تجمع الجزائريات المتأخرات في الحمل و أهلين بالتونسيات الغاليات

[صبورة]

سماسم حنونة اسمعيني مليح..ياك قلتلك شحال من مرة ماتبكيش قدام راجلك راكي تنبهي فيه لحوايج ماكانش على بالوا بهم..و راجلك كيما قالت الاخت نور الهدى..بالشوية برك يوالف و يقتنع بالحالة انتاعوا و يرجع هو يبحث على العلاج بشرط المساندة النفسية و المعنوية من عندك انت..بصح انت ماراكيش متقبلة الواقع و الحالة انتاعك..انت ما راكيش مساندة نفسك..و نقولك راكي تنظري للموضوع كانه نهاية العالم..يعني اللي ماعندوش الدراري مايسوى والوا....صح نتقلقوا و نبكوا فالاخير نستغفروا و ننظروا للسماء و نعرفوا انه يوجد من يسير حياتنا و لا يظلمنا.الله سبحانه و تعالى..و من حبه لنا ابتلانا.. فلابد من الصبر و اليقين التام بان الفرج من عند الله..و لازم تكوني انت و راجلك يد وحدة وتقسموا الهم مع بعض و ترفعيلوا المعنويات انتاعوا و سايسيه..و نقولك علاش راهوا هكداك شافك نهار كامل و انت تبكي على الدراري..راه يقول انا اللي حرمتها من الحمل و انا السبب ..ماتزيديش عليه..حنونة فيقي مع روحك..لازم ديري الثقة في الله و في نفسك باش تقدري تواجهي الحياة و مصاعبها...يعني الحالة انتاعك ماتحتاج لا طبيب نفساني و لا طبيب امراض عقلية..المفتاح راه في يدك ..رضاي بالامر الواقع و عندك زربية الصلات و عندك يديك ارفديهم لسماء و ادعي ربي يفرج عليكم و يفك ضيقتكم و يبسط لكم الرزق و يسهل عليكم العلاج و يجعل بينكم المودة و الرحمة ...و الحالة انتاعكم عندها العلاج..يعني راكم احسن من غيركم..شوفي للاخرين اللي حالاتهم معقدة بزاف و تصدم الواحد..لازم نقولوا الحمد لله..الله يرزقك الحمل عاجلا غير اجل..
حنونة ماتزعفيش مني..من محبتي فيك و احساسي بك وتاثرت بحالتك..عليها تكلمت معاك بصراحة..
وراني خبرة 9سنين و الحالة اللي راكي فيها مريت بها و كنت ندور في دوامة..ماعرفتش لمن الجاء و لمن نشكي..الى ان هداني الله ووكلت كل شيء عليه سبحانه و تعالى لهمني الصبر و القدرة على مواجهة الحياة و رضيت بحالتي و تاقلمت معاها..و عندي اليقين بالاجابة و الفرج..