فضفضة من القلب

[Um sara1]

ايفــــــــــــــــــــان

اعرف ان ردي هذا ممكن مايهز فيك ولا شعره بس عشان خاطري اقرئيه للنهاية

زواجك قدر وحملك قدر وطلاقك قدر الاولى برغبتك والثانيه امنيتك والثالثة خيرة من رب العالمين

الان انتي تجاهلي الرغبة بالانتقام لسبب واحد لما يسيطر على تفكيرك بشكل كامل راح يحول حياتك لجحيم

اكيد النسيان صعب ومستحيل لكن اسلوب الحياة مابعد الطلاق تقدرين تتحكمين فيه وتوجهينه في الاتجاه السليم

روحك المنهكة بظروف قاسية مريتي فيها راح تتعذب الف مره كل يوم مع هذي الرغبة وبدل ماتبنين نفسك راح تدمرينها ويمكن يمس هالشي بنتك وياثر فيها لو بدون قصد

ما اقدر افيدك او افرض عليك كيف تعيشين لكن انتي اجلسي مع نفسك وشوفي اكثر شي يستحق منك التضحية هو بنتك الي وضعها الله بلا حول ولا قوة في طريقك عشان ترسمين مستقبلها بالشكل الصحيح

المستقبل : كلمة عميقة جدا تعني الايام الجاية الظروف القادمة العقبات المتوقعة والنهايات السعيده
ارسمي هذا المستقبل مثل ماتحبين في ورقة صغيره دوني اهدافك اليوم وبكره وبعد شهر وبعد سنه وركزي عالممكن وتجاهلي الصعب او المستحيل للهدف الي بعده بضرب لك مثال انا حطيت هدفي بعد كم يوم علاج اسناني وبعد ما انتهي تغيير اثاث غرفتي بالكامل وبعد ما انتهي من هالهدف اسافر تخيلي كل هذي الاهداف وانا الى الان لا املك المادة الي تساعدني على تحقيقها..!! هذا غير الوظيفة عشان انعم بشيء من الرفاهية انا وبنتي ...
المغزى انك تضعين امام عينك خطط ايجابية وتولينها جل اهتمامك لاينسرق عمرك ورى شخص مايستحق من وقتك ثانيه ولا يضيع من يومك لحظة تفكير باشخاص سيئين

تدرين ليش !!
لان هؤلاء الاشخاص ليسو الوحيدين في العالم بهذا السوء بتواجهين ناس اسوأ واضل سبيل
وفي المقابل راح تواجهين ناس افضل لان الدنيا سلف ودين الي تقدمينة اليوم تلاقينه بكرة
الاهم احسني تربية ابنتك عشان تقطفي ثمار الغرس لما تكبر وتكوني انتي بحاجتها
وراح تتزوجي وراح يكون لك اطفال من زوج اخر وراح تبدين مسارك بطريق اخر مثل مابديتي اول مره

بس لاتختزلين ذاتك في امراه تطلقت وتعيش من اجل رد اعتبارها .. كوني ايفان بكل صفاتها الحميده مع القليل من الانانية وحب الذات والاعتزاز بقيمتك وذاتك اما مشاعرك كل ليلة اكتبيها في ورقة واذا صحيتي الصباح شققيها راح تنجلي شوي شوي وراح تشعري بان النسيان بات اقرب من الاول

ادري ان الكلام والتنظير غير مقبول في وضع حرج مثل هذا لكن صدقيني هذي مش فلسفة هذي تجربة حقيقية المهم استعيني برب العباد في كل خطوة تخطينها وراح تكوني بعد سنه في وضع مختلف تماما عن الوضع الحالي وراح تجي وتقري هذا الموضوع الي كتبتيه وتستخفي فيه مثل ماحصل معي ..