قصة قصيرة من حياتي مع إستفسار

[Orchid109]

مراحب ياحبايب

أنا متزوجة صارلي(3) سنوات وتعبت كثير على حكاية تأخر الحمل وصدماتي كثير وربي

بس صدمتي اللي مابعدها صدمة وخلتني أنهار وأدخل بنوبة بكاء جداً حادة وماقدرت أنام لي يومين منها هي :

روحتي لمستشفى الحبيب بالريان عشان أسوي أشعة الصبغة، وكانت بتسويها لي طبيبة مصرية مختصة بالأشعة،،،

يوم فحصتني قالتلي الأنابيب كلها مسكرة وأنا راح أحاول أفتحها لك، سبحان الله على الألم اللي قاسيته، الإ قالتلي خلاص إنتهينا بس شوفو وش قالتلي :

(فتحلتلك الأنابيب ومبروك إن شاء الله حتحملي الشهرين دول وعايزاك تسمي بنتك على أسمي لو ربنا أكرمك )

تخيلو وقع هالكلمة علي خلتني أنسى كل الألام اللي مريت فيها وطلعت مرة فرحانة ومبسوطة على الأقل عرفت وش سبب تأخري بالحمل وتفآئلت خير وربي

بعدها بيومين صرت أقرى عن أسباب ألام أشعة الصبغة، إلا أقرى أنه لازم أخذ مضاد بعد إجراء الأشعة، طوالي رحت لطبيبة بمستوصف ومعي التقرير والسي دي للأشعة

وعطيته الدكتورة وطلبت منها تقرى التقرير وتعطيني مضاد

تدرون وش المفاجأة :


قالت الدكتورة حسب التقرير الأنابيب مانفتحت والتوصية: يوصى بإجراء منظار رحمي جراحي للأنابيب !


تدرون وش رديت قلتلها أكيد غلطانة عطيتني تقرير قالت هذا تقريرك أقري هذي أسمك ورقم ملفك موجود قلتلها تأكدي زين لأن ساعتها حسيت بهبوط بالضغط ودوخة وماقدرت أشوف زين من ردها علي.

جابتلي التقرير وقالت بقرالك إياه حبة حبة هذا اللي مكتوب بالأشعة بالضبط إن الأنبوب الأيمن مر فيه السائل بصعووووبة جدن جدن ومو مفتوح ذيك الفتحة المطلوبة، والأيسر مامر معه الصبغة !

أجل وين فتحتها لك ومبروك والهرج الثاني

حسيت لحضتها الدنيا سودت ومعد قدرت أشوف شي
طحت على الكرسي لحضات وأنا بحالة أغمائةلأن تخيلو أمس الدكتورة تقولي فتحت الأنابيب ومافيه شي يعيق حملك ومبروك وحتحملي ومن هالكلام وفجاأة تقولي الطبيبة الثانية المكتوب بالتقرير أنه كلها مسكرة ومنظار بطني جراحي والدكتورة اللي بالمستوصف زادت وقالتلي نصيحتي لك تسوي أنابيب بدال لاتسوي المنظار لأن في حالتك ماينفعلك إلا الانابيب بكل بروووده ياناس .

طلعت وأنا يالله أمشي ركبت السيارة وأنفجرت صياح وزوجي يهديني، وقلتله ودني للدكتورة اللي سوتلي الأِشعة كنت بشرشحها لأنه أنها سويت أشعة ودفعت حقها ليش حتى أطمن على صحتي مووو!

وربي بس عيا علي وقالي خلاص إنسيهم كلهم بنروح لطبيبة ثانية وضليت أبكي وحالتي حالة حتى في الدوام ملاحضين علي نفسيتي تعبانة من تأثير الموقف اللي مريت فيه.

بصراحة مع كثر الطبيبات النساء اللي رحتلهم خلال فترة علاجي أيقنت يقين أنه حان الوقت إني أغير من طبيب إلى طبيبة

وحجزت موعد عند الدكتور/ محمد البقنة شوي وأصيح عنده بس الطبيب هادي وغير كذا ماعتمد على التقرير اللي معاي قال عطيني صور الأشعة اللي معك، عطيته الصور تدرون الصدمة وشهي !

يقول الانبوب الأيمن سليم وواضح أنه مرت معه الصبغة ومفتوح ! والأيسر متسكر طبعاً الكلام هذا منافي للمكتوب في التقرير قلتله الدكتورة قالتلي كذا : قال هذا اللي أنا أشوفه بالأشعة وأنا مابي أعتمد على التقرير! لكن هو إستغرب ليش الأيسر لسه متسكر المفروض يفتح قرر إنه يعيدلي الأشعة مرة ثانية لانه حسب كلامه أعتقد أنه فيه غلط بالأشعة لأن نتيجة الأشعة غير دقيقة وعلى كلامه يقول أعتقد أنها سوتها لك في وقت وإنتي طهرتي من الدورة بس لسه مانزل كل الدم لسه باقي دم برحمك!

سويت الأشعة مرة ثانية وطلع تشخيص الأشعة نهاية الأنبوب الأيسر مسكرة أو بالأحرى نهاية الأنبوب الأيسر متأثرة من إلتصاقات أو زوائد لحمية في الرحم !! تخيلو بس التشخيص الحين كيف

أبدن الدكتور ماجابلي طاري لا للتلقيح ولا للانابيب

عاد هو قررلي أسوي منظار رحمي تشخيصي مو الجراحي وحولني للدكتور عبدالعزيز الشهراني حتى أسوي المنظار الرحمي التشخيص في العيادة.

الحين ياحلوات بعد القرق هذا كله

حابة أسأل سؤال بريئ جداً بما أن طبيب اللي بيسوي لي المنظارهذا معناته لازم أكون منزله ملابسي من تحت تتوقعون يغطون الجزء اللي تحت كله ويكونون فاتحين فتحة صغيرة على المنطقة الحساسة

لأني بصراحة سويت أشعة الصبغة مرتين وكان الجزء السفلي كله باين أقصد الجزء من رجلي لحد منطقة السرة !! وماودي يصير كذا بصراحة قدام طبيب رجل جاوبوني ياحلوين