ورجعت المشاكل بين أمي وأبوي

[المحتارة=(]

أختي أم نرجوسة .. مشكورة وايد على كلامج اللطيف

أختي المحتارة نقاشك انتي وام بهاء ردك على تساؤلاته يدل على نظجك الكامل حتى وإن كانت المشاكل الي بين امك وابوك ليها عمر يعني مثل ما ذكرتي انها ليها من عمرك 3سنوات. وهالشيء اكيييد رح يخلق عندك شعور بإن هالمشاكل الي بينهم مالها حل وانها رح تنتهي بالطلاق. وهذا أكبر شيء يؤرق تفكيرك بس صدقيني الي انتي خايفة منه مارح يصير فلذلك خليك قوية وما تخلي مخاوفك تسيطر عليك

كلمة الطلاق تتردد على لسانهم اثنينتهم .. بس أمي تقول أنتظرك لين ما تتزوجين وأتطلق .. وأبوي يقول عشانج ( أنا ) مخليها على ذمتي
لو حصل لا سمح الله بتقولون انت كبيرة مب صغيرة محتاجة لأمج ..

أقول لو تطلقت بأنحرم منها طول عمري .. لا اشوفها .. ولا أكلمها حتى تلفون .. وهذا تهديد ابوي لأمي قدامي .. وهو عارف نقطة ضعي وضعفها في هالشيء .. كل مشكلة تصير يردد هالجملة للأسف الشديد
أتمنى انها مخاوف ووساوس بس .. لكن هذا اللي يصير قدامي

المهم انا عرفت من ما كتبتي اخيرآ أن عمر الوالد قريب 70 وهذا العمر. لاتنفع معه الا المسايسة. يعني طالما والدك بهذا العمر حاولي أنك بدل ما تناقشيه أنك تجذبيه لصفك وتسايسيه

صح 70 سنة عمره .. بس سؤالي .. هو كان على نفس الأخلاق والمشاكل من زمان .. هو تزوج أمي عمره 50 سنة تقريبا أو أقل .. وأنا عمري 3 سنين وأتذكر الهواش نفس هالطريقة .. هل عامل العمر بعد له دور ؟؟!!
حسب كلام الوالدة تقول انه أخلاقه كذا ..
أنا قبل ما كنت أرد أو أجاوب عليه .. إذا ضربها كنت أمسك يده بس وأبكي وأقوله خلاص يقوم يضربني معها ..

أول ما جربت اسلوب المسايسه يوم كنت أدرس في الجامعة .. يعني عمري 20 سنة .. كنت أقوله ليش جذي ع الوالدة.. وأعصابك .. وماله داعي .. ولاتزعل نفسك .. يسب أمي قدامي !! وينعتها بأبشع الصفات .. لدرجة إني ما اصدق اللي يتكلم عنها انها أمي !!زين أنا شلون تربيت ..شلون تعلمت !!
بس ما كنت أرد .. كنت أسكت .. أخاف يهاوشني ..

جربت ذا الأسلوب يمكن على 3 سنين فترة دراستي الجامعية ..ونفس الموال يسب أمي قدامي ويقولي انقلعي عني لا تجيبين لي طاري أمج !

امك طيبي خاطرها بقولة أنه كبير وعلينا نسايره على شان نربح أجره انا وانتي

والله بعد كل هوشة تقعد تبجي وتدعي وعقبها بكم يوم تمرض ... دايم أقولها أعصابك .. طنشيه .. خليه يقول اللي يقول .. بس المشكلة يوم أبوي يهاوشها يسبها ويسب أهلها ..فهالشيء يخليها تحترق جذي

حتى لو الشيطان جاك و وسوسلك وقالك هالمخلوقة (الي هيا انا طبعآ. ههههههههه)ما تاخذي بكلامها وأن ابوك مؤذي وشرير. وانه ما ينطاق وأنه مايستاهل المسايسة و ما يستاهل أنك تحايليه وتدلعيه فما تلتفتي لها الوسوسة أبد وأستعيذي بالله منه
وحاولي أنك تعملي مع أبوك مثل ما حكيت لك

لا والله يا عمري .. ما قصرتي يزاج الله خير على كلامج الطيب وعلى وقفتج والله .. والله ثم والله لولا حيرتي وإني وحيدة ما كان جيت عندكم وأفضفض وأدور حل فعلي .. لأني فعلا تعبت وأحس بتأنيب ضمير إذا عليت صوتي على أبوي وأعرف انه حرام بس انه الله يهديه يحدني على هالشيء ..بعد بدأت أحس ان تراكمات هالمشاكل صارت تأثر علي .. صرت انطوائية ومكتئبة وما أحب أتكلم مع أحد .. صرت ألاحظ على نفسي هالشيء وأبي أتغير للأحسن فعلا