موعدي الاول فمراجعة حملي

[nadia711]

السلام عليكم

راح احكيكم ببساطة ايش سار في اول موعد لي فالمراجعة، موعدي كان في مستشفى الاطباء المتحدون في جدة طبعا جيت قبل الموعد لكن اتلطعت بعد كدا نادت اسمي و دخلت و جالسة تتكلم من خشمها الله يهديها، قلتلها انا انشالله حامل بس عملت تحليل منزلي و الدوره متاخرة اسبوع، قالتلي لازم تحليل دم و خلاص، خرجت رحت المختبر سويت التحليل قالتلي النتيجة بعد ساعتين، خرجت جلست انا و زوجي نتمشى برا الين الساعتين تخلص و اتصلت حجزت موعد عندها تاني فنفس اليوم عشان اقدر ادخلها بموعد لانو مررررررررا كان زحمة و هيا الدكتورة الوحيدة الموجودة تستقبل يوم الجمعة، المهم رجعنا اخدت التحليل طبببعا مافهمت شي منو بس اللي فهمتو كمية الهرمون فالدم و رقم طويل جمبو، نادت اسمي و دخلت قالتلي انا شفتك امس؟؟؟ قلتلها لا اليوم بس حجزت موعد ثاني عشان الزحمة اللي عندك و ماحبيت اخذ موعد احد، تخيلو جلست تضضضضضضحك هيا و الممرضة -ــ-، قلتلها انا حابة اعرف النتيجة و غير كذا حابا اشوف سونار و اطمن و عندي آلام شديييدة تشبه آلام الدورة، قالتلي مافي سونار لسا صغيرو مارح يبان، و باين من التحليل انك حامل الهرمون جدا عالي، قلتلها طيب الاسبوع الكم؟ الحمدالله فالثاني، اعطتني حمض الفوليك و حبوب دوفستون للتثبيت، و طلبت من تحاليل لمتابعة الحمل (بول و دم) بس انا الصراحة مررررررررا مارتحتلها و خصوصا اني بشحت الكلام منها شحتة و انا حابا مررررا اعرف اشياء كثير و اطمن على الجنين لانو اول حمل ليا و ماعندي اي تجارب، لاكن طنشت التحاليل اللي طلبتها لاني ابدا ماني حابا اكمل معاها!