حموت من القهر مش عارفه اتصرف ازاي مع زوجي .....وطبعا السبب هي حماتي .........

[هونيا]

السلام عليكم يا الغاليات

انا متضايقه اوووي وحاسه كل حمل الدنيا على قلبي حاسه ان مبقاش فيه فرحه في قلبي انا ححكيلكم مشكلتي ولو انا غلطانه انصحوني بالله عليكم وارشدوني للطريق الصح

انا متزوجه من حوالي 9 اشهر واتزوجت عن قصه حب بس لسه ما حملتش والحمد لله على كل شئ

انا موظفه ودوامي من 8 لغايه 3 العصر ومعنديش اخوات بنات عندي اخ واحد بس ربنا يخلهولي يارب

طبعا مش حقولكم كنت مدلعه قد ايه في بيت بابا مكنتش بعمل اي حاجه والله مكنتش عارفه اعمل طبيخ اصلا امي رمكانتشي بتخليني اعمل اي حاجه كان كل همها اني اكمل دراستي وكانت لما تتجوزي حتتعلمي

وانا زي اي بنت تحلم امتى يجي الفارس الاحلام وياخدها على بيتها وتعيش في سعاده


بس انا بدل ما اكون سعيده بقيت تعيسه انا لما اهل زوجي اتقدمولي قالوا حنبلينهم شقه فوق وحماتي و 3 اولادها تحت جوزي معندوش اخوات بنات

بس جوزي قالي احنا صح لينا شقه بس اكلنا حيكون مع بعض بحكم انه اموه بتزهق وكده وخايف على نفسيتها قولت ماشي قولت حخليها تعتبرني بنتها الي مخلفتهاش

والله كنت بحبها اوووي دايما كنت بدافع عنها وكنت بنصح زوجي ايام الخطوبه انه يراضيها وللعلم حمايا متوفي بقالوا 5 سنين وزوجي ابنها الكبير وهوه الي بيصرف عليهم

المهم لما اتجوزت اتصدمت من اولها في حماتي ....


لقيتها بتغار مني اوووي والله والله من يوم ما اتجوزت زوجي مخرجنيش زي اي عروسه نروح نتفسح لوحدينا او ناكل حاجه بره

مشكلتي بق اننا اول امبارح كنت انا وزوجي معزومين في بيت عمت زوجي لقيت حماتي عماله تتكلم ومتضايقه وبتقول ايه ده وايه لازمه العزومه دي وانا اخويا رجع من السفر ومشوفتهوش يعني هيا حبكت يعني عاوزه تروحلوه في اليوم الي احنا عاوزين نخرج

وبعدين وجهتلي الكلام وقالت ارجعوا بسرعه وانا رديت عليها قولتلها والله الخروج بادينا بس الرجوع الله اعلم امتى وبعدين بتقولي انتي عندك بكره دوام قولتها منا عارفه وايه يعني قال يعني قلبها عليا

كان نفسي في مره تقولي اخرجوا اتفسحوا انتوا عرايس كان نفسي تدعيلنا بدعوه حلوة لما نخرج

المشكله بق امبارح زوجي مر عليا علشان يوصلني للبيت قالي ايه رايك اوريلك الارض الي ناوي اشتريها علشان نبني بيت لينا

طبعا البيت حيكون من 3 ادوار احنا في الدور 3 واموه والادها في الدور 2 ولو واحد من اخوانوا قرر يتجوز حيكون في الدور 1

المهم قالي حعمل كده وكده بس لقيت في كلاموه انه مش حيعمل باب لشقتنا من بره يعني درج ننزل منوه قولت واحنا حنخرج ونطلع منين قالي من جوه يعني من شقه اموه

قولت ليه بق لا انا افضل ان يكون لينا درج علشان لو حد من اهلي جه ميظطروش يدخلوا شقه حماتي وبعديها يدخلوا شقتي قالي انتي اصلا يكفيكي غرفه واحده ....

انا استغربت من الكله دي ليه يقولي كده ده جزاتي والله العظيم بطبخلهم وبغسل الصحون وطبعا لو واحده طبخت لنفرين يفرق انك تطبخي 6 اشخاص كل ده مش بعينوه

وانا قولت ليه بتقولي كده قالي انتي كدابه يوم ما قولتي انا راضيه بيك ان شاء الله نعيش تحت خيمه

وانا رديت وقولت انا مكذبتش بس يومها لما قولت كده قولت اعيش معاك مش مع امك واولادها تحت خيمه ...!!!

قالي صحيح الي قال ان الست مش بتبان الا لما تتجوزها وانا اتعصبت اوي قولت يعني انا بقيت الي وحشه والشيطانه بس امك لا قولت انا نفسي في يوم اخرج معاك وامك تكون مبسوطه قالي ايوه صح انا امي بتتضايق لما نخرج وانا امي طبعها وحش قولت مادام بتعرف كده يبق ليه بتلومني على حرقه دمي اذا زوجي هوه الي عايش معاها العمر ده كلوه وعارف انها وحشه للدرجاتي يبق يتعصب عليا ليه

انا ايه ذنبي انه خلاني اعيش مع اموه ليه ما فصلنيش عنها والله بقيت بكرهها اووي ونفسي ما شوفهاش

عارفين لما نخرج كلنا ببق عاوزه اموت ولا اخرج معاهم

هيا قاعده قدام جنب زوجي وانا قاعده بين 3 صبيان والله ببق محرجه وانا قاعده بينهم

انا زوجي من امبارح مش بنكلم بعض انا الي غلطانه ولا هوه هوه عارف كويس ان اموه السبب يبق ليه بيعمل كده

مش كفايه اني متضايقه من كلام اموه ومن كلام الناس الي مش بيرحموا علشان لسه محملتش فاكرين انه بايدي يارب ساعدني يارب اصلح حالي وحال كل واحده

حبيت اقولكم مشكلتي الي مرت عليا 4 ايام

وحاليا :


من يوم ما اتخانقنا زوجي مش بيكلمني وبقالنا على الحال ده 4 ايام

بس لما بتصل بيه مثلا يرد عليا ولما بتكلم يجاوبني غير كده مافيش لا بيجي جنبي ولا حتى اي حنيه

والله روحت وحضنتوه وقولت انته حتفضل على الحال ده لامتى قالي معرفش زي ميكون يعني انا الي غلطت او عملت جريمه

والله انا تعبت جدا من معاملتوا والغريب بق امبارح اتصلت بيه وقولت حروح الغي موعد الدكتوره لبعد العيد

الاقيه جه علشان ياخدني طبعا انا بشتغل وهوه عندوه محل في السوق جه من السوق علشان ياخدني مع العلم ممكن اركب تاكسي وانا اروحلوه وكمان وصلني البيت بنفسه

بس طول الطريق ما فتحشي بؤقه ولا انا اتكلمت

بس لما نزلنا من العربيه لغايه ما وصلنا للعياده كان ماسك ايدي

طيب ايه تفسيروه ده

ليه بيعمل كده ومش بيكلمني ولو كنت مش هامه مكانشي جه واخذني طيب ليه كل الجفاء ده والله انا خلاص مش قادره اعيط كمان حاسه اني زي البطاريه لما بيخلص شحنها مش عارفه مالي

وانا حاسه اني غلطت لما روحت وحضنتوه كان لازم هوه الي يصالحني بس والله انا كنت محتاجه اترمي في حضنوه والله انا بحبوه اوي ليه بيعمل كده

يعني كل ده علشان اموه ياااااااااااااااه وانا روحت فين يارب


الي محدش فاهم المشكله ايه يقدر يدخل في الموضوع الي حاطاه فوق


ارجوكم ساعدوني اعمل ايه ايه الي بايدي اعملوه