22 سنه وجعنى والله ماقدرت نخش فرح نين وين مش حزن بس مش قادره نفرح الله يرحمه
الخلاصه ام رويفده غطت الجانب الدينى وانا انقولك جانب العادات خلاص عادى تخشى الفرح ليش تحرمى فى نفسك

[ام قصى محمد]

توا نستاذنكم
تمشى نغدى البنات
سلام

[ريم البراري]

لا لا قعدة لكن نقرا في الصفحات القديمة بنشوف اخباركم
ام قصي بوك رجع للجبهة ويده مجروحة كيف خليتوه يمشي كان صبر حتى الجرح يبرأ افضل ربي يحفظه
قولولي اقتراحاتكم ماعرفتش شن نشري لاهلي ليا 3 سنين ماشفتهمش امي بنشريلها سوار ذهب هندي عجبني هلبة ورايحة وشبشب وبوي ماعرفتش هو راجل متعلم ومدير مصلحة قصدي مش شيباني كبير قولولي هدية تليق بيه