أبي احمل وخااايفة ورايي متناقض ساعدوني

[أنوار الولاية]

السلام عليكم

اخواتي .. طبعاً البعض يعرف شو الي صار لي ,

حملت ثلاث مرات واجهضت وكانت اول الاشهر ..

وبعدها المرة الرابعة حملت وتوفت ببطني في اخر الشهر الثامن .. شي ماتوقعته يصير كلش الحمد لله رب العالمين الله العالم بالمصلحة ..

مو قادرة انسى بنتي ودايماً احلم انها ما ماتت وأنها بحضني لكن هالاحلام بتعب نفسيتي اكثر ..

حاليا ابي احمل حتى اخلص من هالحاله الي انا فيها تعبت من التفكير .. لكن في نفس الوقت احس برعب وخووف مع ان املي بالله كبير انه بيعوضني لكن بعدني خايفه


لا تقولوا لي اصبر انا عمري في الثلاثين وصار لي ثلاث سنين وانا حاول احمل لكن الله ماراد يتم الحمل ..

عندي اطفال ولاد الحمد لله لكن مو قادرة انسى بنتي وابي احمل حتى اطلع من جو الحزن الي انا فيه ..

دعوااتكم لي اخواتي الله يرزقني بالحمل السليم الميسر الخاااالي من أي رعب مافيني أي طاقة على الصدمات مره ثانية ,,

[Fatima 14]

أختي الله يعوضك ويرزقك بالذرية الصالحة
أولا أختي إرتاحي وريحي حالك لأن النفسية بتلعب دور كبير وإنت ماشاء الله عندك أولاد الله يحفضهم لك أختي أنت توكلي على الله والله ما راح يخيبك وكل ما داقت بك
وحزنت إستغفري ربي واقرأي قرآن وربنا معك
الله يرزقك ببنت تعوضك عن بنتك يا رب

[" ملاك "]

طيب كم صار لك من ولدتي ببنتك
اذا مرت فترة ست شهور واكثر عادي
والا اصبري اشوووي والله يعوضك عن بنتك الا توفت
ان شاء الله حوريه بالجنه
الله يعطيك كل ما تتمنيه

[لاجئة إلى الله]

حبيبتي الله يعوضك بأحلى توأم من الذرية الصالحة عاجلا غير آجل أنت وكل مشتاقة، نصيحة لله إستغفري إبتداء من اليوم إلى آخر نفس في حياتك، ربي يبارك في عمرك، هذا لو تريدين العيش بسلام بدون منغصات وابتلاءات، حيث قال تعالى: وما كان الله ليعذبهم وأنت فيهم وما كان الله معذبهم وهم يستغفرون. يعني إستغفري بنية دفع البلاء والعيش بسلام، كذلك القرآن يزرع الطمأنينة في القلب فاجعلي لك وردا يوميا يحقق لك التوازن النفسي ويمكنك قراءة الرقية الشرعية كي تزيلي مفعول العين والحسد التي تكون سبب في وفاة الجنين والعياذ بالله وحصني نفسك بالأذكار وإذا كتب الله لك الحمل حصني جنينك يوميا ولا تخبري أحدا عن حملك حتى تضعي المولود بقدرة الله، وألحي بالدعاء وأنت ساجدة في قيام الليل حتى يحقق الله لك كل آمالك، وأكثري من الذكر قال تعالى ألا بذكر الله تطمئن القلوب، كقول لا حول ولا قوة الا بالله، وكذلك لا إله إلا أنت سبحانك إني كنت من الظالمين، ولو تواضبي على الإستغفار يوميا ستشعرين بانشراح الصدر بإذن الله ولن يتسلل الخوف إلى قلبك أبدا واحتسبي أجر وفاة إبنتك وربي يجعلها شفيعة لك ولوالدها يوم القيامة، الله إذا أحب عبدا إبتلاه، وحاولي الحمل مرة أخرى وربي يرزقك الذرية الصالحة عاجلا غير آجل.

[حبيبةة امها]

ياروحي انتي احمدي الله ان عندك اولاد الحمدلله .. بعضهم ماعندهم وسنين وهم رحلة علاج .. وبالنسبه للاجهاض لازم تعرفين الاسباب .. و اما بنتك انا كنت متابعتك طول فترة حملك الله يعوضك يارب .. كان السبب واضح قدر الله وماشاء فعل ..الحمل الجاي تابعيه اول بأول وتداركي الاسباب .. و هدي نفسك و توكلي على الله و احملي .. مقدره خوفك وخاصه ان اكثر من مره طبيعي تخافين لكن خلي ايمانك بالله قوي وحتى لو حملتي و لاسمح الله صارله شي قولي عادي شفعاءءءءء لي و احملي بعد .. اختي كانت كل ماتحمل تجهض عالشهر الخامس مرات السادس صارت تقول مابي احمل واتعب عالفاضي لكن غيرنا لها هالنظره و حملت ببنت وجابتها وطارت فيها والكل فرح لكن قدر الله ان البنت تموت بعد شهر من ولادتها .. اختي تعقدت اكثر وكرررررهت الحمل وصارت تقول مابي احمل عالاقل قبل اجهض ماشوفهم بس الحين صرت اجيبهم واشوفهم ويموتون قدامي .. و ارتاحت فترة سنه يمكن ورجعت حملت والحين ماشاء الله عندها بنتين و ولد ومافيهم الا العافيه .. يعني انتي لاتيئسين ابد .. الله يرزقك ويعوضك ويحفظ لك اللي عندك

[أنوار الولاية]

مشكورين اخواتي ..

فاطمة .. الله يسمع منك ويرزقك الذية , على فكره ناوية اذا الله كتب لي حمل وجبت بنت اسميها فاطمة أو زهراء على اسم فاطمة الزهراء بنت الرسول .. مع ان خاطري في اسم زينب بس قالوا لي مايصير اسمي زينب ..

ملاك ... انا صار لي شهرين , ماقدر اصبر لاني ماعرف متى الله يكتب لي الحمل ..

لاجئة الى الله , مشكورة حبيبتي , انا وان تضايقت ونفسيتي تعبت لكن دايما اقول الحمد لله الله هو العالم بمصلحتنا وهو رايد تكون لنا ذخر للآخرة انا وابواها والله يصبرنا ويصبر كل فاقده ..

انا الحمد لله مداومه على الاستغفار والتعويذات والله يكفينا شر العين والحسد هي الي تسببت لبنتي ..

*************

حبيبة امها .. يا حبيبتي لو انتي قدامي فغصتج ههه الله يهديج ما اقدر اسمع قصص من هالقبيل ابي شي يخليني اتفائل مو يزيد حالتي , ينطق عليج المثل الي يقول ( بتكحلها عمتها ) هههه

واختج ليش توفت بنتها بعد الولاده ؟

انا دايما اقول الحمد لله انها تموت في بطني ولا اولدها وشوفها تتحرك وبعدين افقدها ..

الله يتمم حملج على خييير يارب وتكون ولاده سهله ومولود مبارك .. ادعي لي وقت ولادتج اذا تذكرتي ههه

[حبيبةة امها]

هههههههههه انا مابي اكحلها بس هذا الصدق لو اختي مثل تفكيرك كان للحين هي جالسه وماحملت من خوفها بس لانها توكلت على الله وقالت احمل واجرب بعد .. الحين بنتها بالمدرسه و اللي اصغر كنهم توأم حملت ورى بعض .. يعني ليش التشاؤم والخوف دامك قادره تحملين .. بس مثل ماقلت لك اهم شي الاسباب يعني مثلا >> الحين اعميها صدق .. المهم مثلا المويه كانت زايده لازم تتابعين عند دكتوره شاطره تعلمك ايش ممكن تسوين بهالحاله حتى لو ولاده مبكره المهم ينقذون البيبي .. مثلا كانت ناقصه نفس الشي لازم تتابعين اول بأول وتتصدقين وتدعين الله كثيرررر .. وبالنسبه للاجهاض لازم تعرفين السبب .. الله يعوضك بتوأم بنات يارب ولاتزعلين من كلامي ترى انا دفشه مرات هههههه

[أنوار الولاية]

المشاركة الأصلية كتبت بواسطة حبيبةة امها

هههههههههه انا مابي اكحلها بس هذا الصدق لو اختي مثل تفكيرك كان للحين هي جالسه وماحملت من خوفها بس لانها توكلت على الله وقالت احمل واجرب بعد .. الحين بنتها بالمدرسه و اللي اصغر كنهم توأم حملت ورى بعض .. يعني ليش التشاؤم والخوف دامك قادره تحملين .. بس مثل ماقلت لك اهم شي الاسباب يعني مثلا >> الحين اعميها صدق .. المهم مثلا المويه كانت زايده لازم تتابعين عند دكتوره شاطره تعلمك ايش ممكن تسوين بهالحاله حتى لو ولاده مبكره المهم ينقذون البيبي .. مثلا كانت ناقصه نفس الشي لازم تتابعين اول بأول وتتصدقين وتدعين الله كثيرررر .. وبالنسبه للاجهاض لازم تعرفين السبب .. الله يعوضك بتوأم بنات يارب ولاتزعلين من كلامي ترى انا دفشه مرات هههههه

ان مو متشائمة لكن طبيعي اخاف يتكرر الشي لا سمح الله ..

على فكرة انا كنت اتابع مع الدكاترة الي مافادوني بشي كم دكتورة يقولون ليي عادي الماي زايد وما يأثر , ويوم طلبت تحليل سكر قالت لي دكتورة الي في الخاص ماليه داعي تسوينه عدنا لأن بتابعين في الحكومي فبعيدون التحليل

ويوم رحت الحكومي ما طلبو مني التحليل بس سألوني اذا في عندنا سكري في عايلتنا او لا

بالعربي تعقدت من الدكاترة وماعرف لين حملت اتابع عند من

يبي ليي من الحين اسأل عن دكتورة ممتازة في ابوظبي والله ايسر يارب ..

وتحاليلي كلها سليمة لا تجلط ولا الغده يعني مافي سبب واضح .. بالعربي اذا مافي سبب يعني عين ماصلت على النبي

على فكرة من خلال مشاركتج مبين عليج رقيقه مو دفشه هههه

[حبيبةة امها]

صحيح العين حق .. ومن تحملين ارسسي لك على بر يعني تابعي يا اما حكومي على طول او خاص واختاري دكتوره شاطره حيل .. الحمدلله طمنتيني ان التحاليل سليمه وبالنسبة لزيادة الماي لاتتابعين عند نفس الدكتوره لان واضح انها ماتفهم .. انا مره دكتوره مصريه مدري وش خلاني ادخل عندها وطلبت مني تحاليل لأن اعاني من التهابات وجاني الم بظهري وكليتي ورحت لها وسوت تحاليل قالت امورك تمام قلت طيب علاج شي قالت مايحتاج تحاليلك سليمه .. رحت لزوجي بشرته ورجعنا للبيت و الوجع مثل ما هو ثاني يوم زوجي راح للمستشفى للمختبر وطلب منهم النتيجه وعطوه وجاني معصب قال شوفي تحاليلك كلها + + + + + + + + + وحجز لي عند وحده ثانيه ورحت لها قالت مين قالك سليمه انتي عندك التهابات شديييييدة و املاح وفطريات وصديد وسكر و والخ لو ماعالجتي راح تخسرين الجنين .. وقتها جلست اسب بالدكتوره هذيك و ادعي عليها ... يعني لو صدقتها وجلست ع كلامها و لو زوجي ماكان اذكى مني وراح شاف النتيجه .. كان لاسمح الله اجهضت من زمان بس الحمدلله .. يعني لاتثقين بكلام أي دكتوره وبالنسبه للتشاؤم قلتلك مالومك تخافين لكن خلي ايمانك بالله قوي وهالشي انا لاحظته فيك ان ماشاء الله ايمانك قوي الله يزيدك .. اسفه طولتها عليك

[υм вtℓαα]

خيتي كلنا عانينا مثلك بس مالازم نستسلم ونعيد التجربه لاكن بعدها بفتره
وانا جبت ولدي ومافيه الاالعافيه بس توفى بعد الولاده بثلاث ايام وكنت حاسه انه ماراح يعيش لاني شفته بالمنام
زي الدجاجه امعفنه لونها اصفر وحجمها صغير
وخبروني انه ماراح يعيش وقلت وش اسوي ربي عطاني اياه هو اولى فيه وانا ماراح اعترض ع قدر ربي

ماخبي عليك بكيت عليه لين جفت دموعي واني ماشفته قالو عشان لاتتعذبين زياده
وجاني اكتئاب وقلت ماعاد ابي احمل كلش وخليتها ع ربك وحملت قبل لااسوي عمليه المراره ولااكتشفت الحمل الا بعد العمليه بشهرين لكن لم يكتمل والحمدالله ع كل حال

الله يعوضنا يارب خير ويرزقنا الذريه الصالحه