تجمع حوامل ليبيا

[عيون زوجي]

توباز مرحبتين بيك معانا وبينا ويارب تكوني حامل
انا مش رح نفيدك في حكاية الدكتورات بس اوخيتي هاتو كفت ووفت
وبالنسبه للتحليل المنزلي ممتاز وديمة يصدق معاي وما يغلطش
بس نبوا منك تعرفينا بيك ونتشرفوا بمعرفتك
الاسم:
المواليد:
العمل:
وطول الاحداث كنتي في بنغازي ولا سافرتي

[عيون زوجي]

ام اسيل وينك يا اوخيتي هربتي مع ميرنا

[ميراس]

انشاالله يابنات اتكون جمعة النصر على بنى وليد بدون اراقة دماء وياربى ايشدوا مزيل هالبطشة اللى ضيع اهالينا وشبابنا وبهدا بنى وليد اترد اعتبارها اتصدقو وين نتلاقى انا واحد من ليبيا يبدوا ايلومو فى بني وليد واخدين عنها فكرة غلط مايحسابوهاش محاصرها وامهددينهاوامعبينها بالمرتزقة يارب انشالله اتحز على على خير قولوا امين يقين شنى اهلك ماطلعوش

[ميراس]

توباز سامحينى انسيت انرحب بيك اهلين فيك ونتشرف بيك تكونى ضمن عائلتنا الحلوة العائلة اللى اتضم بنات ليبيا الحرة اللى كل وحدة قلبها عالتانىة ونخافو بعضنا والله نتمنى من كل قلبى نتلاقى مع كل وحدة منهم اللى فعلا نتشرف بان انكون صديقة لكل وحدة منهم طبعا لازم تعطينا تفاصيل اكتر عنك

[ميراس]

يقين وييييييييييييييييييييييييييييييييييييييينك طمنينى

[ام وسونة]

السلام عليكم

اهلا بيك اختي توباز ويارب يكتبلك الحمل يارب

بالله خلي ندعوا لثوارنا في بني وليد بالنصر تصدقوا كاميرا الجزيرة جابت

الصورة على ولد خوي في وسط المعارك نقل مباشر والله قلبي قريب يتقطع

من لما شوفته ادعوله ربي يرجعه بالسلامه

[عيون زوجي]

ربي يطمنك عليه يا ام وسونه يارب ويرد كل الثوار لاهاليهم سالمين ويهدي حتى كتايب القدافي ويردهم لعقولهم لانهم اولا واخيرا خوتنا الليبين ويرموا سلاحهم ويحفظهم لاهاليهم
ميراس امتى مروحه لليبيا تعالي هدرزي على اماليك ماقلتيش وين هربوا لطرابلس ولا تاورغاء

[عيون زوجي]

على فكرة باركوووووووووووووووووووولي
اليوم ولاول مرة في حياتي درت بااااااااااااازين
والف شكر لطريقة اختي ايه الغالية
ثانكيو ايه
ميرسي ايه
دانكه شو ايه
راجلي عجبه لين خلااااااااص

[ميراس]

الف الف مبروك ياعيون اسمعى قولى الحق الوحدة ماتحسش روحها مراة صح لين ادير البازين وخبزة التنور واحنا فى بنى وليد لازم الوحدة لما تنخطب واتجهز روحها لعمل البازين والخبز لان الطبيعى ايكون اول الاسئلة اللى بتنطرح عليها تعرفى اديرى البازين والخبزة وانت وفلاحتك كانك شاطرة تبدى تتباهى وانا اندير فى بازين امقوم وخبزتى ماتديرها وحدة وبرا ام وسونة انشاالله ياربى ايطمنك على وليد خوك ويرجعلكم حامل راية النصر امعاه ياربى وين يقين اليوم شن صار فى اهلك طلعوا اليوم هلبا ناس طلعوا

[يقين]

السلام عليكم
اني حالتي مايعلم بيها كان ربي اهل زوجي كلموه اليوم الساعه8 الصبح طلعوا من بني وليد والناس كلها طلعت كان اهلي ياني وخلاص مانعرفش شن صاير فيهم ربي يستر