تجمع حوامل ليبيا

[يقين]

هيا بالسلامه والله ماني في حاله كلام غير قلت خلي نفضفضلكم شوي لاني بننفجر

[عيون زوجي]

ماشاء الله اعليك يا ميراس صح اليوم فرحت وخاصة نهار جمعه محلاه البازين فيه اتحسيه انهير ليبي
يقين ربي يطمنك المشكله بني وليد هربولها كتايب القدافي من سرت وما بطلوش قصف بكل
وينكم يا بنات؟؟؟
انا طلعت لساحة الشهداء من طريق 11 يونيو للشط زحمة لين خلاص ما صارش مشيت لحماتي شربت فنجان قهوه وروحت

[توباز]

شكرا اختي هاتوو بالعكس بارك الله فيك فهمتيني كيف مانبي والله كنت مشغوله خففتي علي شويه والدكتوره حميده حكت معايا باسلوب جاف زاد خوفني بس الحمد لله شريت التحليل المنزلي بش المشكله ممكن تضحكي علي مانعرفش اي وقت الاحسن للتحليل

[توباز]

انا اسمي نورا مدرسه انجليزي مواليدي 87 اه تجوزت قبل الاحداث بشهر وقبل الاحداث باسبوع كنا في تركيا شهر عسل وماادرك..... روحنا لان خوت زوجي كلمونا وقالو الاوضاع مش تمام وبدن الاحداث ودخل زوجي لكتيبه وقعدو يحاربو في جبهه اجدابيا من الشهور الاولي وانا مابين اهلي واهل زوجي خاصا لما كان من الخطر الطلوع قعدت عند عمتي انا وسلفتي اصغر مني مسكينه هي وطفلها مرينا بايام يعلم بيهن ربي لعنه الله عليه ولا ماطلعنش بره ليبيا زوجي وسلفي في الجبهه وولد عمي مسجون في طرابلس الحمد لله الذي لا الله الا هو ربي نصرنا عليه
شكرا خياتي انتمن نعيش معاكن كل حلوه ومره

[عيون زوجي]

اختي توباز مرحبتين مرة تانيه والوقت الانسب الصبح اول ماتخشي الحمام تجمعي حاشاك البول في طاسة بلاستيك وتحطي فيها الشريط من 15 تانية الى 2دقيقتين حسب المكتوب على الشريط
لو خطين احمر او خط احمر وخط زهري حمل ان شاءالله
لو خط واحد مافيش حمل
ويارب تكوني حامل يا عروسة التجمع
ويارب يرزقك بايام حلوة وتنسي الشهور يلي فاتت وتحكيها قصص لصغارك
راجلك معاك توا ولا وين؟

[عيون زوجي]

مناطق الجميل ورقدالين والعجيلات وصبراته وصرمان مازال فيها هلبه ناس من ازلام النظام وامس فجروا مقر المجلس المحلي في الجميل ومرة مرة يضربوا في الرصاص على البوابات
والمشكله كلمت ناس من غادي يشكو من معاملة الثوار ليهم قالوا انه مافيش مبدأ التسامح والمصالحه بكل وكلها ثارات شخصية
يحكولي انه فيه شاب كان يحارب مع كتايب معمر وتوا مصاب ورجليه الزوز فيهم فتيات حديد من برا مشوله بالميم طاء ورعبوا نساوين العيلة من ضرب الرصاص والولد نزلوه من الدروج بالدف ورجليه تصب دم
حرام يشوهوا صورة الثوار في تلك المناطق حرام
ناس تموت في الجبهات وناس تجري بالسلاح زي المفرخ وراء ثارات شخصية
حرام عليهم يشوهوا هالثورة وخاصة ازلام معمر يستغلوا الفرصة ويعبوا في روس الناس بافكارهم السوده

[ღॐ آية ღॐ]

المشاركة الأصلية كتبت بواسطة ام وسونة

السلام عليكم

اهلا بيك اختي توباز ويارب يكتبلك الحمل يارب

بالله خلي ندعوا لثوارنا في بني وليد بالنصر تصدقوا كاميرا الجزيرة جابت

الصورة على ولد خوي في وسط المعارك نقل مباشر والله قلبي قريب يتقطع

من لما شوفته ادعوله ربي يرجعه بالسلامه

ام وسونه ربي يتقبل منك الدعاء ولما قريت انك شفتي ولد خوك
قلبي نعصر انا لو نشوف خوي نموت في مكاني والله ماني عارفه شن
يصيرلي ...ربي يردهم لينا سالمين غانمين بكامل صحتهم
ياااااااااااااااااارب ....

يقين ربي يطمنك على اهلك
حاسه بنار الي انتي فيها وحاسا بيك ووووووووالله..


عيون حبيبتي الف صحة وعافية
انتي فالحة مشاء الله عليك
بس البزين مرة على مرة يجي احلى المرة الجاية رح ياكل ايديه وراة
وبنسبه للحمل يااااااااااااااامن عاااااااااااااااااااش خمسه سته سنين تانيات
غر نبصر عليكم
العامليه قعده نحس بيها.. توجع فيا هلبا ايام الدورة ....

[ام قصى محمد]

السلام عليكم
مشكورين الى سال عليا
انا كنت مشغوله برجوع ابى من الحبهه سرت مصاب فى ايديه اليمين بطلق نارى من قناص
وسيب وراه خوتى الاثنين الله ينصرهم ويرجعهم سالمين
تصدقوا يحكيلنا على المعارك تقول فيلم اكشن الرصاص والقذائف الله اكبر
ولما تتفرجى على صور اصحابه ويقولك هذا استشهد صعبه صعبه الحمدلله تصدقوا قالنا اندير العمليه ونرجع
قلت له انشاء الله تتحرر الليله وماتضطر ترجع
الاصابه جت بين اصابه والدى سلاحه اربى جى
والقناص اوكرانى تصدقوا فى المعركه هذى استشهد 13 واحد مع ابى نجوته كبيره
قال مشكلتنا فى القناصه

[ام قصى محمد]

ام وسونه وايه الله يحفظ ثوارنا ويرجعهم لنا سالمين غانمين

[ام قصى محمد]

ميراس الحمدلله على سلامه اهلك وانشاء الله بسلامتك طمنينا حبيبتى شن اخبار التحاليل هبط الهرمون عندك لو لا
بقبن عقبال اهلك حبيبتى يطلعوا او يحرروها الثوار انتى بس ادعى لله وقولى اهلم استودعتك اهلى وانشاء الله ربى يحفظهم لكى