والله اني افتقده كثير ..

[shmooe]

السلام عليكم ..

ما ادري جاية افضفض ولا جايةابغى حل .. بس والله تعبت ..
انا افتقد زوجي كثير مع انه يتعمد ما يطلع كثير عشاني .. بس حتى بوجوده فيه اشياء كثيرة ناقصة ..

يجي من الدوام يتغدى يجلس على النت شوي .. ويطلع .. ليش هو صار يطلع عشان ما ينام بعد الدوام .. عشان انا كنت اتضايق اذا نام بعد الدوام وطول بالنومة واصير انا جالسة بحالي ..بالبيت ..من الصباح الين ما يقوم .. بس ايش الفايدة صار يطلع بهالوقت ..

عادة بهالوقت اشغل نفسي بالنت ولا بشغل البيت .. يرجع اجلس معاه

يمسك النت ..ولا ينشغل بالببي .. الين وقت النوم وانا جنبه يعني هو فاهم ان هو الحين جالس معاي وبنفس الوقت يشوف التلفزيون وتابع ال بي بي .. ويجلس على النت ..

واذا جات على الساعه 11 قال يالله بقوم انام يالله قومي نامي معاي
صراحه انا اعاند احيانا واقول مافيني نوم .. ولا ابغى اسهر ..
احس اني على جنب طول اليوم وباليل يالله تعالي ننام ..

والله احيانا يبين على وجهي اني متضايقة ومخنوقه ولو احد قالي كلمة
خلاص بصيح قدامه .. ولا يحس فيني .. اقوم لغرفتي احيانا واصيح واصيح ..وانام من الصياح .. وهو ما يفتح حتى الباب ويقول ايش فيها قامت .. ولا ليش طولت في الغرفة ..

اقوم من نومتي ومن مزاجي مرة متعكر ولا يسأل فيني ..اكلمة ويكلمني عادي ولا كأن كان فيه شي زعلني ..ويمزح ويضحك ..

هو يبغى ولد .. وانا حامل بس ما حبينا نعرف نوع الجنين .. كل تعليقاته ابغى ولد .. لو جات بنت بحطها بالزاوية ومراح احبها .. هالكلام بالمزح
بس مزح من اول ما حملت للحين .. انا محتاجتة يقول انه راضي بنت ولا ولد .. لحظة جد شوي .. تطمني ..

ما بقى شي على الولادة .. وعلى روحتى لبيت اهلي .. وهو ما ضمني وطمني لو بالكلام ان كل شي بيكون بخير ..وان كل هالتعب بيروح . وبيكون عندنا طفل .. ومن هالكلام الي شوي يرفع معنويات اي حامل ..

لما اكلمة ونجلس جلسة مصارحة .. احس اني ظلمته ويطالعني
كأني ظالمته .. واتبلى عليه ..
طيب اذا هو كرجل ما يعرف .. وعنده هالشغلات صعبة عليه .. طيب انا ايش اسوي ..

تعبت من اول زواجي لحد الحين . وانا اخذ منه اي تصرف عاطفي بالموت .. والله تعبت ..

[حنين الجنة]

والله يالغلا احسك مكبرة الموضوع

احمدى ربك انه محترم معك ولا يغضب ربه فيه رجال الله لا يبلانا تدخين وسهر ونسوان

وكل الرجال كده مايحبون جلسه البيت واهم شي انه يبات معك بالليل

انتى يمكن متوترة لانك حامل

بس انصحك خدى الامور ببساطه وقولى الحمد لله

وتعرفي بعد الولادة ان شاء الله راح يتحسن الوضع ويكون اكبر همكم البيبي وشغلات البيبي

[نبض قلب حمني]

حبيبتي بالنسبه لطلعاته اذا جاء من الدوام
تكلمي معاه قولي له مره اطلع لحالك ومره انا معاك انا اطفش من جلسه البيت

وبعدين اذا صار ينشغل عنك بالتلفزيون وغيره
بعد تكلمي معاه قولي له شوي للنت والتلفزيون وشوي لي انا مو كل الوقت تنشغل عني

حبيبتي اسلوب الكلام الهادي ينفع مع الرجال
اي شئ يضايقك
شوفي لك وقت هو مروق فيه وفاضي
جلسي تكلمي معاه بهدوء
وكم دمعه وكذا وبينفع ان شاء الله
حاولي بااسلوبك تحننين قلبه
قولي له انا احتاجلك ابيك جنبي ابي اسولف ابي اتكلم وماعندي غيرك اسولف معاه
ومن هالكلام
جربي يمكن ينفع معاه
لان في رجال هذا طبعهم من قبل لايتزوج ويتزوج ويكمل على طبعه
مايدري ان زوجته مايعجبها هالوضع

فااذا انتي مانبتهتيه ولاعلمتيه هو وش دراه

جربي تكلمي معاه

[سيدة الغرام]

احمدي ربك ياقلبي زوجك مو من نواع لي يسهر براء
يمكن نفسيتك وانتي حمل
الله يخليكم لبعض

[ღ..وســـــن..ღ]

حبيبتي الكلام مع الرجل بهذا المووضووع ابدا ماينفع

لان الرجل ماراح يفهم انتي وش تبين لان انتي اصلا مانتي عارفه وش تبين بالضبط

حبيبتي لازم تاخذين نفس قبل كل حاجه

اولا قولي لزوجك من الليل انك تبين تتغدين برا بمكان حلو ورايق وبالجو الحلو

اذا رفض وقال انا تعبان وماادري ايش حاولي معه شوي اذا مارضى خلاص اطلبي من المطعم

مافيها شي خوذي يوم راحه

ثانيا لازم تاخذين شور ع الصباح وهو بالدوام وتجلسين فتره طويله وتسترخين بالمويه الحلوه الدافيه

ولاتفكرين بشي بس ارخي بدنك مع الماء

وبتطلعين من الحمام وانتم بكرامه وانتي متنشطه وكلك حيويه وافتحي نوافذ شقتك

وروحي البسي الوان زاهيه فرحه ولبس يكون بناتي بس مثير شوي موكثير

وحطي ميك اب خفيف وناعم ولما تقرب جيت زوجك سكري النوافذ بس افتحي السارات عشان

يدخل النور للشقه وبخري الشقه باحلى بخوور

وبخري غرفة نومك وسكري نورها وخلي الستاره مفتوحه

انا ليه اقولك الكلام هذا

لانك ياعمري بكل بساطه انتي نفسيتك متضايقه من الروتين اليومي وعدم التنفس

وزاد عليك انك متضايقه مع الحمل بعد فيا قلبي لازم تفهمين ان انتي الي لازم تغيرين نفسيتك

لان زوجك مهما قالك من كلام او سوا لك افعال حلوه ماراح تهتمين وبتتضايقين زياده

لان انتي من نفسك قاعده تضيقين نفسيتك فلازم انتي الي تخلين نفسيتك حلوه ومتفائله

ونشيطه وسعيده ومرتاحه ولاتضغطين ع زوجك لانه مايفهم انتي وش تمرين فيه

ولازم انتي الي تجددين نفسيتك وتنعنشينها وتزينين حياتك ونفسيتك مو زوجك

ولازم تفهمين شي انو اذا مااستغليت هذي الايام الي انتي فيها حامل وخليتيها اجمل ايام حياتك

ولاترا بعدها راح يجي بيبي وينكد عليك عيشتك انتي وزوجك لين يتم سنه

فماعندك الا هذي الفتره تستانسين فيها بطولها وعرضها مع زوجك وانبسطي معه

والله يوفقك يالغلا

[عشق الصدى]

صحيح كلام وسن وانا معاها
وخذيت العبر منها
وانا حياتي مثلج تماماً وحياتي كلها فراغ بفراغ وزوجي ما يدري عني واذا تضايقت بشي هو مايحس فيني وفانا اقلب الدنيا فوق تحت لين مايضايق وانا بالغرض ابيه يحس بضيقي بس الحمدلله كافي انه معاي وما يسهر برع أهم شي انه يدير باله عليج
والله يخر لج زوجج ويتمم حملج على خيير ,المهم الجنين يطلع سالم ومعافى ولا يهم ان كان صبي او بنت ..

[shmooe]

جزاكم الله الف خير بنات

والله اني دعيت لكم من قلبي ..

كنت محتاجه اسمع هالكلام ..

مشكووورين وما قصرتو ..