دردشة حوامل أهل الرياض - دردشة بنات الرياض - تجمع حوامل الرياض

[همسه الجوري]

واخيرا توكلت علئ الله وسويت سني

شلت العصب

ببنج وربي يستر


انا بالتاسع بس الالم ماخلني حتئ انوم بالليل

[العطوفه]

مراحب كروشات كيفكم مع الحمل؟؟؟
الله يقومكم بسلامه وترزق كل محرومه الذريه الصالحه
اختي اللي تعرف ارقام شغالات ياليت تساعديني لاني محتاجه
ام الاسمر بسالك عن الاكتياب بعد الولاده
وشاكره لكم

[ياسمين الربيع]

هلا ام الاسمر

مشكوره حبيبتي انك انتبهتيلي 00

ابشرك انا بخير الحمدلله 00

اليوم كان عندي موعد وقالتلي الدكتوره ان اطفالي وضعياتهم ماتسمح بالولاده الطبيعيه
لازم قيصري واحد مقعده تحت والثاني معترض

والله يكون بالعون 00

[ام فهوود]

بنااااااااات انا اليوم رحت للدكتوره
وشفت الجنين وسمعت
نبضه فديت نبضه وتوني داخله الثالث الله يثبته لي واشوفه يارب
لاني مليت من الوحده زوجي دايم مشغول واهل زوجي مارتاح
معهم لمن اروح لهم واهلي نفس الشي مادري ليش

[أمونه*]

راجيتن الله ...لا هذا كان زمان الحين البنات الله يسعدهم يردون إن شاء الله
وانا قدر الإمكان برد عليكم وجاوب ...
بس انا اقصد إننا نسأل وندردش ..انا اول ماافتح المنتدى ادخل دردشة حوامل ..اسأل عليكم واجاوب على الأسئله وبعدها انطلق لباقي الأقسام
وارجع كل شويه ...
المهم ماعليكي ..انت غاليه ووجودك معانا يسعدنا

[أمونه*]

ام ركوني...والله كلامك صدق كادي وزهور حبيبات وفيهم الخير..
وانا لاحظت إنهم مايقصرون ماشاء الله

بس انت غبتي كثير ودخل للمنتدى بنات جديده كثير ...ماسالتيهم ولا مره
يعني لسا ماجربتيهم ...عطيهم فرصه عشان تتعرفي

وانا تعرفيني من قبل ..ظلمتيني والله إني كنت اجاوبك كل ماعرفت الجواب
على كل الأحوال احنا بنوتات اليوم ..وحياك من جديد

[أمونه*]

همسة الجوري ...على البركه والحمد لله على سلامتك
فرحتلك ..هااا إن شاء الله ..هديت اخلاقك الفتره الماضيه وانت معصبه
وزعلانه ..الله لايلومك ألم الأسنان سيء ..الحين تفرغي بالتفكير بالولاده
تقومين بالسلامه.. الألم حق سنك يبغاله وقت الله يكون بالعون بس بروح


ياسمين ..افا ..انتبهتلك ؟؟!! انا احب فصل الربيع ماهو ممكن يدخل ولا انتبهله ..ماعليك يالغاليه

وش الكلام يلي تقوليه ..طيب المشي مايساعد وتصير اوضاعهم افضل ؟؟
الله يساعدك ياقلبي ماتعرفين تره امرهم عند الله يقولون الدكاتره شي
ويصير شي ثاني ...الله يسلمك من كل سوء ويسلم عيالك ..وتقومين بالسلامه ..آمييين لا تخلينا طمنينا عليك

ام فهود ...على البركه ..ماشاء الله ..لاتقولين ازين واحلى لحظه
في حملي الأول كان ولدي من الشهر السادس لين ولدته وهو جالس ياكل يده
حتى الدكتوره كانت تضحك وتقول ولدك بيجيك يطالب بالأكل وبيعذبك
بهذا الموضوع ...وفعلاً صار كذه ..بس لما اشوفه على كلامك سعاده والله مااقدر اقول كم كانت ...هذه سالفه بآنسك فيها عشان الوحده تروح من غير رجعه ..مافي وحده وانت معانا بإذن الله
الله يتمملك على خير وتشوفيه بين يديك ..آمييين

[أمونه*]

العطوفه ..شلونك وحشتينا ..ووجودك يسعدنا ..خليتك آخر شي عشان الكلام كثير ...انا في ولادتي الأولى جاني شعور خوف واحس بوحشه
مااحب انام انا وولدي لوحدنا بالغرفه وكنت كل الليل ابكي ..زوجي الله يسعده اخذ إجازه وصار كل الوقت يشيل البيبي ويساعدني وش اسوي
وماخلاني صار ينام في نفس الغرفه معايه مع إن ولدي كان يبدأ صياح الساعه 9 ويخلص الساعه 4 الفجر كنت انا اشيل شويه وزوجي يشيل شويه ..هذا الإكتئاب يلي جاني
الحين اجاوبك من الكتاب يلي تكلم عن الموضوع

في نوعين من الإكتئاب الأول : كآبة الطفل هذا يستمر إما ساعات واكثر شي اسبوع سببه شعورك بالفرح والخوف عشان البيبي الجديد

الإكتئاب الثاني : اكتئاب بعد الولاده
يصيب 10% من الحريم يستمر من اسبوع إلى اشهر ...
اسبابه تغير المفاجئ للهرمون وانخفاضها ، والتغير بحجم الدم وتغير ضغت الدم وجهاز المناعه ..هذا يصير بجسمك
بس في عوامل ثانيه محيطه فيك (انا برأي هذه الأسباب هي يلي تلعب دور اكبر)

الالم يلي يجي الحرمه بعد الولاده ..او المضاعفات
الولاده الغير مرضيه بسبب(دكتوره او المستشفى)
الطفل يلي يلي يحتاج عنايه زياده مثلاً(يبكي كثير ، مايعرف يرضع )
الإنهاك بسبب عنايتك بغير البيبي (بأخوانه )
القلق (ليش البيبي يبكي يمكن تعبان وش اسوي) يعني التفكير الزايد
الضغوط المنزليه
نقص الدعم الإجتماعي (نصيحه لا تنتظري الناس ، تعاوني انت وزوجك وبس)

علامات الإكتئاب
التعب الشديد
فقدان الشعور بالفرح
الشعور بخدر عاطفي او مشاعرمكبوته
نقص الإهتمام بالنفس او بالطفل
الأرق الشديد
شعور قوي بالإخفاق او النقص
المزاج المتقلب جداً

طيب شلون نساعد نفسنا عشان نرتاح ويروح الإكتئاب
احصلي على اكبر قدر من الراحه (نامي لما ينام البيبي)
كلي الفواكه والخضار
سوي رياضه الخاصه بعد الولاده (هذه ممتازه وعن تجربه )
ابقي بإتصال مع الأقارب والأصدقاء (يعني خليكي معانا)
اعتني بنفسك ، غيري ملابسك ، اخرجي برحله قصيره (روحي
حديقه قريبه مع دله لزوجك وقشر عشانك وشويه تمر..تنفسي هواء جديد وغيري جوك شويه وبعدها ارجعي للبيت)

إن شاء الله مايجيك ولا يجي اي وحده فيكم الإكتئاب وتقومون بالسلامه ونسمع اخباركم الطيبه وانتم بخير(وانا معاكم) آميين

[رحيل الشوق]

آلسلآم عليكم ورحمة الله ..
يسعد لي مسآئكم ..
كيف حآلكم .. وش آخباركم .. ؟!
الله يهون عليكم .. ويتمم حملكم .. ويرزقكم بالذريه الصآلحه السليمه ..

آخوآتي أتمنى تفيدوني .. أول حمل لي ..
أبي مصتوسف .. في حي السويدي بالرياض .. فيه دكتوره كويس ..
أتمنى تفيدوني .. جزآكم الله خير الجزآء ..

آنتظر ردودكم ..

[أمونه*]

هلا رحيل الشوق ...بالسويدي تحديداً ماادري
بس ارجعي للصفحتين يلي قبل تلقين جوابي عن دكاتره ومستوصفات زينيين ..وشوفيهم يمكن يعجبك شي ..غير ذول مااعرف
ويتمملك الله على خير ياقلبي ...