اعملي التحليل الرقمي واقطعي الشك باليقين + نصائح + تجربة

[Um sara1]

بسم الله الرحمن الرحيم


موعد دورتي كان قبل اسبوع ونزل علي افرازات بنيه في نفس اليوم لمدة 48 ساعه و الام الدورة مستمره مغص خاصه لما اجلس عند المكيف بدون نزول دم بصراحه ماشكيت بحاجه لاني كل شهر اشك وتطلع اعراض دورة لكن هالمره توقفت الافرازات واستمر الم صدري مع نغزات جهة المبيض اليسار
حاولت ماشغل نفسي قلت انتظر اسبوع واشوف وش يطلع معي وامس شريت التحليل المنزلي بس ماكان لي نفس اجربه
اليوم الصباح صحيت بدري وقلت خليني اجرب وياشين هاللحظه لانها مرت علي كثير والنتيجه دائما سلبي
الا اليوووووووووووووووووووووووووووووووووم ماشاء الله ظهر لي خطين اناظر ماني مصدقه
يابنت وشو ذا خطططططططييييييييييين ياسسسسسسسسسسلام

واطير ادق على زوجي في العمل وابشره قال كويس الله كريم ماكان مصدق ياحليله

قلت الحين متى تجي ابغى اسوي تحليل دم قال انتي تتكلمين من جدك

قال خلاص خليها العصر << اثار الصدمه

قلت مابغى مابغى الحين الحين ونطلع بهالشموس نفتر

ندور لنا مكان نحلل فيه الساعه 2 !! كان اقرب شي الالماني وساعه نحوس عشان نلقى المختبر اخرتها الاستقبال مو موجودين

قلت يلا سرينا على انيس الخير وبرضو مقفل انا هنا قلت وصلني بنام ياشين الحماس الزايد

رجعت البيت تغديت ورقدت ساعه صحيت صليت العصر ورحنا المختبر وسويت التحليل قال تعالو بعد ساعتين ياطوووول هالساعتين :( :( :(

رجعت سويت لي كوفي وطقطقت عالنت لين جا الموعد راح زوجي ورفض ياخذني قلت بسلامتك

وانتظرررررررررررر يتصل انتظرررررررررررررر انتظرررررررررررر ماحولك احد

ادق قال توي طالع من الصلاه رجيتينا بروح لهم الحين انا وجهي صار علامة استفهام وشفيه ذا نفسه خايسه

وتوي قفلت منه الا هو داخل ومعه ملف وجهه مقلوب اشششششششفيك!!

قال النتيجه فوق 5 يعني حامل

يالله يابنات شعور حلو الله يبلغكم جميعااا بالحمل السليم المعافى وبالذرية الصالحه يارب

بس الاحلا انك ماتضيعين وقتك بالتحاليل المنزلية وتحليل الدم العادي لان احيانا مايبين بالبداية

اول ماتتاخر الدوره يومين او اكثر اقرب مختبر وحللي رقمي وريحي راسك من التفكير والانتظار

والاهم من هذا كله والي جربته هالشهر بالذات اني كنت دايم ادعي لبنت خالتي وصديقتي الي تاخرو بالحمل واذا دعيت لاخيك بظهر الغيب الملائكة ترد ولك بالمثل

نصصصصصصيحه لاتلعبون بانفسكم وتستخدموا خلطات خاصه الاعشاب لان ضررها اكثر من نفعها

اتكلوا على الله واكثرو الدعاء واعملوا بالاسباب اولها الصدقه والاستغفار

وتأكدي ان زوجك سسسسسسليم قبل ماتبدين اي خطوة

لاني جلست سنه اراجع وتحاليل واشعه مره هرمون الحليب مرتفع مره تكيس مره التبويض ضعيف وكل شهر يطلعون فيني عله

واخذ وصفات من النت واستخدمها وقت الدورة لكن برضو كملت سنه ثانيه مافي حمل

استخدمت ابر تفجيريه مرتين وبرضو ماااااااااااااافي

الين رحنا في رمضان مركز سمير عباس وسويت تحاليل شامله وسويت اشعة الصبغه وكل شي سسسسسسليم لكن لما حلل زوجي وطلع عنده ضعف حركة وهنا جلست قلقانه لاني قريت بالمنتديات كثير ماحملوا بعضهم عشر سنوات واكثر لان زوجها عنده ضعف حركه

بس ربي من عليه بالهداية وترك التدخين والحمدلله بدون مايستخدم العلاج حقهم تم الحمل

على فكره اعراض الحمل مشابهه تماما لاعراض الدورة عشان كذا نتحطم لما تنزل ونتازم نفسيا

وافرازات ماقبل الدورة تشبه افرازات الحمل ممكن بنيه او صفرا او بيضا او حتى دم سوي الرقمي وتأكدي لانه دقيق جدا ويبان على طول

اول مشاركه ونابعه من قلبي واتمنى كلكم تستفيدون باذن الله

[دلوعة بالحيل]

ماشاء الله تبارك الله
مبروك الحمل
ربي يثبت حملك و يسهل عليك
و الفال لك منتظره الحمل يارب

[فديت الغالي]

مبرررروك حبيبتي الله يتمم لك على خيرر والله فرحة لك
وانا اقراء موضوعك عقبال التاسع والولاده السهله يااارب
الله يسهل عليك وعليناا يااارب وتشوف البيبيات يارب

[أسيرة الصمت]

ألف مبروووووووك حبيبتي
ربي يثبت حملك وتفرحي بشوفة ضنااك سليم معافى يااااارب
وربي يرزقني ويرزق كل منتظرة للحمل امين يااارب العالمين

[Um sara1]

المشاركة الأصلية كتبت بواسطة دلوعة بالحيل

ماشاء الله تبارك الله
مبروك الحمل
ربي يثبت حملك و يسهل عليك
و الفال لك منتظره الحمل يارب

ومبروك حملك كمان الله يفرحنا بقومتك سالمه وفي حضنك اجمل طفل او خت لعبودي

المشاركة الأصلية كتبت بواسطة فديت الغالي

مبرررروك حبيبتي الله يتمم لك على خيرر والله فرحة لك
وانا اقراء موضوعك عقبال التاسع والولاده السهله يااارب
الله يسهل عليك وعليناا يااارب وتشوف البيبيات يارب

الله يبارك بعمرك ياكروووشة ويتمم حملك ووولادتك على خير ويقر عينك بشوفته سليم معافى يفتح النفسسس

المشاركة الأصلية كتبت بواسطة أسيرة الصمت

ألف مبروووووووك حبيبتي
ربي يثبت حملك وتفرحي بشوفة ضنااك سليم معافى يااااارب
وربي يرزقني ويرزق كل منتظرة للحمل امين يااارب العالمين

تسلمين الله يفرحك باجمل خبر ويبلغك مناك ويحقق الي في بالك
الخير جاي بالطريق انتي بس استعدي نفسياا للحمل وراح تشوفين البشارة
وابغى احكيلك موقف بيني وبينك لاتعلمين احد
قبل شهر ونص كانت اختي ناقله من المدينه وجالسين نرتب عفشها وفي شنطتين ملابس بنوتتها لما كانت بيبي محتفظه فيهم لانها جايبتها لها من امريكا ونيوزلندا كذكرى ومافيها حيل تشيلهم قلت عطيني الشناط والله واجيبهم عندي البيت وزوجي قال شفيك استخفيتي قلت كيفي مو شغلك مين كان يخطر بباله احمل !! قولي مين مافي غير ربي وربك !! ويمكن يجيني بنت والبسها منهم عشان كذا اقولك تفائلي وتعاملي مع المستقبل كأنه حاضر وهذي اساس نظرية قانون الجذب وقبل كل شي التفاؤل والثقة برب العالمين سبحانه

[ام عيون.]

حبيبتي مبرووووك ربي يثبته ياارب وتشوفينه وتفرحين فييه

[qurtz]

ربي يتمم لك حبيبتي على خيــر

[راجيه لله]

ما شاء الله ربي يتمم لك حملك ويثبته لك يارب

[بنوتة أمورة]

ياعمري مبرووووك...بس الواحد لازم ياخذ بالاسباب ويتعالج...وممكن يحمل بشهر بدون علاج...لكن الجسم مستجيب للعلاج

[ayato]

الف الف مبروك حبيبتي الله يتمم حملك على خير يارب ويرزق كل وحدة مشتاقه