أعراض الحمل بالتفصيل !

[نبضات قلبه]

السلام عليكم بنات


حبيت أفيد بعض البنات عن أعراض الحمل اللي حصلت اللي بالتفصيل..

أولاً أنا دورتي بعد الزواج أبد ما كانت منتظمة فـ يعني عادي الوحدة تحمل ودورتها مو منتظمة..

واللي يقولون التفكير بالحمل يأخر الحمل, أي نعم ممكن لكن أذا كان التفكير أيجابي عادي, يعني نفستك مرتاحة مو تفكرين 24 ساعة وتقولين لو ما حملت هذا الشهر شنو ممكن يصير, ويصير الحمل هاجس عندك..
لا فكري بأيجابية, يعني والله حتى لو فكرتي 24 ساعة ما راح يتأخر الحمل أهم شي فكري بأيجابية من هذي الناحية...

والأستغفار صدقوني تأثيرة عجيب والله مو بس على موضوع الحمل بس كل شي وكذلك الصدقة بنية أن الله يختارلك اللي بيه الخير...

المهم الدورة اللي قبل دورتي الأخيرة أجتي غريبة أفرازات ووردي (أرجوا المعذرة حابة أفيدكم) وما طولت 4 أيام وأنا بالعادة 7 الى 8 أيام.
أما أخر دورة اللي كانت من يوم 12 الى 18 أكتوبر وغسلت وصار التقاء بين هذي الأيام ووراها من يوم 30 الى يوم 3 كانت تنزل علي أفرازات بيضاء مطاطية وفجأة صارت عندي حكة وأفرازات صفراء ثقيلة (عذراً)..

قلت هذي أكيد التهابات رحت للدكتورة وكتبتلي على حمالة وكريم لكن قلبي نغزني والله قلت ما أخذها أنتظر الدورة الجاية لمن تخلص..

وصارت أحلامي واضحة وغريبة وحتى حلمت أحلل تحليل بالبيت ويطلع خطين وزوجي كذلك قبلها قالي حلمت أنتي حامل, وأحنا الحمل بصراحة ما كنا مخلينه هاجس عندنا يعني على رب العالمين.. رغم انا مسقطة قبل ١٤ شهر والحمد لله على كل شئ..

قبل الدورة بكم يوم صار عندي شق في شفتي السفلى وانا بالعادة تطللعي حرارة فوق شفتي وكان عندي نغزات بالمبايض مستمرة وأيام الدورة اللي المفروض تنزل يوم 9 بالشهر نزلت علي أفرازات كريمية /حليبية مائلة للصفار وراحت الحكة أيضاً..
وما نزلت الدورة وفجأة نشفت تماماً يعني مرة وحدة أو مرتين أذا مسحت بالكلنكس تكون أفرازات مطاطية ومن خلصت أيام الدورة صارت الأفرازات كريمية مائلة للصفار وأنا قلت أكيد التهابات مع أنه أني أبد ما صار عندي التهابات لا من أنا بنت ولا من أتزوجت الا هذي المرة وقلت أكيد ما راح تجي الدورة كالعادة تتأخر شي أسبوع أو عشرة أيام وتنزل..

لكن ما نزلت ويوم اللي المفروض أكون غاسلة منها يوم ١٦ أو ١٧ حللت بالبيت وكان سلبي ووراها بأسبوع بالبيت حللت أيضاً سلبي لأن كانت الحكة تروح وتجي وأريد أخذ الحمالة, وجهي طلع فيه بقع صغيرة خصوصاً على خدودي وصارت بشرة وجهي جافة جداً وشفايفي كذلك وأضافري تعبانات وتجيني نغزات بالصدر بين فترة وفترة لكن ما في وجع..

وبعد مرور تقريباً 13 يوم على تأخرها حللت وطلع خط خفيف يا دوب يبين وأنا ما حطيت أبالي قلت يجوز يتهيألي قلت أنتظر وصدق أنتظرت 5 أيام ووراها حللت بعد 10 ثوان طلع خط ثاني واضح جداً الحمد لله.. وراها بكم يوم أجاني شد برجلي اليسرى من الحوض للقدم وما أقدر أمشي عليها فـ سويت موعد مع الدكتورة ورحت من أجل الألتهابات وتأكيد الحمل, حللتي أدرار وطلع حمل وقالتلي تحليل الدم بعد أسبوع وقالت عادي أخذ الحمالة ما تأثر والكريم كذلك...

وهسة على حساب الدكتورة أنا في الأسبوع الثامن وعندي جفاف بالبشرة والشفايف مو طبيعي و شد برجلي اليسرى من الحوض والم في الحلمات فقط مو بالصدر كله... فـ الم الصدر مو ضروري يكون علامة حمل..

وأي سؤال انا حاضرة حبيباتي والله يرزق كل مشتاقة أو متمنية الحمل يا رب


تحياتي


نبضات قلبه