تجربتى مع المنشطات الافاده ....

[Nahla NoNNa]

السلام عليكم ورحمه الله وبركاته

ازيكم يا بنانيت ويا حوامل

حبيت احكيلكم تجربتى الجديده جدا للافاده

ومعلش استحملونى لانى ممكن اطول عليكم شويه

اولا انا متجوزه من 7 اشهر فقط
جوزى بيشتغل فى بلد غير مصر والمفروض انه كان هينزل يتمم الزواج ويقعد معايا فتره اجازته اللى هى شهرين ويسافر

من قبل الزواج وانا دورتى طبيعيه جدا والحمد والشكر لله كل 28 يوم
ومكنتش بشتكى من اى تعب او اى شئ

بعد الزواج وطبعا علشان ظروف جوزى انه مسافر وانى مش هبقى معاه كنت عايزه ربنا يكرمنى بحمل قبل ما يسافر

المهم اجازه جوزى كلها على بعضها شهرين وجاتلى الدوره فى الشهر الاول عادى جدا فى ميعادها وطبيعيه والم الدوره العادى جدا

طبعا ليه بقى الناس متلعبش فى عقلى وتزن عليا انى احمل

روحت رايحه للدكتور علشان اكشف واطمن (على اساس انى اتأخرت اصلا فى الحمل)هههههههههههه
كشفت وطلعت كويسه جدا والحمد لله ومفيش اى موانع
والدكتور طلب من جوزى تحاليل والحمد لله طلع كويس ومفيش اى موانع بردو
الدكتور لاقانا ملهوفين شويه على الحمل وعرف انى زوجى مسافر كمان شهر
راح سيادته كاتبلى على كلوميد اخده من 3 يوم للدوره

وكتبلى على اربع حقن منشطات اخدهم فى العشر ايام اللى فىهم الاباضه
هما اربع حقن بس كل اتنين مع بعض
يعنى اتنين فى اول العشر ايام واتنين بعدهم بخمس ايام

طبعا واحده زيى بقالى شهر متجوزه لا اعرف اى شئ عن اى شئ بالمره فعملت اللى الدكتور قال عليه بالحرف وروحت اشتريت الدوا وخدته كل فى مواعيده بالظظظظظظظظظظظظببببببببببببببببطططططططططط

واتفاجأ انى بموت من التعب وبطنى بتتقطع من اللام ورجلى مش قادره احركها وضهرى خلاص هيتقسم نصين تخيلو كل ده بيحصل لعروسه مكملتش شهرين
واستحملت علشان الحمل وقولت اى شئ مش مهم المهم انى ربنا يكرمنى
لما زاد عليا التعب روحت للدكتور
قالى مبروك انتى حامل وده قبل معاد الدوره بحوالى 10 ايام
فرحت جدااااااا وقولت اى تعب يهون قدام الفرحه دى

قبل معاد الدوره بيوم بقى كانت المفجأه الكبررررررى
انى الاقى الدوره نزلت وشكلها عجيب جدا وفى كتل بتنزل ومش دم سايل
جريت على الدكتور قالى للاسف الحمل نزل

طبعا مكنش فى اى وقت انى احاول تانى لان جوزى كان خلاص سافر
بدأت تحصلى حاجات غريبه يعنى الدوره تنزل قبل معادها
ممكن تيجى مرتين فى الشهر
كنت بحس بألم غريب فى المبايض
وقعدت على الحال ده حوالى 3 اشهر لحد ما جوزى رجع تانى من السفر فى شغل هنا فى مصر وكان هيتأخر شويه

ومن ساعه اول جماع وانا اسفه على الجرأه
وبدأت المضاعفات اولا سخونيه على طول والم الدوره دايما وصدرى دايما تعابنى وفيه الم غريب والم المبايض زاد
حاجات كتير اوى
دخلت على النت وعرفت ان علامات الحمل المبكره
ولاقيتهاغ تقريبا كلها عندى ففرحت وقولت حمل وهستنى ميعاد الدوره
واذا بها تيجى قبل ميعادها بحوالى اسبوع
قولت مش مشكله وقدر الله وما شاء فعل ومش زعلانه
وان شاء الله ربنا يكرمنى الشهر الجاى
استنيت الشهر اللى بعده وبدأت احس بكل الاعراض اللى قولتها فى الاول بس بزياده
قولت خير ممكن المره دى بقى يكون حمل
والاقى الدوره نزلت قبل الميعاد بيوم

طبعا كده كتير بقى فروحت للدكتور بس دكتور تانى غير اللى روحتله فى الاول

وبجد صدمنى صدمه ما بعدها صدمه

حكيتله فى الاول على اعراضى وفى نص الكلام عرفته موضوع الكلوميد والحقن المنشطه اللى خدتها كلها فى نفس واحد
لاقيت الدكتور مستغرب اوى وشكله فى حاجه عايز يقولها ومتردد
بعدها عملى سونار مهبلى طلعت سليمه والحمد لله

وفجأه لاقيته الدكتور بيقولى انى عندى خلل فى الهرمونات فظييييييييع جداااااااا وهو ده اللى مبوظ كل حاجه
وان الاعراض اللى بتجيلى دى كلها مش بتيجى الا فى حالتين
اما حمل او قبل سن اليأس بشويه صغيرين

وانى سليمه جدا ومكنتش محتاجه كل المنشطات والهبل اللى عملته فى نفسى خصوصا انى سنى صغير

وان الحمل اللى كان عندى و نزل كان بسبب كثره المنشطات اللى خدتها لانى كده شغلت المبايض اكتر من طاقتها فمكنش فى فى بطنى ورحمى اى استقرار علشان احافظ على الجنين وانه كان لازم ينزل

وانى صعب جدا يحصل حمل وانا هرموناتى ملخبطه اوى كده


يا بنااااااااات كويس انك تروحى لدكتور علشان تطمنى على نفسك انك سليمه
ومدام سليمه والحمد لله يبقى بلاش استعجال
ومحدش يعمل زيى

اسفه انا صدعتكم وطولت عليكم اوووووى بس بجد خوفت عليكم كأنكم اخواتى بالظبط

ربى يرزق كل مشتاقه بالذريه الصالحه
ويكمل لكل حامل حملها على خير
ويبارك لكل ام فى اولادها

[تاج راسه]

مشكورة حبيبتي على نصيحتك ويارب يفرحك انتي وزوجك بالحمل القريب عاجلا غير اجل

[Nahla NoNNa]

المشاركة الأصلية كتبت بواسطة تاج راسه

مشكورة حبيبتي على نصيحتك ويارب يفرحك انتي وزوجك بالحمل القريب عاجلا غير اجل

اللهم امين يا حبيبتى
ويارب يرزقك ويكرمك بكل ما تتمنى

[sherin]

شكراا يا اختي علي الموضوع
انا كمان متجوزة من سبع اشهر ولسه مفيش حمل وبتابع من دكتورة ويارب يكرمنا جميعاا بالحمل اليفرح قلوبنا

[زوجةرجل]

انا كمان متزوجه من 7 اشهر ومافي حمل ومارحت لااي مستشفى خااااايفه وتسلمي عالنصيحه

[روونة]

مشكوورة عالنصيحة حبيبتي وانا بعد متزوجة من 7 شهور وبتابع عند دكتورة وهالشهر اخدت كلوميد انا عندي خربطة هرمونات بسيطة جداً والله يرزقنا جميعاً الحمل