حبيباتى سيدات ليبيا تفضلو لأعرف ما حالكم

[اوشي]

جنودة .. بالنسبة لتحزيم الشرقاوي توة نشرح لك

نجو اولا لمكونات التحزيم ..

الردا والكردية والسورية والسروال يكون قصير تحت الركبة وحزامين واحد حزام داخلي والاخر للتجميل


تلبسي السورية والسروال وبعدين تلبسي الردا وتربطي عادي من جهه كتفك اليسار

وبعدها تبدي تلمي في طرف الردا السايب من جهة اليمين بطريقة يكون زي الكرانيش وضروري تكون المسافة

بين كل كرنيشة واخري متساوية ومتقاربة عشان تطلع الكسرات من لورا منظرها حلو

وبعد ماكملتي لف الكسرات او الكرنيشات ااتحطيهن تحت ذقنك من جهة اليسار

وتوة تجيبي الحزام الداخلي حتى محرمة كبيرة او وشاح واربطي اشوية ماتشديش


وابدي ارفعي الردا من قدام لنص الافخاذ وديري كسرات من قدام وكسرات من الخلف

هنا لازم يساعدك حد بيش تطلع الكسرات حلوة

وبعد ما اطمنتي علي شكل الكسرات الامامية والخلفية اطلقي الردا اللي ماسكته تحت ذقنك وشوفي

كسراتك ونزلي الردا من الامام لين فوق الركبة

وشوفي توة من الخلف حاولي انك تكري الردا من عند الظهر (المكان اللي كانو يحطو فيه العيال الصغار زمان)

وتوة راح تلقي الرداء منظرةه من عند البطن متهدل وكذلك الظهر

في هذه اللحظة ارفعي الردا من الخلف زي الاول بالكسرات وحطيه تحت ذقنك

ومن عند البطن حاولي انك اتهندمي الردا وتخششي جميع البروزات داخل الحزام وهنا تشدي الحزام بقوة بعد

ما تطمنتي علي شكل الردا بعدها اتجيبي الحزام الرئيسي واتحطيه بمنظر جميل ومنسق

توة اتشوفي روحك في المراية تلقي الردا منسق وجميل من الكسرات الامامية والخلفية

والسروال يكون تحت الركبة وباين اشوية والردا فوق الركبة هنا عاد يبي سيقان سماح ومحنيات


خلاص وصلنا للمرحلة النهائية تلبسي كرديتك ومحرمتك واتحطي الشنبير وبعدها التاج والشناقيل

وتلبس عقدك ونبلتك ولو عند خلحال

والبسي سباطك

وتمت العملية .. ان شاء الله بس فهمتي