زوجي هاجرني بدون سبب ساعدوني يا خواتي

[سمار]

أقول حبيبتي تعرفين وش يبيلك؟ يبيلك فترة نقاهه وأستجمام شيلي حالك والأغراض الضروريه وروحي سافري أنتي وأي أحد من أخوانك أو أخواتك وغيري جو وأنسي كل شي حتى زوجك أنسيه حكاية اللبس والحركات أنه يدخل كأنك مو منتبهه والله حتى الرجال فقسوها صاروا يتريقون علينا فيها وحكاية أصبري وماأدري وشو صحتك اللي بتروح مع الكبت والإستمرار تحت هالضغوط وعلى وشو هما الرجال لو تعبوا شوي معانا وش يسوون يروح الواحد على طول يجيب عروس جديده ولا يهتم فينا وبحالتنا صدقيني التطنيش ونسيان هالضغوط ومسبباتها أقصد الرجال هو أحسن حل والله وأبوي وأخوي قالوها أغلبية الرجال مايبون اللي تحسسهم بأنها راح تموت لو فارقتهم لأنهم يستغلون هالشي لمصلحتهم ويذلونها فيه يعني ( عزّ نفسك تجدها )
ومكن لو فقدك شوي راح يشتاق مو على طول وراه حتى لو بعيده عنه أتصالات ورسايل كأنك ضله لا روحي وخليه يجرب يعتمد على نفسه في أناه يقوم لوحده ويسوي كل شي لوحده صدقيني ماراح يقدر يتحمل هالشي وإذا مأثر فيه أي شي خلاص شوفي الحل اللي يريحك حتى لو كان الإنفصال هو الحل فيمكن هو الأفضل لك وله بدل ماتعيشوا وكأنكم مغصوبين على بعض ويمكن ربي كاتب لك الذريه من غيره ماتدرين لايروح عمرك وصحتك وأنتي جالسه تتفرجين لأنك بالنهايه راح تلاقين نفسك جالسه لوحدك مامعك أحد
الله يوفقك للي فيه الخير لك يارب