شلون عرفت اني حامل

[noona-4]

السلام عليكم ورحمة الله وبركاته

نزلت هالموضوع عشان كثيير لاحظتهم يبون يعرفون الفرق بين الدوره والحمل
وهذا الشي من تجربتي انا

ياطويلين العمر الشهر اللي فات من قبل الدوره بعشر ايام وانا تنزل معاي الكدره اللي قبل الدوره ( افرازات بنيه ) وكنت مره مستغربه اول مره بحياتي يصير لي كذا
بالعاده اذا نزلت يوم يومين وعلى طول تنزل الدوره
قلت اكيد اكيد حامل كل ماقريت بالنت يقولون من علامات الحمل
المهم وكنت اتحسس من صدري مره ونفسيتي تعبانه
والم بظهري وحتى افرازات اللعاب وانا نايمه زادت قلت اكيد اعراض حمل مره صدقت اني حامل
وحتى حللت قبل الدوره يمكن بـ 7 ايام من الحماس
وطلع سالب
وتفاجأت بالدوره نزلت لي قبل موعدها بأربع ايام
المهم قعدت اسولف مع مرت حماي قالت لي تدرين الاغلب اللي تتقدم عندهم الدوره فجأه الشهر اللي بعده يحملون
قلت لها لا مااتوقع مو شرط قالت لا انا سألت قالو لي عشان الجسم يتهيأ للحمل وكذا
المهم ماحطيت شي فبالي

لما جا هالشهر قبل موعد دورتي بأسبوع قمت أحس بحموضه شديده مره مره مره
انا فيني قولون من ثمان سنين ومتعوده على الحموضه وألم المعده وكذا
بس هذا غير
حموضه قويه ماطرى فبالي حمل
بعدها بيوم تقريباً قمت أحس بريقي مر
أي شي أشربه احس فيه مروره حتى الماي اذا شربته مر

وبعد قلت لا لا مو اعراض حمل كل اللي اقراه يقولون لوعه وكذا
انا ماحسيت ابد ابد ابد بلوعه وغيرها
حتى ألم ظهر ماحسيت
الا قبل الدوره بثلاث ايام يمكن كنت احس ان الدوره خلاص خلاص بتنزل
بس الالم اشد من ألم الدوره ألم فضيع

قبل موعد الدوره بيومين نزلت علي بني قلت اييوه خلاص دوره علامة دوره
استنى يوم يومين مانزلت صارت الافرازات تصير بيضا
حللت منزلي وطلع خط ثاني ماصدقت قلت لا اكيد مو حمل وقعدت استنى بعدها خمس ايام على انها بتنزل اقول لا اكيد متأخره
رحت بعدها بخمس ايام المستشفى وحللت دم وطلع حمل والحمد لله
ادعولي ان الله يسهل علي ويثبته

اللي ابيكم تعرفونه ان مو دايم اعراض الدوره تكون نفس اعراض الحمل اوقات ماتجيك أعراض الدوره الا بيومها وتطلعين حامل وهو يختلف من وحده للثانيه
بس الشي الوحيد اللي شفت انه صار معاي ومع اختي وكم وحده من بنات خالاتي
حموضة المعده تزيد .. المروره مو الكل يحس فيها بس المعده تكون حساسه بزياده

نصيحه لكل وحده تبي تحمل لاتخلين الحمل همك الاكبر فحياتك انسيه عيشي حياتك طبيعي
والله بيرزقك
انا عشان زوجي يبيني احمل الشهرين اللي فاتو مره كنت اشيل هم وكان يزعل اذا جاتني الدوره مع اننا تو مالنا الا ست شهور من تزوجنا
بس كنت استخدم مانع اول ثلاث شهور

الله يرزق كل محرومه يارب ويعطيها من خيره
ولا يرد طلبتها يارب

أدعولي ان الله يسهل علي ويثبته