بسم الله الرحمن الرحيم
السلام عليكم ورحمة الله وبركاته
حبيت احكي قصتي مع تكيس المبايض وأعملها على عدة أجزاء حتى ما تملوا وانتوا عم تقرأوا.. ﻷني شفت كتير عم يتساءلوا عن قصة التكيس وشو علاجاتها...
أنا بالبداية بعد ما ولدت بنتي قيصرية عملت منع حمل طبيعي وما استخدمت أي أدوية والحمد لله.. ولما طبقت بنتي السنة قررت بطل المانع حتى يصير حمل.. وبعدين بقيت ثلاث شهور وما كان يصير حمل.. سافرت عالشام لعند أهلي قبل رمضان بشي اسبوعين ولما صار موعد دورتي نزل علي دم وهون كان صار رمضان.. ففطرت... أول يوم والتاني.. وبعدين ما عاد شفت لا دم ولا شي... أنا تفاجأت وسألت أمي.. فقالتلي يمكن عادي انت كنت مسافرة من يومين(مسافرة ضمن سورية) وتعبت ويمكن بسبب التعب.. وكملت صيام.. وما عاد شفت شي نهائيا..
لما رجعت عالسعوديةبعد شي أسبوع.. صرت شوف شوية مشحات .. فقلت لحالي يابنت حللي حمل.. وشوفي...
المهم حللت وطلع عندي حمل.. انا فرحت كتير وبنفس الوأت كنت خايفة من الدم والنزيف المستمر ولو انو مو كتير.. قلت لحالي يمكن بدي اطرح ﻷنو تعب السفر مو قليل.. وخاصة تعب نفسي بعد ما اترك أهلي..
وكلت أمري لله.. ورحت لعند الدكتورة.. سألتني إيمتى كانت آخر دورة عندي وحسبت أنو صرلي بالحمل 5 أسابيع.. قالتلي خلينا نصور ونشوف شو سبب النزف. صورت وقالتي الرحم فاضي بس عندك عالمبيض كتلة. ويمكن تكون حمل لسا مانزل... خلينا نستنى أسبوع ونشوف .. بس لازم ما تشتغلي شي أبدا ولا نزلة عالسوق ولا جماع خلال هالأسبوع..
أنا بهالأسبوع صار عندي وجع فظيع بجنبي اليمين تقريبا يغمى علي منو.. وهيك مارحت.. استنيت أسبوع متل ماقالتلي.. ولما رحت وعملت تصوير وقلتلها عالوجع.. قالتلي هاد حمل خارج الرحم.. وهو يلي عم يعملك الوجع.. ولما راحت عند الدكتور أخصائي الأشعة قلها في حمل وفي كتلة تانية.. ومن غباءهم(لاتواخذوني بهالكلمة) ما عرفوا شو هي.. قالت لازمني تحويل مباشرة عالمشفى...
أنا هون رجعلي الوجع واصفريت(يمكن من الرعبة مابعرف) أسعفوني بعد ما حولتني على مشفى اليمامة(ﻷنها حكومي مشان الفلوس بما إنو ما كان معنا تأمين) ولما وصلت لهنيك ما حدا طلع فيني.. قال الغرف كلها مليانة وأنا لح موت من الوجع.. وبما إني مو سعودية لازم ياخد وأت طويل بالمعاملات.. المهم أخذت أوراقي من عندهم وطلعت اتصلت بزوجي وعالمواساة....
هنيك قالولي لازم عملية مباشرة والدكتور الموجود ما بيعمل تنظير بيعمل متل القيصرية.. أنا خفت كتير وكان خف الوجع علي شوي.. المهم ارجعنا عالبيت على مسؤوليتنا.. وتاني يوم رحت عالحمادي .. هنيك نيموني وركبولي سيروم وكلو لسا ما صوروا شي... بس عم يعملولي تحليل هرمونات وتحاليل صورة دم.. وتحاليل تانية... رجعت الصبح عالبيت ورجعتلهم الضهر بعد ما جهزت حالي عأساس عملية.. وهنيك دخلت عدكتورة سورية.. طولت بالها وطلبت مني صور وتحاليل مرة تانية وأنا بعد ما عملت التحليل حسيت بشي عم ينزل مني.. دخلت الحمام(انتو أكبر قدر) ونزل مني دم كتير وقطعة متل اللحم..
عرفت انو نزل الحمل.. أول مرة بحياتي تخيلت اني افرح لما ينزل الحمل (تخيلوا الوضع..) دخلت عالدكتورة وقلتلها نزل.. قالتلي خطأ بالتشخيص والحمد لله عالسلامة.. خلص روحي عالبيت....!!!!!
انتظروني بالجزء القادم...
04-02-2010, 11:25 PM
قصتي مع التكيس عالمبيض.. بالشرح الممل.. 1
أم دجانة 
جديد منتدى منتدى أمراض الرحم
العرض العادي
