تجمع حوامل ليبيا

[يقين]

يا ام وسونه في دكتوره كويسه واسلوبها حلو وتاخد وتعطي معاك في عياده الفتح طريق الشط اسمها
لطفيه والله نسيت اسم بوها سامحيني لاني نمشيلها من السنه اللي فاتت ونسيتها
وعلي كل يا ام وسونه اي كتوره نساء عندها التراساوند حتلاقي عنده سونار مهبلي

[زهرة2000]

ياقين انت ولدت فى مصر صاح
قوليلى اسم الدكتورة وهل هى شاطر ووين ولدتى وشن جو المستشفى والعنايه بيك

[hatoo]

اهلين بنات كيف حالكم,وكيف حالك يا ريم البراري وشنو اخبارك وانا الحمدلله تمام والحمل الحمدلله بخير, واهلين زهره كيف حالك انا ورتولي الحمدلله بخير وانا كنت في مصر في شهر 3 الي فات قبل مايخش الرتل لبنغازي وبعدها روحت في شهر 4

[ام قصى محمد]

المشاركة الأصلية كتبت بواسطة زهرة2000

ام قصي ربي يجبر بخاطرك ويجيك قصي ويكون مجاهد زى خوتك وبوك ربي ينصرهم ويطول فى عمرهم كيف حل فايزة وجنجون ههههههههههه احينا ع الطنجر الشاطر عجبتنى يومها وكيف الطبخ فيها بالك نشريها نبو وصفات الشيف او قصى ربي يخليك

اهلا بيك واى شى على حسابك ههههههههههههه
بس مش نصدقى رانى حتى انا شوى شوى ههههههههه شر من يقين
لا نمزح بس نابش فى يقين
ومشكوره وانشاء الله ربى يرزقنى بقصى يارب
والطنجره كويسه خاصه فى التحمير واللحوم تقول دايرتهم على الفحم تهبل الطعمه تجنن وسريعه فى التسخين تغنى عن الميكرويف
يلا يابنات هذا اول درس هههههههه

[ام قصى محمد]

ام عويضه كان مانودك من نود غيرك انشاء الله تبشرينا بالحمل انتى وميمونه وام وسونه وريم
وكل محروم يارب

[ام قصى محمد]

انا توا مع السلامه لانى بكرا اول يوم دوام فى المدرسه
ونبى انوض من ال7 وتوا الساعه 3 ههههههههههه
مش عارفه كيف راح يصير
اتمسوا

[اعتدال]

السلام عليكم

ام قصي مشكورة على الدعاء راجلي يقرا يحضر في الدكتوراء ربي ينجحه وهذا آخر فصل بالنسبة له ان شاء الله لذلك هو تقريبا فاضي لذلك هو يشد في الوليد لما انا عندي محاضرة وانا الفصل هذا عندي ثلاث ايام فقط في الاسبوع يعني محلولة الحمد لله

يومها سألت على حل لان الحليب عندي شوية وكنت نتمنى نرضع ولدي طبيعي لكن انتم تسألوا وماتجاوبوش والمشكلة الاخرى اني ماطهرتاش قريب انموت المفروض في الاسبوع لكن انا خايفة مش متخيلة ولدي مجروح وفيه دم خايفة قعد صغير عارفة كل مايكبر اصعب لكن خايفة

ام قصي كويس انك عارفة قصة الهكر لكن نبي انقولك لازم تتأكدى من خلو الجهاز من ملفات المراقبة لان تغطية الكاميرا ماتكفيش

ام عويضة عندي سؤال لك لانك من بنغازي بالله نبي نسألك على الشهيد الصادق الشويهدي قصة اعدامه المتداولة في مواقع النت صحيحة؟؟ قصدي صح انعدم على مرحلتين!! هي قصة قديمة هلبة لكن تأثرت منها

[أم عويضة]

المشاركة الأصلية كتبت بواسطة اعتدال

السلام عليكم

ام قصي مشكورة على الدعاء راجلي يقرا يحضر في الدكتوراء ربي ينجحه وهذا آخر فصل بالنسبة له ان شاء الله لذلك هو تقريبا فاضي لذلك هو يشد في الوليد لما انا عندي محاضرة وانا الفصل هذا عندي ثلاث ايام فقط في الاسبوع يعني محلولة الحمد لله
يومها سألت على حل لان الحليب عندي شوية وكنت نتمنى نرضع ولدي طبيعي لكن انتم تسألوا وماتجاوبوش والمشكلة الاخرى اني ماطهرتاش قريب انموت المفروض في الاسبوع لكن انا خايفة مش متخيلة ولدي مجروح وفيه دم خايفة قعد صغير عارفة كل مايكبر اصعب لكن خايفة
ام قصي كويس انك عارفة قصة الهكر لكن نبي انقولك لازم تتأكدى من خلو الجهاز من ملفات المراقبة لان تغطية الكاميرا ماتكفيش
ام عويضة عندي سؤال لك لانك من بنغازي بالله نبي نسألك على الشهيد الصادق الشويهدي قصة اعدامه المتداولة في مواقع النت صحيحة؟؟ قصدي صح انعدم على مرحلتين!! هي قصة قديمة هلبة لكن تأثرت منها

اعتدال كيف حالك وشنو حال وليدك توا ان شاء الله ايكون بخير
سألتيني عن الشهيد الصادق الشويهدي قصته توجع القلب وتزيد الغل على معمر
هي فعلا صحيحة لقد انزلوه من على المنصة طبعا بعد ان تمت مهزلتهم وقد ظنوا انه مات ووجدوا انه مازال حيا تم نقله الى مستشفى الهواري واحضروا طبيبا وقالوا له احقنه بمادة سامة لقتله رفض الطبيب ففعلوا هم فعلتهم (والطبيب مش عارفين شن صار فيه بعد الرفض )
الكارثة ان المجرمات هدى بن عامر وواختها سلوى وعليا يعقوب حضرن التشنيق وهن يهتفن زي المسعورات"ما نبوش كلام لسان..نبو شنقه في الميدان" صفيهم بالدم يا قايد... سير ولا تهتم " "الرصاص خساره فيهم...عود وقيد انولع فيهم"
لاحول ولا قوة إلا بالله
الله يرحمه كان يبكي وايقول(((( ياأمي)))) قطع قلوبنا .
ايييييييه ياأعتدال
والله ذكرتيني بأحداث مؤلمة ... كأني في يوم تشنيقته .
لا وفوق هذا كله بعد تنفيذ الحكم مروا من قدام حوش هله وهم ايبيبوا
وإمعان في القهر منعوا أهله من إقامة ليالي عزاء وسجلوا أسماء النساء والرجال اللي جوا للعزاء وممنوع حد ايرد على العزاء
وووووووووووواك عليك ظلم الله يهد معمر واللي معاه قهر الرجال والنساء
الله يأخذ الحق منهم وينتقم لجميع شهدائنا

[ام وسونة]

صباح الخير

[يقين]

زهره ايه اني ولدت في مصر ومن اول شهر فيحملي نراجع عند دكتور مجدي مسعد عارفه كويس وشاطر بكل وكبير في السن وهذا في مستشفي المقاولون العرب وولدتفي نفس المستشفي احلي اهتمام وراحه والغرفه اما بروحك الليله او معاك شخص واحد وهادا حسب فلوسك متاعك ونضافه بكل مستوى الخدمات ممتازواي خدمه او سؤال عن دكاتره في القاهره تضلي نخدمك بعيوني وعليحسب معرفتي