تحليل البول إيجابي خفيف و تحليل الدم العادي سلبي *صورة*

[Rawano]

السلام عليكم ورحمة الله وبركاته

كيف حالكم يابنتوتات ؟!
إن شاء الله طيبين ..

أنا متزوجة من 6 شهور .. البيريود منتظمة الحمدلله .. فالشهور الأولى كنت حابة أحمل وكنت أتحرى أيام التبويض بالحساب العادي يعني يوم 14 من البيريود و يومين قبله و يومين بعده ..

وماربنا أراد يحصل حمل ..
الثلاثة الأشهر الأخيرة ماكان فيه لقاء بسبب إني مرضت و بأتعالج كرتزون و أدوية كابحة للمناعة و زوجي خايف لو حملت البيبي يكون غير سليم رغم إن الدكتور كان مطمني إنه الأدوية غير مضرة في حال حصل حمل لكن الخوف على صحتي أنا لأني حأتعب لأني مريضة ..

المهم ده الشهر نزلت برنامج يحسب التبويض و كده .. لقيت إنو التبويض عندي مو فاليوم 14 ههههههه حسب البرنامج .. التبويض عندي بعد الدورة بيوم إلى يوم 14و ينتهي يوم 15 المهم يعني كنت أول بأفوت أيام التبويض ..

خلاصة الموضوع ماكان في بالي حمل ..لكن إللي حصل إنو سار لقاء بيني و بين زوجي فأيام التبويض على حسب البرنامج مابين لي وأنا وقتها كنت أحسبها أيام نضيفة و مافيها فرص حمل ..

مالكم بالطويلة أنا ماحسيت بأي أعراض غير إني أجوع بكثرة و أحس بصداع خفيف فأوقات وأنا شخص مايصدع أبداً ولله الحمد
و طبعاً ألم الظهر مؤذي
و في اليوم الـ16من البيريود لقيت نقط حمرا غامقة تقريباً 4 نقط صغيرة ( اللقاء سار اليوم 7 - 10 من البيريود )
مغص في بطني زي حق الدورة من قبل البيريود ب12 يوم أو 11 يوم تقريباً
لدرجة أحسها حتنزل و ماتنزل

بس دي الأعراض إللي حسيتها خفت صراحة لأنو بأخذ أدوية رحت على طول حللت تحليل بول منزلي قبل يومين
يعني ( باقيلي ع البيريود وقتها 8 أيام )
على طول طلع لي خط ثاني من الدقيقة الثانية ماطول على طول طلع
لكن خط خفيف و جلس فوق 3 ساعات و بعدها بدأ يبهت ..

أنا أنبهرت مو معقولة حامل و في الشهر إللي ماكنت حاطة في بالي إني أحمل ..

وقلت لزوجي لا تتحمس ممكن خطأ التحليل و كده لازم نحلل دم عشان نتأكد قال طيب

اليوم إللي بعده رحنا حللت دم عادي المختبر كل ما أسألهم هرموني يقولوا إيوة و بعد ماجا دوري النيرس إللي تعمل التحليل سألتها ده بيتا قالت نو نورمال
( باقي على الدورة 7 أيام )
المهم قالوا لي سلبي أتحطمت لكن مابينت لزوجي قلت له الحمدلله إنو أتأكدنا عشان لا نعيش وهم
حزنت عليه لأنه مرة أتحمس و فرح ..

المهم يا بنات أدري إني حللت بدري لكن عندي سبب وجيه مو طفاقة
مين حللت بدري و طلع عندها سلبي و بعدين طلعت حامل ؟!
أنا دورتي يوم 21-12-2012
يعني باقيلها 5أيام تقريباً

ونفسي أحلل منزلي تاني أو دم هرموني لكن في نفس الوقت ما أبغى أبين لزوجي و أقلقه و يطلع سلبي ع الفاضي
وحتى مابدي أقلق نفسي
..
كمان كنت بسألكم يا بنات هل كل وحدة فعلا حملها زي أمها ؟!
أنا ماما حملت على طول بعد البيريود ماخلصت .. و كمان حملها ماكان يظهر بسرعة تاخد للشهر التاني حتى يبان .. و البيريود حقتي زي حقت ماما 7 أيام ؟؟ ولا مو شرط كل جسم يختلف

إللي ماترد ع الأقل تدعيلي بينها و بين نفسها ربني يكتب لي الخير و الصالح سواءاً حمل أو غيره و كله من ربي خير و رحمة و رضا الحمدلله والشكر ياربي اللهم لا إعتراض

دي صورة تحليلي المنزلي

بس مو واضح فالطبيعة زوجي شافه و قالي إلا واضح واضح