كيف التعامل مع هالنوعيه

[ياحبيبي يالله]

السلام عليكم
مو عارفه من وين ابدأ لكن مشكلتي صغيره بس انها تنرفز اخت زوجي الكبيره دقيقه جدا يعني وانا جالسه معها كانها حاطه ميكرسكوب تدقق بالكلام بالحركات بالنظافه بكل شيء لدرجه جدا مزعجه وتضايق
قلت يالله حرمه كبيره معليش استحملها واطنش ولجل عين تكرم الف عين علشان زوجي
المهم امس كانو عندي هي وبنتها يشهد الله ان بنتها اعدها مثل صديقتي وبيني وبينها كل شيء زين والامور طيبه لكن بعض الاوقات تطلع عن النص هي اكبر مني ب4 او 5 سنوات ولسى ماتزوجت وانا الحمد لله عندي 3 والرابع بالطريق المهم بعض الاحيان تقلب علي وتعلق على شكلي او تحاول ترمي علي كلمه
امس نامو عندي وانا والله كنت تعبانه مثل منتو عارفين هذا شهري والتقلصات ذابحتني ووجهي يطلع الوان والقومه والقعده ثقيله المهم زارونا وقالو بينامون فجأه حتى اني ماجهزت لهم مكان وفرش
المهم زوجي قال بشتري غدا من برا لاتطبخين قلت يالله راحه المهم جاب الغداء وحطيناه وهي وامها بالمطبخ مدري وش يسوون قلت يالله تفضلو على الغداء زوجي ينتظركم علشان ياكل قالت بنتها بنبره حاده اللي يشوفك تعزمين يقول انتي اللي طابخه
يعني مدري وش تبي بهالكلمه انا بصراحه فسرتها غيييييره والا وش حدها على هالكلمه يعني حاسديني علشان زوجي اشترى من برا سبحان الله
والمشكله اذا رحنا لهم مو كل يوم يطبخون بعض الاوقات نكتفي بفطور بدون غداء او يشترون من برا
يعني حلال عليهم وحرام على غيرهم
ومره قالت لي ان زوجك اقرب لي منك قلت لها كيف قالت هو خالي قبل تتزوجينه
يعني كلام اطفال وغير كذا تلبس عند زوجي بجايم واذا عرفت انه جاي تتعطر قبل تسلم عليه وحركات مبهمه
لاتفتكرون اني اغار منها لاوالله انا احن عليها احس حركات مو طبيعيه
حتى مره قلت لها عن كلامها معي قال اصلا وحده بمثل عمرها وماتزوجت وش تتوقعين منها طنشيها وبس
وامها دايم تتعمد تمدح الحريم قدام زوجي وتوصفهم بدقه لدرجه محرجه وقذره
وتتهمني اني مااهتم باخوها وانه باين عليه التعب والارهاق واني ماانصحه يترك الدخان ويشهد الله كم مره حاولت معه وهو رافض
مع العلم انه يشرب قبل اتزوجه يعني انا مالي يد بشربه للدخان دايم تقول مافيكي خير
ماتساعدين زوجك يترك الدخان ونرفزتني قلت انتي اخته ساعديه اشوف
تكفون كيف اتعامل مع النوعيه انا ماابي اخسرهم مهما كان اهل زوجي وعيالي وبنفس الوقت تعز علي نفسي مااحب احد يقلل من قدري لاي سبب