أكشن ولادتي و لله الحمد و المنه

[أم ليـان]

السـلام عليكم و رحمة الله و بركاته
كيفكم يا أحلى كـروشـات إن شاء الله إنكم بأحسن حـال
رجعت لكم بالأكشـن << ياكم أحبك يـ هالفيس
المستشفـى : سليمان فقيه بجدهـ
الدكتـوره : الاستشاريه عفاف النـوري
اليوم : الجمعه بتاريخ 8/6/2012
المقدمه
ولادتي كانت مقرره بتاريخ 31/5 اللي هو أخر يوم لي بالتاسـع
بالشهر التاسع ماكنت أحس إلا بتساليف بسيطه جدا يمكن مره أو مرتين كل أسبـوع ، المهم لما راجعت الدكتـوره بأخر يوم بالتاسع الخميس 31/5 فحصتني و لقيت الرحم مقفل و قررت لي موعد للطلق الصناعـي يوم الثلاثاء 5/6 الساعه 8 الصباح طبعا سحبنا على الموعد ورحنا الظهر الساعه 2 و انطردنا من المستشفى قالت لازم تجون ع الموعد و أحنا نبدا نحط التحاميل من الصباح .. مدري وش الحكمه !!
لكن و الله يا بنات إني ما صليت صلاة الاستخـارهـ إلا قبل ما أروح المستشفى بكم ساعه و سبحان الله تكنسـل الموعد و كانت خيـرهـ و لله الحمد
المهم عطوني موعد يوم الخميس بتاريخ 7/6 الساعه 8 الصبـاح ، طبعا ما أقدر أوصف لك المشاعر كيف كانت يوم الأربعاء قبل الموعد كنت خايفه و متـوتـرهـ مشاعر غريبه بجد و كنت ناويه أنـام بدري عشان عارفه إن وراي ولادهـ و لازم أكون مرتاحه و شبعانه نـوم لكن هيهات يجي النـوم طـار و ما أخذت إلا غطه بسيطه و يدق المنبه و أصحي زوجي عشان نـروح المستشفى المهم تجهزنا و أنا تروشت و استشـورت و جهزت شنطتي و توكلنا على الله و صلنا المستشفى 8 و دخلت قسم الولادهـ عند غرف الملاحظه و تصيح وحده ذيك الصيحه و صلت أخر السيب و أتوقع فتح الرحم عندي من صياحها المهم دخلوني غرف الملاحظه و من هنا بدأ الأكشن
الأكشـن
دخلت غرفة الملاحظه ع الساعه 8 و نص و ركبوا المغذي و حطوا لي جهاز التخطيط ياكم أكره صوت هالجهـاز جاني بعدها دكتور التأخير و سألني كم سؤال و من ضمنهم خيرتي بين أبـرة الظهر و الكمام و أبرة العضل طبعا قلت رفضت أبرة الظهر و قلت أبغا الكمام و أبرة العضل و زوجي وقع على الورقه
و بعدها سألوني متى أخر مرهـ أكلتي و عطوني الحقنه الشرجيه المهم جات الدكتـوره الموجوده بالقسم و قاست الرحم و لقته فاتح واحد و نص و حطت لي تحميله الطلق الصناعـي و قالت لي ساعه كامله ماتتحركين المهم عدت الساعه و جاتني دكتـوره ثانيه بعد هالساعه و قاست الرحم و لقت واحد و نص و شكلها قاعدت توسع و أنا أقولها خـلاص و هي تقول أنا أساعـدك المهم شـرفت دكتـورتي عفاف النوري الساعه 11 و جات قاست الرحم لقته 2 سم و تقول أصبـري يا بنتي و أن الله مع الصابـرين الله يسعدها هالأدميهـ وين ماتـروح
طبعا مثل ماقلت لكم أنا ماعلمت أمي و المشكله بهالقسم مافي شبكة نهائيـا و زوجي خلا جوالي بسيارته عشان أمي لو دقت تلقاهـ مفتوح و ما أرد أهون من إنها تدق و تلقاهـ مقفل المهم انتبهت إن في ثابت بالغرفه و قلت لزوجي بدق على أمي بعد الظهر أعرف وقتها اللي تدق فيه علي المهم دقيت عليها ع الثابت الساعه 2 الظهر و قعدت تهزئني وينك عن جوالك قلت توي صاحيه و جوالي الغبي معلق شكلي بوديه اليوم أصلحه قالت حبكت يخرب يوم إننا نترقب ولادتك جاتني غصه قلت أنا بطلع اليوم أنا و زوجي بنوديه و نشوف مشكلته و بروح السوق لو دقيتي و مارديت لا تقلقين المهم قفلت منها و أنا زوجي نسولف و كانت تجيني غطات و ننام هو يا حليله على ذاك الكرسي كسر ظهره و أنا صوت التخطيط هستر فيني
و جاء الساعه 3 و فحصت و نفس الشي لقيوه فاتح 2 سم ، المهم قالت لهم الدكتوره خلوهـا تتمشى و جيبوا لها غداء طبعا اللهم لك الحمد ع النعمه من له نفس ياكل بس قلت بتصبر بكم لقمه عشان يكون عندي طاقه وقت الولادهـ
طبعا خلاص هيأت نفسي أن في تحميله ثانيه للطلق الصنـاعي لأن التحميله يحطونها كل ست ساعات المهم كانوا ناوين يحطونها بعد صـلاة العصـر
رحت توضيت و صليت ع الكرسي و قعد أدعي إن ربي يهون علي المهم جاتني الدكتوره بالقسم قالت دكتورتك اتصلت و تقول لا تحطون لها تحميله ثانيه بنعطيها وقتهالأنك بكريه جزاها الله خيـر
المهم بهالوقت ترجيت زوجي يرجع الشقه و يريح مسكين لأنه مثل مانـام زين و الكرسي كسر ظهرهـ راح ع الساعه خمسه و جاني ع المغرب و أنا كل شوي أدق ع الممرضات يفكون لي جهاز التخطيط بحجة أني أبغا الحمام و أروح الحمام و اقعد أتمشي بالأسيـاب نفذت نصيحة البنات اللي نصحوني أمشي و أتحرك
المهم جاء المغرب و فحصوني لقيوهـ فاتح 3 سـم المهم رحت الحمام و نزلت علي السدادهـ و سيدا رحت عند الدكتوره بالقسم و قلت لها نزلت علي السدادهـ قالت عادي لقطت وجهي و رجعت الغرفه و قلت لزوجي و خاف الضعيف
طبعا طـول الوقت مافـي الام و لله الحمد اللهم الفحص كان مزعج بس
بعد العشاء جات فحصتني السستر لقيته فاتح 3 و نص و قالت يلا مدام غرفة ولادهـ قلت لا لا زوجي راح يصلي بنتظرهـ قالت يلا مدام أنا بقوله لو جاء لأن جوالي بسياره زوجي أساسا مافي ارسال بالقسم و دخلت غرفة الولادهـ و نمت ع السـرير و جهزت الكمام و زوجي جاني مبسوط قال أخيـرا الحمدلله كانت الساعه تسعه الليل و على بالنا 10 بالكثيـر أولد خخخخخخخ المهم من فحص لفحص الين وحده الليل و هو بس أربعه ، و زوجي قال تولين ترى في ارسال وش رايك تكلمين عمتي اللي هي أمي الحبيبه المهم نادينا السستر تقفل جهاز التخطيط و دقيت على أمـي و ردت علي صحيتها من نومها المهم قلت لها روحي كملي نومك يالغاليه قفلت منها و أنا مطمنه أنها خلاص نايمه و مو شايله هم و لله الحمد
طبعا أنا طول هالوقت مركب الكمام كان مـــــــــــــــــريح و لله الحمد و كان فيه طلق خفيف و يقوى شوي بس الكمام و لله الحمد كان يريحني المهم الرحم مو راضي يفتح أكثر من 4 سم ، و بهالوقت من وحده الليل إلين اربعه بالصبح و أنا و زوجي بغرفة الولادة سوالف و استهبال و كل شوي نسمع وحده تصايح و بكاء و بعدها نسمع صوت النونو كنت أحس بخوف و فرحه و كنت من الفضاوه أحسب الوقت اللي تبدأ تصيح فيه إلين يصيح البيبي كان أكثر شي 20 دقيقه
المهم جاتني السستر وفكت جهاز التخطيط و قالت يلا مدام أمشي و صرت أمشي و أمشي بالأسياب من ب4 الفجر الين 5 و نص ، طبعا أنا شبكت مع كل الممرضات و الأمهات و الحوامل بكل القسم و أسولف معاهم لدرجة اشتهرت بينهم و كانت كل أم تشوفني تدعي لي هالدعاء الله يهون عليك حتى عاملات النظافه يدعون لي
المهم الساعه سته تعبت من المشي و رحت غرفة الولادة جاتني الدكتوره و قالت يلا بقيس و بنفك المويه و فعلا قاست و كان اربعه و نص بس و فكت المويه
و بدا بعد الطلق و كان أغلبه بالظهر و هنا قلت تكفون المسكن و جابوه لي
و بدت أتخدر و أغفى لي غفوات و طول هالوقت زوجي معاي المهم من بعد سبعه صار الطلق حــــــــــــــار و ماعاد أتحمل مع إني لا صحت و لا بكيت من طبيت عندهم إلين هالوقت و بديت بعدها أون و أتألم و السستر طول الوقت خذي نفس خذي نفس
و فحص كل شوي طبعا من كثر الفحص ماعاد أحس بشي و بدا الأهات تتزايد و أقولهم خلاص تعبت و ع الساعه تسعه و نص فتح الرحم تسعه و بدت حالة الاستنفار و جات دكتورتي عفاف النوري قالت يالله يا بنتي ساعدينا المهم مدري و الله يا بنات مدري متى بدأت الولاده الفعليه و يرفعون رجولي و يلا سوي بوش أول ماتجي الطلقه و دكتورتي راحت لبست الأخضر و صارت جالسه ع الكنبه و تقرأ علي يالله يـ أنها رهيبه و بهالوقت المحروس موجود أنا أصلا نسيته
و يصايحون يلا سوي بوش و أنا من الربكه ماعرفت وش أسـوي المهم يحاولون فيني مره يخلوني على جبني و أخر شي حطولي شي و رفعوا لي رجولي و جات الدكتوره و تقولي يلا يا بنتي ادفعي قلت دكتوره تكفين سوي اي شي طلعيها تخيلوا هزأتني قالت بعد كل هالتعب تبغينا نحولك قيصري يلا يابنتي ادفعي
المهم دفعت كم مررررهـ قالت يلا نشوف شعرهـا و أدفع و أدفع و السستر تضغط على بطني عشان تساعدني و طبعا وسعت و هي تقول يلا يا بنتي بدا البيبي يضعف و الغرفه كلها حالة استنفار دكتوره الأطفال موجوده و دكتورة التخدير عند راسي طبعا في شغلة بمستشفى فقيه أول مايطلع الراس يصكونك بـ أبرهـ ماعاد تدرين شي المهم مدري وش حطت عشان تسحبها و طلع الراس و فقدت الوعي خدروني بسرعه
زوجي يقول ولدتي الساعه 10 و نص و بشـر أهله و أمي يقول أول ماردت قالت خيـر بنتي فيها شي قال أبشـرك هي بخيـر و البنت بخير تقول أمي قفلت بكيت و رحت أبشر أخواتك و حسيت زي الرجفه بجسمي يا حليلها الله لايحرمني منها
المهم ماحسيت بشي من بعد طلوع الراس و طلعوا المشيمه و خيطتني و ماصحيت إلا 12 الظهر يالله حسيت إني كنت بحلم و صحيت منه و طلبت السستر تجيب الجوال و دقيت على زوجي قال الحمدلله على سلامتك و أنا بصلي صلاة الجمعه لأن الدكتوره الرهيبه قالت يا ولدي روح صلي زوجتك أقل شي بتنام ساعتين و أنا صحيت قبل الساعتين المهم دقيت على أمي و يافرحتها لما كلمتها كانت مررره مبسوطه
المهم طلعوني من غرفة الولاده لغرفتي الخاصه و جابوا لي أكل و القمـر حقتي
ياربي أحفظها لي لما شفتها مدري وش صار فيني شعـور لا يوصف فرررررررررررررحه الله لايحرمكم منها يالغاليـات
و الله الولاده مو صعبه زي مانتصـور هي ساعات تعب و تنتهي بشيء جميل و الله يا شوفة بنتي الحين و هي جنبي تسووووووووووى كل التعب اللي تعبته