حياتى جحيم

[معاناة الزواج]

شكرا ليكم جميعا على نصائحكم ليا ، بس أنا مش عارفة إنتم إزاى نساء و مش حاسين بيا ، أنا زوجى طعنى بخنجر من ظهرى و راح حب واحدة تانية عليا ، مش قادرة أكون بين أحضانه و هو بيفكر فى واحدة تانية و متخيلنى إنسانة تانية ، أقبلها إزاى عاى كرامتى ، لو قبلتها زمان و كنت بمثل / دلوقتى لأ مش همثل ، مش قادرة يا جماعة ، كل ما أفتكر إنه حب واحدة تانية غيرى أنهار ، تخيلوا إمبارح بقولله إحلف بالطلاق تلاتة إنك مش بتحب واحدة تانية عليا ، قال عليا الطلاق بالتلاتة ما بحب واحدة تانية غيرك ، و بعد كدة قعد يستغفر ربنا ، بقولله إنت كدة طلقتنى صح ؟؟ ، إنت حلفت كدب صح ؟؟ ، قاللى لأ ، بس أنا بستغفر ربنا لأنى مش بحب أحلف بالطلاق ، اللى خلاكى تقوليلى الكلمة دى هو الشيطان ، الله يسامحك ليه بس خليتينا نوصل لكدة و سابنى و مشى ، و ساعتها إتأكدت إنه بيكذب ، لأنه لو كان صادق كان حلف و مقعدش يستغفر ، و لما رجع بقولله إنت كدة طلقتنى ، قاللى لأ طبعا ، أنا بس إتضايقت من حلفان الطلاق ، أنا مش بحب أجيب سيرة الطلاق على لسانى أصلا ، مش عارفة ليه كل ما أحاول أصفى له ، ألاقيه يعمل حاجة تخلينى أشيل منه أكتر ، تخيلوا راح جابلى هدية فى اللى بيسموه عيد الحب ، قولتله شكرا عليها ، قاللى طب مفيش أى كلمة حلوة ، قلتله لأ مفيش ، قام سابنى و مشى ، روحت له بقولله إنت زعلت قاللى لأ ، بس كان نفسى فى كلمة حلوة منك ، فبقولله بهزار مش هتسمعها أبدا و ضحكت ، لقيته قاللى أنا بكرهك ، تخيلوا قالهالى كدة بكرهك ، طب أعيش إزاى مع إنسان بيكرهنى ، عرفتوا بقى إنى مقهورة ,,,,, تحياتى ليكم جميعا