والله وتحقق منايا وشوفوا أمنيه معايا ...ولدت والحمد لله

[أموره منوره]

السلام عليكم ورحمه الله وبركاته
كيفكم أخواتي
وحشتوني
الحمد لله ولدت وجبت بنوته زي القمر ماشاء الله الله يحميها ويحفظها لي يارب
سميتها أمنيه لانها كانت حلمي بعد 3 أولاد
الحمد لله وربي يحفظهم لي
كانت ولادتي الحمد لله طبيعيه كنت خايفه من القيصريه
ولدت يوم 18_3
كان باقي لي يومين واخلص التاسع وكانت لي مراجعه يوم 20 عشان اتنوم واسوي عمليه
بس الحمد لله اخذت في الليل كوب حليب مع جوزه الطيب
والصبح كوب قرفه مع العسل
وبدات معي شوي علامات وقمت غسلت ملابس اولادي للمدرسه وطبخت الغدا واخذت دوش دافي
وجلست انتظر زوجي يجي من الدوام
وطبعا شربت زمزم وتمر وبس امشي في البيت
لين الساعه 8 ليل حسيت المغص زاد رحت المستشفى قالت لسه دوبه 2 سم
روحي امشي واشربي قرفه وتعالي بعد ساعه
رحت شربت كوبين قرفه بالعسل وجلست امشي لين الساعه 11 ونص
ورجعت للدكتوره قالت خلاص تنويم فتح 5 سم
وكتبت دخول تنويم الساعه 11 و55 دقيقه
ودخلت كشك الولاده ولين جهزوا المحلول والسرير وتسالني كم سوال زاد المغص وزاد الطلق كشفت لقته 8 سم
بدات بسرعه تساعدني وسبحان الله بس دقيقه وطلعت البنت مع اول دفعه والحمد لله
وتسجلت ولادتها الساعه 12 و 34 دقيقه
يعني ماشاء الله ماكملت ساعه والحمد لله كانت سهله وميسره
كانت تنزل الدموع من عيني من فرحه البنت اللي شفتها واني والحمد لله ولدت طبيعي
على طول بس خمس دقايق اخذت الجوال واتصلت على زوجي
وطبعا رد عليه وقال
خير ويش فيكي متصله اكيد افتكرتي شي للعيال وبدك تفكريني فيه
قلت له وانا اضحك
لا بس الحمد لله ولدت وهو يقولي عن المزح روحي وكملي مشي في الممر عسا ولادتك تكون سهله
واحلف له واقوله والله ولدت والبنت جنبي
والله طار من الفرح وهو يضحك والحمد لله انها طبيعيه ومره انبسط
واخذت يومين في المستشفى وطلعت ورجعت بيتي بالسلامه واخوانها فرحانين فيها
والحمد لله ربي سهلها لي وربي يسهلها لكل حامل يارب
وربي يقومكم بالسلامه
والله دعيت لكل حامل انها تهون عليها وتقوم بالسلامه ويرزقنا الذريه الصالحه ويحفظهم ويحميهم وربنا ينول كل وحده مرادها
امين
وشكرا لوقفتكم معي كنتم ومازلتم اخواتي ولي معكم مواضيع كثيره
بس حاليا راح انشغل مع الضيوف والبيت والبنت ولي معكم رجعه ان شاء الله