قصتي مع اطفال الانابيب

[موووناا]

السلام عليكم بنات

انا عضوة يديدة وحبيت اشاركم قصتي وانتو تشاركوني بقصتكم و منها نسولف و نتعرف على بعض

والله يكتبلكم الحمال ويثبت اجنتكم واجنتي و مصير امهات قريبا

انا عمري 24 .. تزوجت من سنتين
في البداية ما كنت حاطه في بالي حمال كلش وكنا نسوي مانع طبيعي ما خذيت حبوب ولا شي
تقريبا اول 6 شهور

وبما اني احب اليهال و زوجي يحبهم قررنا نخلي الامور طبيعية و متى ما الله كتب راح احمل

مرت السنه الاولى و دخلنا بالسنه الثانية و ماصار حمل

قررنا نفحص و رحنا فصحنا انا سليمة 100% فحصت كل شي حتى اشعه الصبغه و الحمدلله كل شي طبيعي

لمن زوجي فحص طلع عدد الحيوانات قليلة اقل من الطبيعي

عاد التحليل مرة و مرتين و ثلاث ينزل ز يصعد بس اقل من الطبيعي

حاولنا بالاعشاب و العسل ماكو فايدة

رحت حق دكتورة استشارية و عطتني حبوب و تابعت التبويض بالسونار و الله ما كتب

رحت حق دكتورة غيرها و قالو ان زوجي فيه الدوالي و يمكن تكون ماثرة و كنا ما بين انه يسوي ولا ما يسوي العملية و قررنا ان ما يسوي لان رحنا اكثر من دكتور و قال ان الدوالي مو درجتها قوية و ان العملية ممكن نتايجها تكون عكسية

المهم الدكتورة الثانية نصحتنا بطفل الانابيب و حولتنا على دكتور مختص بطفل الانابيب

قررنا نروح نشوف الدكتور و نسمع رايه و وبعدها نشوف نسوي ولا لا





رحنا حق الدكتور و قعدنا معاه و ماشاءالله من الدكاترة اللي تقعدين معاهم و تحسين بالطمانينة انا ارتحت له وايد وهذا الدكتور يديد فكل ما اسال احد عنه محد يعرفه

المهم توكلت على الله و قررنا نسوي طبعا لمن فحصت عند الدكتورتين اللي قبل رحمي نظيف و مافيه شي

..

لمن فحصت عند الدكتور ولا القى فيه تكيسات و غالبا من الحبوب اللي كانت معطتني ااهم الدكتورة (اول وحده )

قالي هذا الشي زين حق العملية و قررنا نسوي البرنامج القصير اللي يبتدي من ثاني يوم دورة


احس الكوضوع صار طويل و مللكم

اكمل؟

ولا نسمع قصصكم بعدين اكمل قصتي؟

[Um sara1]

كملي تونا نقول بسم الله هههههه

[موووناا]

لاني لكتب من موبايل احسه طويل هههههه


المهم اكمل يا طويلين العمر

الدكتور سوالي تحليل حق كل شي يمكن 13 تحليل (غدة هرمون حليب مخزون البويضات .. الخ )

سوالي فحص داخلي و شاف الرحم و مثل ما ذكرت قالي عندج تكبسات لس هالسي زين حق العمليو و فالي تعالي ثاني يوم دورة نبتدي



يت الدورة و رحتله ثاني يوم سوالي فحص داخلي و شاف و عطاني ابرة لمدة 4 ايام تحت الجلد

وظيفة الابرة ان ما تخلي البويضات تكبر لا مثل ما قلت عندي تكيسات اللي اهي بويضات صغار فالدكتور يبيهم كلهم يكبرون مرة وحده عشان الحجم لا يختلف بويضة صغيرة و بويضة كبيرة

خلصت الاربع ايام و رحنا الموعد اللي وراه

نفس الشي فحص داخلي

وزاد الابر صارو ابرتين منشطة وابرة هرمون لمدة 3 ايام

خلصت ال3 ايام

رحنا الموعد الثالث سوا تحليل دم يشوف نسبة الهرمون و نفس الشي فحص داخلي و ابر وقال تعالي بعد يومين

رحت لموهد الرابع سوا تحلبل دم للهرمون و فحص داخلي و حدد موعد لسحب البويضات و قالي الابرة التفجيرية تاخذبنها يوم الاربعا الفجر و الخميس الساعه 5 موعد السحب

ولازم اكون صايمة

رحت يوم الخميس ودخلوني غرفه العمليات و فصخت ملابسي و لبست لبسهم وحطولي درب مغذي على ما انطر دوري .. بعدها دخلوني الغرفه و شفت دكتور التخدير سالني جم سؤال و حجولب كمام بعدها ما حسيت بنفسي الا السيستر تناديني مونا مونا

فتحت عيني حسيت بعوار قوي قوي على جنبي اليمين جان ابجي ابجي السيستر اخترعت قالت شفيج ليش تبجي قلتلها حاسه بعوار جان تقول حاطينلج مسكن الم .. اتصلت عالدكتور قالها زيدولها لجرعه .. 5 دقايق ولا يروح العوار يابولي عصير و بسكوت اكله و قعدت يمكن ساعه الا ربع و حبيبي زوجي كان ناطرني بعدها يتلي الممرضه و لا ماسكه كيس ادوية كبير و لا تشرحلي الادوية واللي اهم عبارة عن

حبوب فولك اسيد
حبوب اسبرين
حبوب هرمونات اتوقع
وفي حبوب مادري شنو ههه
و تحاميل تثبيت
وابر سيوله

و قالتلي كل واحد و متى اخذه و قالت ابتدي فيهم من باجر الا التحاميل من اليوم لمن تردين

طبعا انا فيني تكسر بالدم و حبوب الاسبرين من الادوية الممنوعه علي فلمن ردييت البيت اليوم اللي وراه و صحصحت و استوعبت كلمت الدكتور و قلتله انا فيني تكسر g6pd و الاسبرين ممنوع اني اخذه







رده كان مصيبة


تدرون شنو قالي؟








انا ما كنت ادري ان فيج تكسر! ليش ما قلتيلي ؟ كل حاله لها طريقه غير .. و انتي زوجج حامل لنفس المرض و في احتمال ان الاجنه تكون مشوهه و عصب علي و زفني و سكره وقبل لا يسكره قال انا بشوف شنو راخ اسوي!



طبعا ما تتخيلون شنو ردة فعلي شنو يعني الاجنة مشوهه! خلاص! راح التعب !



طبعا انا ما قلت للدكتور لان الممرضه اللي كتبت ملفي و خذت وزني و طولي كاتبة ان فيني تكسر و معطتها كل المعلومات موجودة بالملف .. بس الظاهر ما كلف على نفسه يقرا الدكتور


هذا الموقف الوحيد اللي كرهني فيه ولا اهوا وايد زين الحق ينقال و فاهم و عارف بس مادري شلةن طافت عليه


المهم الدكتور طول ما رد علي و انا حالتي حاله بس ابجييي و المشكله محد يدري اني مسوية عملية ماقدر اشكي ومابي اخرع احد و مسوية روحي قوية جدام زوجي و من وراه بجيييي

[موووناا]

احس جني اسولف مع نفسي محد يسمعني

في احد اكمل ؟ ترا قصتي قصه هههههه

[تمنيتك بأحلامي]

ياعمري
ربي يبرد قلبك يرزقك بالذرية الصالحة
احس لازم عملية الانابيب يصير شي يكدر الوحدة فوق الكدر اللي عندها
انا كان عندي التبويض ضعيف وحتى مع المنشطات مو راضي يرتفع الهرمون
مريت بااحوال ونفسية جدا سيئة وماغير كل اصييييييييييييييح
وكنت ماغير اشكي لخواتي لان هم الوحيدين اللي علمتهم بالعملية وماقلت لاحد غيرهم
بس الحمد لله مابعد الصبر الا الفرج واذا فكرتي فيها تقولين الحمد لله الله اذا احب عبدا ابتلاه
وهالبلاء الله اختارك من هالخلق كله علشان يمتحن صبرك به ولأنه يحب يسمع صوتك ومناجاتك له
انا قبل احمل كنت فجأة افرح وأقول لزوجي شوف الله يحبنا وبلانا بتأخر الحمل واظل طول الليل اناجي ربي

كملي حبيبتي عسى نهاية قصتك دموع فرح ونفرح معاك يارب

[موووناا]

تمنيتك باحلامي

اي والله حبيبتي صج الحمدلله دائما و ابدا على كل شي
والحمدلله كل شي خيرة من الله سواء الله كتب حمل او لم يكتب هالفترة

واذا كنتي حامل الله يثبتهم و يقر عينج بشوفتهم
واذا كنتي والد فالحمدلله عالسلامه هههه


مشكورة حبيبتي مشاركتج و كلامج وايد اسعدني

[موووناا]

اكملكم يا طويلين العمر

المهم نطرت الدكتور بعد ساعة ساعتين ثلاث

ولا يدق علي ويقول خلاص ان شالله ماكو الا العافية كملي على ادويتج

قلتله شلةن تقزلي اجنه مشوهه والحين تقول ماكو الا العافية!

جان يقول لا انا عبالي نوع ثاني من التكسر بس اللي فيج بسيط ان شاء الله و ما ياثر!

قلت الحمدلله بس شلون عالادوية! انا متاكدة ما ينفع لي قال اخذيهم و المدة قصيرة اسبوعين و ان شاء الله نا ياثر .. الصارحه ما كنت مقتنعه لان شي ادري بضرني بس قلت الدكتور اخبر و ان شاء الله ماكو شي اسبوعين و يعدون و الله الحافظ

.

بعد يومين اتصل الدكتور و قال ترجيع الاجنه يوم الاحد الساعه 1 تكونون موجودين

صار يوم الاحد من الساعه 12 ونص انا هناك

صارت 1 صارت 2 صارت 3 محد ناداني ... كلمت اللي بالرسبشن جان تقول الدكتور ما وصل!

بعد نص ساعه وصل الدكتور و قالتلي لازم مثانتج تكون متروسه شربي ماي و من الساعه 12 ز انا اشرب ماي و بعظ نص ساعه اروح الحمام .. كنت اشرب بضمير هههه


المهم ما اطول الساعه تقريبا 4 ونص دخلوني الغرفه .. قلتلها وين الدكتور ما كلمته ما قالي جم اجنه تلقحو و لا شي .. جان تقزل تقدرين تكلمينه داخل


المهم المثانه كانت متروسه و الممرضه ما خلتني اروح الحمام تقولي الحين بندخلج و انا اقولها لا بروح الحام بعظين دخليني .. تقول ما يصيير .. اقولها شلون ماقدر امسك نفسي صرت جني ياهل شوي و ابجي


دخلوني شفت الدكتور و قالي لقحنا 2 من و جمدنا 2 وانا كل همي اني بخلص بروح الحمام

دخلو الاجنه و خلصنا .. تميت ساعه منسدحه بعدين رديت البيت

مر اليوم الاول تقلصات بالبطن و احس عوار بالظهر و انا ملتزمه بالادوية

مر اليوم الثاني و الثالث و نفس الشي

طبعا انا كنت مريحه نفسي بس مو منسدحه طول اليوم لا لمشي بالشقه و اكل عادي بس كنت مكثرة ماي و حليب و بيض و خيار و تفاح و سفرجل هالاشياء كنت مركزة عسها و اكل اشياء ثانية عادي


اليوم الرابع زوجي سافر و انا رحت بيت ابوي نمت يومين على ما يرد


باليوم الخامس حسيت بعواااار بظهري حرارة و عوار اللي ابجي منه يمكن ساعتين بعدين خف

كلمت لدكتور قال طبيعي مال التحميلاا تسبب غازات و يتجمع بالظهر


اليوم السادس الفجر الساعه 5 انا نايمه بامان الله




ولا احس بشي حااار



اقوم






ولا





الفراش



كله دم


انا اخترعت شنو هذااااااا


قمت ولا ملابسي دم و ويهي دم و لا الدم من خشمي



بنات نزل دم من خشمي من قبل بس مو نفس هالمرة!



وايد ينزل و بسرعه و وااااااايد ما يوقف و اذا رفعت راسي احس بالدم في بلاعيمي


طبعا من الخرعه انا ابجي



نزلت عند ابوي قعدته من النوم و سوالي كمادات و رفع راسي و مادىي شنو اللي وقف بس انا اخترعت من الكميو اكثر من الدم نفسه حسيت دمي خلص ههه


كلما الدكتور ولا يقول هذا من الحبوب الاسبرين و ابر السيوله وقفيهم! ما انا كنت حاسه ان مو زييين و نفسيا مو مرتاحه وانا اخذهم بس قلت للدكتور اخبر



قلاله دكتور ما ياثر اذا وقفت! قال لا اهم التحاميل التزمي فيهم

[jojo 123456]

في انتظاار بااقي القصة عسى أخرتها فرحة

[موووناا]

الدكتور طمني التزمي بالادوية و ان شاء الله خير

و اولا واخيرا هالشي لا بايدي و لا بايد الدكتور .. بايد ربي اذا كاتب احمل راح احمل و انا مثلكم ناطرة النتيجة

انا حاليا تاسع يوم بعد ارجاع الاجنه باقيلي 5 ايام و ان شاء الله الله يكتبلي حمل و ثبات الاجنة

الصراحه من اول ما بديت وانا مطمانه لان موكله امري لرب العباد و عندي يقين ان اذا ربي كتبلي و حملت خيرة و اذا ما حملت اكيد خيرة و مو وقته

كل اللي بايدي ادعي و اقول يارب و ماخاب من قال يارب .. الحمدلله دائما و ابدا


..


والحين دوركم تقولون تجاربكم واستفساراتكم و قصصكم و اي شي .. ادورلي شي الهى فيه يخلي ال5 ايام تمر اسرع

والله يرزق كل من تتمنى و يحفظ كل من استودعت اجنتها


و شكرا لحسن القراءة طولتها و اهي قصيرة ادري هههه

[ملونه بألوان]

الله يكتبلك الذريه الصالحه...وتكوني حامل يارب ..
عليك بالصدقه ... وقراءة القرآن ..وخلي لسانك رطب بذكر الله دوماً