تجمع حبيباتي الكروشات اللي راح يولدون بشعبان

[na3ooma]

هلا نونيييي كيفك حبيبتي اليوم

يلا نبدأ شغلات ولوازم النوم
1- سرير دائم للبيبي
وطبعا اهم شي السرير لانه هو دا المكان اللي لازم يتعود ينام فيه وراح يعرف انه مصدر راحته وهدوءه ان شاء الله . واذا اتعود باذن الله ماراح تتعبي كتير في نومه لو كنتي منظمة
اما لو كل يوم في مكان فالله يعينك على تعبك .
وطبعا نستثني البيبي المولود اللي اقل من شهر ..هدا ينام في الحضن ويتدلع كمان
وابوه ينام بره ههههههههههههه

طبعا السرير الدائم اللي هو الكبير اللي يستمر معاه من الولادة الى 3 سنوات مثلا
ولازم يكون خشب اصلي .. وترى الاسعار مناسبة ..
ايكيا الاسرة فيها خشب ممتاز واصلي واسعارهم من 300 وفوق وشكلها تقليدي زي دا

وراح تلقوا زيه عند اي مكان صناعات وطني بس نصيحه لاتشتروه من اسواق زي طيبة والعويس ومحمود سعيد لانه الوطني للاسف مايكمل 6 اشهر الا وهو فجأة هزاز ومخلع ..
ومافرقت لانه سعره 200 عندهم او 300 ...فندفعها في شي عليه ضمان احسن.

وسنتر بوينت فيها اسرة كمان بس على اغلى شوية تقريبا من 1000 الى 3000وبرضو خشبها حلو وتتحمل وتكون اكبر شوية في حجمها وسماكة الخشب زي دا

وعندكم كمان بيبيز ار اص بيجيب اسرة امريكية وموجودة في امازون
وعجبتني شخصيا لانه فيها مميزات زي الادراج والارفف
زي دي الاسرة






وانا لقيت زي هذا من نفس الشركة وسعره 1200 تقريبا ..

2- مراتب السرير
لو ماحبيتوا تشتروا الاسرة من دي الاماكن فالافضل على الاقل تكون المراتب منها
علشان مرتبة الرضيع مصممه بطريقة تلائم وضع ظهره وعظامه ودرجة حرارة مناسبة لجسمه ومكونة من خامات صحية .

3- دولاب او ادراج
اذا مااشتريتوا سرير يشمل ادراج ممكن تشتروا زي دي الادراج


تكون من فوق مكان لتغيير الملابس والحفاض ومن تحت ادراج
او زي دي من ايكيا


والاثنين اسعارهم ابتداء من 300 ريال ...وممكن اذا مو حابين دولاب او ادراج
ممكن تفضوا جزء من دولابكم او دولاب واحد من الاطفال ويتخصص للنونو وتكون طاولة التغيير ملحقة بالبانيو زي ما حأعرض لكم بالجزء الجاي.


4- مفرش السرير
ويكون بالعادة طقم مكون من لحاف ومفرش سرير ومخده صغيييرة ومفرش لحواف السرير علشان لما البيبي يتحرك راسه ماتضرب بالحافة وكمان مفيد يبعد عنه اي ضوء مباشر علشان يرتاح ,,والاطقم احيانا تشمل ستارة وحركات ..اختاروا اللي يناسبكم .



5- ناموسية
يفضل اذا في منطقة ناموسها كثير زي جده يكون عندكم ناموسية ولها احجام واشكال كتير وسعرها مرره مناسب وموجودة في ايكيا وسنتربوينت ومذركير



6- دعامات نوم للاطفال

هذي طبعا كماليات اذا حابة يكون عندك وحده لو النونو نايم جنبك على السرير او الكنبة
وبرضو موجوده عندنا باشكال مو كتير يادوووب كم شكل




7- الاسرة الهزازة
ودي برضو ممكن تكون ضمن الاشياء اللي مو اساسية مره لانه ماتححمل اكثر من 8 اشهر لعمر البيبي زي دي

دا يدوي وسعره قريب 200 ريال
وممكن تجيبوه بالبطارية زي اللي موجوده في سنتربوينت وهدي اسعارها تبدا من 500 ريال وفوق


وفيه شوية كماليات راح نخلي لها جزء لحالها ...
وبرضو لو فيه شي ناسيته او حابين تضيفوه الموضوع موضوعكم .

وشوي ان شاء الله نروح لجزء الحمام ومستلزماته