قصة ولادتي اللهم لك الحمد

[ام شوق2]

مساء الخير كيفكم خواتي عساكم طيبين دخلت اليوم على شان اكتب لكم قصة ولادتي بعد عناء مع التطويف انا كان موعد ولادتي في سته وعشرين محرم ولا ولدت الى في سبعه صفر لكن الحمد لله بعد التعب والانتظار جاني احلى عبودي بالدنيا الله يحفظه ما لكم بالطويله انا كان عندي موعد بالمستشفي يوم الاحد وكشفت علي الدكتوره قالت الرحم مسكر واعطتني موعد دخول يوم الخميس طلق صناعي ويوم جيت البيت رحت الحمام الله يكرمكم ونزل علي افرازات بنيه والم بسيط ويوم الاثنين العصر رحت للمستوصف خاص قريب فيه دكتوره حبوبه اعرفها وقلت لها الي صار معي قالت ان شاء الله ولاده وكشفت علي قالت الرحم فاتح 2 سانتي وقالت لي روحي البيت واتبخري بشاي اخضر او قشر بصل وكمون واشربي حاجات ساخنه وفعلا رحت البيت وشربت كوب زعتر بري وتبخرت بكمون وقشر ومرميه وبعدها اخذت حمام قريب من الحار وكان معي تحجر شديد ببطني والم ولكن ما كنت استغرب الالم لانه كان له فتره معي ووالله ما صرت اميز الطلق الحقيقي من الكاذب مع اني والده قبل وعندي خبره المهم كان التحجر والالم يجي ويروح وانا ما ني منتبهه وسبحان الله ذيك الليله كنت رايقه مره ودخلت المطبخ الي لي كام يوم ما دخلته ورتبته وصلحت عشاء لعيالي والالم زي ما هو وبعد العشاء تقريبا الساعه 12 رحت غرفتي بنام اول ما انسدحت حسيت كن حاجه انفكت من اسفل صبرت شوي بعدين قمت ابي اروح الحمام الا احس نزلت علي مويه وقفت شوي واحس نزلت ثاني قلت بس جاك الموت يا تارك الصلاة وبسرعه رحت اخذت فوطه وملابس ورحت الحمام وغسلت ولبست ورجعت لزوجي قلت بسرعه المستشفي قال اكيد قلت ايوه لان كل يوم تعبانه قال يمكن زي كل يوم ورحنا واول ما ركبت السياره صار الالم كل سبع دقايق والمسافه كانت نصف ساعه وفجاه صار يجي كل ثلاث دقايق وهنا زوجي صار يمشي فوق الميه والمنبه حق السرعه يدق الين وصلنا العسكري كانت الساعه وحده وربع وعلى طول دخلوني وكشفت قالت 4 سانتي بس كان الالم سريع وقوي مره والتخطيط يرتفع فيه الالم اعلى درجه واعطتني الكمام الله ياهو يريح على الاقل يخليكي بعالم ثاني وشوي صارت الساعه 2 ونصف صار الالم لا يحتمل وطلعوني غرفة الولاده وصرت ادفع بقوه الى ان من الله علي وطلع ولدي بسلامه وكان عندي بواسير زادة علي مع الولاده وفي تمام الساعه 3 ولدت ولله الحمد الله لا يحرمنا الاجر وكانت ولاده سريعه ولكن متعبه مره والطلق حامي وهاذي قصتي اتمنى ان تستفيدو منها ومن الحاجات الي حسيت انها سرعت الولاده مغلي الزعتر والتبخر والستحمام بالماء الحار واهم شي الكشف الداخلي هو الي حرض الولاده عندي وخلها تبدا بعد ارادة الله سبحانه وكثرة الاستغفار والدعاء كل يوم اللهم لك الحمد كما ينبغي لجلال وجهك وعظيم سلطانك اسأل الله العظيم انه يجعل ولادة كل حامل سهله ميسره وسلامتكم