المرقوف,المطازيز,خبيزات بالزبده,العريكه من اشهر ماكولات فترة النفاس

[عزيزة النفس]

اكل نفاس,طعام نفاس,غذاء النفاس,اكلات النفاس









نبتدي مع المرقوق ~









المقادير مع الطريقه ~

اولا ناخذ حبة بصل متوسطه مقطعه ونحمسها مع شوي زيت وما احب اكثر البصل عشان تروكي ما يحب

البصل .نقلبه لين يتحمر ثم نحط ملعقة معجون طماطم ونحركه ثم نحط حبة طماطم متوسطه

وتكون حمراء ناضجه وما نكثر الطماطم عشان ما يسبب حموضه في المرقوق ونضيف اللحم والبهارات (

فلفل اسود ,كمون . بهار مشكل . عود قرفه . ليمون اسود للي يحبه ) ماجي وملح ونتركه يتسبك


ونحط بعدي الماء المغلي ونخليه لين يستوي نص استواء





نعجن العجينة قبل نبدأ بعمل المرقوق وتكون تقريبا

3كوب دقيق ( انا استخدم دقيق بر مع دقيق ابيض بنسبة 2 الى 1 ويكون مملح من عند المطحنه ودقيق المرقوق لازم يكون ناعم عشان ما يتقطع في الفرد لكن الخبز والعصيد ما يكون ناعم مره )

كاس ونصف او حسب الحاجه ماء دافئ

تعجن وتترك لمدة نص ساعه ثم تكور ..


ونقوم بتقطيع الخضار اللي متوفره عندك والافضل ( كوسا , جزر , قرع ,فاصوليا , فلفل رومي ) ونخليها على جنب ..







بعد ان يستوي اللحم نص استواء تقريبا بعد مرور 20 دقيقه نحط الخضار ونبدأ نرق العجين ونفرده زين ونحطه على الخضار في القدر ..






نفرد العجين بالدقيق فيه ناس لهم مذاهب في الرق ناس تستخدم الماء بعد تقطيعه صغار

وناس تفرده بالزيت اما انا فأستخدم الدقيق وارقه الى ان يكبر حجم الرقاقه وانقله على


يديني وابدأ اقلبه من يد الى الثانيه عشان ينفرد زين ونتخلص من الدقيق اللي فردنا فيه







بعد ما نحط الرقاقه ما نحط الثانيه عليها لين نشوفها تقريبا استوت وحتى لو غمرناها


بالمرق ما راح تتقطع وتتعجن وبعدين نحط اللي بعدها ..





بعد ما نخلص ويستوي المرقوق نغرفه في الصحن ونرش على وجهه سمن بري ومسمنه

واهجمو عليه ..









المطازيز ~







نفس مقادير وطريقة المرقوق لكن نستغني عن الخضار ونكثر اللحم شوي ويكون مقطع


صغير والعجينه تكون اقسى من عجينة المرقوق شوي ..



نبدأ نفرد العجينه ونقطعها بأي شئ دائري عندك انا احبها صغار مره واستخدم القمع






نطرح المطازيز بشكل متفرق عن بعض عشان ما تلتصق ونخليها تستوي زين..




تقدم بالف عافيه على قلوب الجميع ..






خبيزات بالزبدة

باقي العجين لمن يزيد من المرقوق والمطازيز ما نرميه نعجنه مره ثانيه ونخليه بالثلاجه لوقت


الحاجه وتقريبا يقعد يوم كامل وبعد كذا يبدا يسود العجين





ناخذ العجين ونكوره بحجم حبة الليمون الكبيره ونفرد كل حبة حتى تصبح بإرتفاع نص سم .





نجيب مقلاه تيفال ونحط فيها ملعقة زبده ونخليها تذوب وتسخن ونحط الخبزه عليها ونخليها


الى ان تستوي بعد كذا نقلبها ونخليها تستوي من الجهه الثانيه .






نضعها على مناديل او ورق نشاف ثم تقدم بعد ان ترش بالسكر ..













العريكه ~







العريكه هذه سويتها للغاليه مسموسه عسى ربي يرجعها لنا تنور شمواه ..


المقادير :~



2كاس من الدقيق المخلوط


رشة ملح


ماء بمقدار كاس ونصف الكاس او حسب نوعية الطحين اللي بتستخدمينه


الطريقه :~


ناخذ الدقيق ونصب عليه الماء بالتدريج ونعجن حتى نحصل على عجينه رخوه اثقل من عجينة اللقيمات بشوي ونحطه في صينيه تيفال






نغطيها بغطاء ونحطها على البوتجاز من فوق على نار هادئه او في الفرن لمدة 20 دقيق



تستوي العجينه دون ما تتحمر ثم نقلبها ونخليها على الوجه الثاني 5 دقايق ونطفي النار







ناخذها بسرعه ونحطها في كيس نايلون حق اللحم ونلفه بمنشفه عشان حرارته ونبدأ


نعجنها في البدايه بالنشابه نضربها ضرب خفيف وبعدين بمساعدة المنشفه نعجنها زين


حتى تصير كتله وحده.







ننقلها على صحن التقديم ونحاول بالملعقه نرتب اطرافها ونعمل فيها حفره نحط فيها


السمن والعسل






وتمتعي بالطعم امممممم.