قصه ولادتى بالتفصييييييييييييييل

[نولارا]

السلام عليكم ورحمة الله وبركاته
وحشتونى كلكم
انا ولدت الحمد لله يوم الاحد
كنت سالتكم عن التحاميل اللى دكتورتى كتبتهالى لفتح عنق الرحم وتحفيز الولاده
العلبه عباره عن اربع حبات
اخدت اول واحده يوم الخميس بليل وما حصلش حاجه
يوم الجمعه اخدت التانيه وصحيت الجر السبت لقيت العلامه نزلت رحت انا وجوزى المستشفى لقينا دكتوره لسه امتياز كشفت عليا وقالت الرحم مفتوح قيراط واحد بس
روحى ولما تحسى بالم شديد او المايه تنزل تيجى
روحت واخدت تالت حبايه وصحيت الساعه واحده الصبح من الوجع ولقيت ماء بدم بينزل خرجت من الاوضه عشان مقلقش جوزى الساعه خمسه نزل عليا مايه
صحيت جوزى ورحنا المستشفى الساعه سبعه صباحا لقيت نفس الدكتوره
كشفت لقت الرحم مفتوح قيراط ونصفبس
قالتلى اتمشى فى المستشفى اتمشيت انا وجوزى حوالى نصف ساعه
وجت حماتى وبعدين امى
واستلمت دكتوره تانيه كشفت عليا لقت الرحم 2قيراط
برضه قالتلى اتمشى نزلت انا وجوزى لفينا حوالين المستشفى وجبنا عصير
وطلعنا كانت اختى كمان جت
الدكتوره قالتلى هاتخدى حقنه شرجيه وكفايه مشى عشان المايه اللى بتنزل منك
وجوزى خلانى اشرب خمس اكياس عصير
والجو كان حر جدا يوم الولاده ده
وبعدين علقولى طلق صناعى وكان الوجع لايحتمل وبعدين فجاه رجعت كل العصير اللى شربته على رجل جوزى
وجات الدكتوره وقالتلى يلا على العمليات
نزلونى بالاسانسير حاول جوزى يدخل معايا لكن منعوه
واخيرا وصلت الدكتوره اللى انا متابعه معاها
نيمونى على السرير ورفعوا رجلى وقالتلى الدكتوره لما تحسى بالوجع ادفعى على قد ما تقدرى وطلبت من الممرضه تضغط على بطنى عشان تساعدنى
و5او 6طلقات وطبعا وسعتلى من تحت
وقالتلى يلا برافو انا شايفه الشعر اهوا يلا
واخر طلقه وطلع حبيب ماما للدنيا
وخرجوه لباباه واذن فى ودنه مع اذان الظهر
وانا فضلت بعدها حوالى ربع ساعه الدكتوره بتخيط الجرح وحطتلى بنج فى المحلول
واخيرا خرجت من العمليات لقيت جوزى واقف باسنى وطلعنا الاوضه

واختى ساعدتنى انى اخد دش واغير هدومى
ورجعنا البيت معانا اجمل هديه من ربنا
احمد حبيب بابا وماما
معلش طولت عليكم عقبالكم كلكم