تجمع امهات شهرشوال 1434

[غربة أعياد]

مرحبا بنات

آسفه تأخرت ماطمنتكم بس انشغلت وكنت تعبانه شوي الأيام اللي راحت وبنوتتي بس تبكي وتستفرغ يادوب قدرت ادخل التجمع القديم واعطيهم خبر


انا رحت المستشفى يوم السبت العصر وجلست بالطواري بحجة مافيه سرير وكشفوا على الرحم وقالوا لي 1 ونص وبعدين فجأه سبحان الله طلع فيه سرير هههههه طلعت تنويم على الساعه 4 تقريبا ولما جت الساعه 5 إلا ربع أعطتني الدكتوره تحميلة طلق وماكنت احس بشي بس قالت الرحم 1 مو 1 ونص
وبعد ساعه بالضبط صرت احس بألم خفيف بظهري وكان زوجي عندي ومحد يعرف ماحبيت اقلق أهلي وخصوصا أمي
لما صارت 6 ونص قلت لزوجي يروح لأهله يرتاح ولاني مابيه يشوفني أتألم وادري بتعب نفسيته
جلست طول الوقت أتألم بس اصبر نفسي وأقول بتهون ان شاءالله
ركبوا لي تخطيط وقالت فيه طلق خفيف صليت المغرب والعشاء وفيه الم كل شوي يقوى
وبعد العشاء حاولت أنام ما قدرت بس أغفى واصحى وقمت مشيت باسياب القسم شوي وتعبت واستفرغت
لما صارت الساعه 10 ونص تقريبا نزلت موية الرأس ولما قاسوا الرحم قالت الممرضة مفتوح 2 انتي مافيه ولاده اليوم ولاده بكرا
انا لما قالت كذا جلست ابكي قهرتني الدكتوره قالت الليلة أو خلال ساعات وهي تقول بكرا حاولت امشي ما قدرت صرت استفرغ الله يكرمكم يمكن 3 أو 4 مرات
الساعه 12 جت بنفس غرفتي وحده توها والده وتجلس تدعي لي وتحاول تصبرني ونزل مني دم مع المشي
وجت القابله على الساعه 1 تقريبا أو 1 ونص قاست الرحم قالت 2 ونص قريب 3 ان شاءالله
قلت يارب صبرك مع كل هالالم وشكلي مطوله

الساعه 2 أعطتني اللي نايمه جنبي كوب حليب حار وتمره وانا مالي نفس احس بغثيان بس أخذته مجامله وخليته عندي
شوي إلا زوجي داخل عندي دخلوه الحمدلله وجلس يدلك ظهري لأني مو قادره أتحرك ولا امشي بس جالسه على طرف السرير
وخلاني اشرب الحليب وأكل التمره غصب جلس 10 دقائق وطلع
لما صارت 2 ونص نزلت التحميله والدم كثير سبحان الله صرت ما احس بألم اختفى الم البطن والظهر صار بس ضغط وما أقدر اجلس
ناديت الممرضة وعلى ماجت القابله إلا الساعه 3 إلا ثلث كشفت قالت 6 ولاده
وأرسلت لزوجي أنهم بيدخلوني الحين غرفة الولاده ورحت معهم وانا ادعي ولما دخلت وجهزوا كل شي سألتني القابله تقول انتي نيرس أكيد معلوم كم رحم مفتوح وقت ولاده قلت ايوه 10

قالت انتي من اول مفتوح 10 بس انا قلت 6 عشان ممرضه هناك مايسوي إزعاج وانتي خوف

المهم قالت هذا رس البيبي اذا حسيتي ضغط ادفعي وصرت ادفع وهي تشجعني ومعها ممرضه وحده والباقين طالعين يجهزون والحمدلله على طول طلعت بنوتتي يمكن بعد 5 دفعات أو اقل سمعتها تبكي وجلست ابكي من غير شعور ولما رجعوا الممرضات انصدموا أني ولدت وهم باقي ماتجهزوا ههههههه


لما طلعوا المشيمه أعطوني بنتي مره ثانيه وجابوا جوالي قالوا صوريهل وصورتها ودقيت على زوجي وأكلمه وأبكي وخاف يقول وش فيك هههههه وكانت البنوته معهم تبكي
شوي إلا هو جاي ودخلوه عندي وانا كنت ارجف غصب عني وهو يحسبني خايفه يقول خلاص خلصتي ليش الخوف المهم أخذ جوالي عشان يبشر إخواني وطلع مع الممرضات للحضانة يشوف النونو
وجت الدكتوره خيطتني وحطيت الكمامة لما خلصت وارتحت ونمت نص ساعه تقريبا وبعدين قومتني القابله وتروشت وطلعت غرفتي
وجاني زوجي تطمن علي وطلع وجابوا لي بنوتتي الساعه 5 وانا كل مااتذكر اللي صار بس ابكي يمكن من الفرحة
بس بنتي صغيره وزنها 2 كيلو و 900 غرام كاسره خاطري مره خصوصا مع الغازات والاستفراغ

ادري طولت عليكم بس حبيت احكي لكم قصتي


الحمدلله ربي هونها علي مع الدعاء اللهم أني أسألك حسن الخلق وهون الطلق
وان ربي يسخر لي خلقه والحمدلله جتني اللي نامت عندي أعطتني الحليب وسخر لي القابله