دردشة حوامل أهل القصيم - دردشة بنات القصيم - تجمع حوامل القصيم

[توتو22]

اهلين لينا كيفك وكيف الحمل معك؟؟؟انتي باي شهر؟؟؟

[شاي أخضر]

مسيتم بالخير يابنات القصيم

دايما امر من هنا بس ماعمري فتحت التجمع مدري ليه رغم اني من القصيم


امممممممم


وش رايكم نفتح موضوع نتكلم فيه كلنا بدل مو كل وحده تكتب بوادي؟

<------ اخلصي

انا اقترح نتكلم عن اطرف موقف مر عليكم اثناء الحمل او الولاده

وانا راح أبدأ

\

بولدي الأول تعديت الشهر التاسع وصرت بالعاشر ومر اكثر من 20 يوم

كنت كل يوم احط قدر قرفه على النار واشربه <--- قدر مو بريق

وامشي من بيتنا للمستشفى يوميا وكان يبعد تقريبا 500 م يعني رايحه وجايه كيلو كامل

المهم بعد جهد جهيد ولدت (زياد) وكان صغير مرررره واسمر وكل جلده متعفط كأنه عجوز خخخخخخخ وصرنا نسميه الولد المخلل ... لانه صار مثل الخياره المخلله ههههههههههههه


الله يصلحه يدرس ثاني ابتدائي الان



يلا ياصبايا هلمو

[ام احلى اثنين]

بطة بيضاء لا وش دعوى يضربووون خخخخ

الناس تحب تبهر او مدري عنهم

انا ببكري كانوا وحشيين بس انا ماكنت اساعدهم

كنت بس اصرخ واهوش وازعجتهم ازعاااااج

عشان كذا عصبوا علي بس ماقالولي شي

طبعا وقت الولادة كانت الممرضه مره مره طيبه معي

وتقولي لاتصرخين عشان انا اولدك احسن من الدكتورة

بس انا صراخ لين جت الدكتورة وانا مستمره تقل موصيه صراخ وحسيتها حمقت علي

المهم يقولون دفي مافي دف السالفه صراخ واقولهم بموووت بعدين الحمد الله سحبوا ولدي هم وارتحنا

بس يوم جاء الخياط ابطوا علي بعدين راح البنج وبرد اللحم هو اللي بغيت اموت والدكتورة مقهورة مني ومن الزحمه ماعبرتني ابد وانا اصرخ تحسبن اتدلع لاني من دخلت عليهم شغاله صرااخ


بالثاني لا كنت عاااقله قوووه والحمد الله كانوا مره حلويين معي لاني ماصرخت ابد

واطيعهم ومحترمه معهم قووه اي شي يبونه مني اسويه

لذلك ماراح اضلمهم اي شي كنت اطلبه يجيبونه لي قلت ابي مسكن عطون ابره عضل قلت ابي كمامه جابوها لي

الخياط اول ماحس بشي لو بسيط واقولهم احس تعطيني بنج زيادة

والحمد الله ربي سهلها صح تعبت بطلعه الراس وبالولادة

بس المستشفى كانوا حلوين

وانا اشوف ناس تسبهم لكن مو كل الغلط منهم اكيد هي بعد معه حقه واكيد بيحمقون

اختي تمدحهم مره بس هي ماشاء الله صبور وتمشي مع اللي يقولون لها ماتفكر بخااص ابد

جابت بكرها بالفريح تقول مستشفى الولادة افضل منهم بكثير

حتى عمة زوجي كل عيالها بالحكومي وتوها والده بالفريح تقول الحكومي افضل ولا بفرق

ومره متحسفه حتى تقول رايحين لزوجي وقايلين وقع تبي ولادة بدون الم ووقع ودفع فلوس وهي

تحلف انه حتى الكمام ماشافته

ولا جتها الدكتورة الا بطلعة الراس ويوم قالت لها ابي شي يخفف قالت غريبه ماعطوك شي مكتوب بملفك ولادة بدون الم

بس خلاص الحين مايمديك

[أم الشيخ خلودي]

بنات تعرفون مستشفى النساء والولاده ببريده رحت لهم اليوم ورفضت تعلمني جنس جنيني قهرتني تقول ممنوع اكمل معهم ولا اغيره
نصيحتكم لاني مااعرف احد بالقصيم :(

[محجبه]

ام خلودي حياك ربي
بس مااتوقع انك ترفضينهم بسبب تافه انهم ماقالو لك جنسه ياختي هم ممنوع عندهم وهذا نظامهم وتعرفين الحكومي لازم تطولين بالك من شان صحتك وتحملين اي شي
وش فايده الاهلي اذا مصو جيبك وهم يتمنون انك دايم تتعبين على حساب سحب فلوس ياختي روحي نفسك ولايهزك شي والحمد لله جنس الجنين تقدرين تاخذينه من اهلي بس نصيحتي لاتفرطين فيهم الحكومي وهم اهم شي هندهم صحتك وصحه البيبي

[ملكه]

مسسسسساكم الله بالخيييير
موووبطينن عنكم اعذروني ضايع معرفي وتوني القاااه ههههههههههه

المهم وش اخباركن وش علومكن من اللي ولدت واللي توه ماولدت ؟
انا يوم اسجل عندكم كنت بتم الشهرالثاني وادخل الثالث والحين ماشاء الله تميت السابع باقي شهرين ع الولادة الله يسهلها علي وعلى كل حاامل يالله ياكريم

بس وش تنصحونن اي دكتورة زينه للولادة وحبيبه عشاناطلبها تولدني ؟

[ملكه]

شسموه وش اخذ اغراض الولادة ؟؟
يعني وش المهم اللي لزوم اخذه غير الملابس ؟؟

والفوط وش تنصحون به ؟ الفوط الكبيرة ذيك حقت الولادة ماعرف اسمه بس اذكر خوات ييشرونه واستخدمته في ولادتي القيصرية الاولى وسبب لي حرقان اوووف ماناسبتن وتركته لان مانزل معي دم كثير << لاني ماهتميت بروحي زين وعشانه قيصري بعد
لكن ان شاء الله هالمرة بولد طبيعي باذن الله تعالي
بس ابي تعلمونن وش احسن فوط للنفاس ؟؟؟

واغراض المولود كيف اجهزه ؟ يعني اخصص ملابس له بعد الولادة مباشرة والباقي احطه بشنطتي ؟؟

[حكآية عطر]

الله يسهل علي وعليكم يارب انا بحساب السونار بمنتصف الرابع..
ودي تذكرون تجاربكم مع المتابعه والولادة بالمستشفيات الخاصه..
انا حملي السابق راجعت وولدت بالحبيب ..
بس هالمره براجع واولد بإذن الله بالوفا عند د_نوال<< شكله جديده ماقد سمعت عنه

اما اللي قالت عن المواقف الطريفه وقت الولاده فكره حلوه بس للأسف ماحصلي شي

اللي تسأل عن شنطة المستشفى حطي طقمين ملابس كامله لك والبيبي اثنين عالاقل لأن احيانا يستفرغ ولا يروشونه ويحتاج ملابس
أنا أحط الاغراض كامله بشنطة البيبي..

[حكآية عطر]

الله يسهل علي وعليكم يارب انا بحساب السونار بمنتصف الرابع..
ودي تذكرون تجاربكم مع المتابعه والولادة بالمستشفيات الخاصه..
انا حملي السابق راجعت وولدت بالحبيب ..
بس هالمره براجع واولد بإذن الله بالوفا عند د_نوال<< شكله جديده ماقد سمعت عنه

اما اللي قالت عن المواقف الطريفه وقت الولاده فكره حلوه بس للأسف ماحصلي شي

اللي تسأل عن شنطة المستشفى حطي طقمين ملابس كامله لك والبيبي اثنين عالاقل لأن احيانا يستفرغ ولا يروشونه ويحتاج ملابس
أنا أحط الاغراض كامله بشنطة البيبي..

[أم الشيخ خلودي]

محجبه ماقصرتي ياقلبي بستمر معهم ونصحوني اسوي السونار باهلي لمعرفة جنسه