تجمع حوامل ليبيا

[hatoo]

اهلين اختي اعتدال كيف حالك, اختي حبيت بس نقولك ان الثورة هذي جت من القهر و من الظلم والقمع الي عايشينه طول 42 سنه وهو مسكر علينا النواحي وتدوي علي مدمر حي عليك وحي وتقولي الفرنسيس والامريكان يقتلوا فينا من قالها وبعدين تقولي احنا خششنا الكفار هو الي اجبرنا علي هكي يقتل فينا بالجراد والهاون والمدفعيه الثقيله والشعب معنده شيء يدافع بيه عن نفسه واغتصاب ومفيش حاجه اجراميه تخطر علي بالك مدارها وبعدين ان شاء الله شهداء الي ماتوا دفاع عن الوطن والعرض والجهاد هو الدفاع عن النفس والعرض والمال والوطن ,ومدمر هو اول كافر كان حاكم فينا ةاحنا ساكتين شفتي كلامه علي الرسول عليه الصلاة والسلام ويفتي في الدين خليه يستاهلها هو والي معاه وان شاء الله ربي ينصرنا وبعدين عبد الجليل راج محترم والكل يشهدله بذالك واسفه لو كترت من الكلام بس حبيت افسر

[hatoo]

حمدلله علي سلامه بوك وان شاء الله خوتك يردولكم منصورين

[عيون زوجي]

ام قصي الحمدلله عسلامة بوك ويارب يشفيه وطهور ان شاءالله
ويارب يرد كل الثوار سالمين ويرحم موتانا وموتى كل امة المسلمين
وجعني الحال لما قلتي اصحاب بوك معظمهم استشهدوا واصحاب ولد اخ ام وسونه استشهدوا حسبنا الله ونعم الوكيل
قالوا ان السبب مش نقص عدد ولا عتاد قالوا انه مافيش قاده ميدانيين ولا تنسيق بين الجبهات
يارب فرجها عالكل انصر المظلوم واهدي الظالم

[عيون زوجي]

أية....راجلي قالي من عطاك الطريقة قتله صاحبتي تاجوريه قالي البازين عندهم فالحين فيه الرجاله
تسلم ايدياتك يارب

[عيون زوجي]

لما مشيت المانيا مشت معاي وحدة تاجورية متزوجة ترهوني تسكن في قصر بن غشير الله يدكرها بالخير انا روحت من سنه وهي لتوا قاعده غادي المهم تخيلي انا قعدت طول الشهور معقدة ...بالكثير نمشي للحديقة بروحي او السوق والمحلات بالترام قريبين مني ومعاي بنتي بس
وهي ماشاءالله جت حامل وجابت غادي ودارت كل شي كانها في ليبيا وتمشي لكل المدن بالقطار وحتى العبارة في النهر ركبتها ومعاها 3صغار الكبير 3سنين ونص معظم الطلعات بروحها لان رجلها مش زي راجلي دورة تدريبيه راجلها طبيب مشغول بقرايته وهي الله واحد ماشاءالله ماتهاب شي مع ان لغتها اضعف مني لكن تقد روحها خير مني الف مرة
حتى البازين والعصبان ادير فيهم غادي
التاجوريات فالحات ماشاءالله

[عيون زوجي]

شكلي بروحي نستادنكم ولدي عاملها ريحته ادوخ وسارة جعانه

[أم أجنادين 80]

السلام عليكم

كيف حالكم

عيون وميمونةوهاتوا وام قصي وكل الموجودات والغايبات

بالله عليكم وين طرابلسية مش مبينة

[يقين]

اعتدال والله تصدقي اني حالتي اعظم منك ومن الهم والتفكير بنتي عمرها 5 شهور من ولادتي فيها واني انرضع فيها طبيعي وفي الفتره الاخيره مشغوله علي اهلي وبكي وهم ومانعرفش شن صاير فيهم طبعا لا ماكله ولا شي اليوم تجيني دوخه من الصبح مشيت للعياده ركبولي تغديه وحولتني علي دكتوره الاطغال وقالتي لازم تاخدي لبنتك حليب صناعي لانك عندك هبوط وما فيش حليب
قوليلي في اسوأ من هكي حال الحمدلله الذي لايحمد علي مكروه سواه
واخيرا انقولك الله غالب كثري من الاستغفار علشان ربي يهدي بالك وخلي بالك علي ولدك وما فيش حد يخفف الالم والهم كان ربي بس

[ميراس]

السلام عليكم ورحمة الله وبركاته

[ميراس]

يقين كيف حالك اليوم وشنى مافيش اخبار عن اهلك