طلعت نتيجه التحليل والحمدلله

[Omwaleeed86]

السلام عليكم

حبيباتي ابشركم اليوم سويت تحليل حمل والحمدلله طلع في حمل الحمدلله والله يتمم علي ويثبته يااارب ادعولي 🌹

وحبيت افيدكم بتجربتي من البدايه
انا بصراحه قبل كنت احمل بس خارج الرحم مرتين مره على يمين ومره عاليسار فصار انسداد بالقناتين وصعب ان احمل طبيعي بعدها وغير جذي بعد اخر حمل خارج الرحم راجعت بعده ب 4 سنين لقيت ان في التهاب بالقناة اليمين ومضطره اسوي عمليه استأصال القناة اليمين وفي الثناء العمليه اكتشف الدكتور بالقناة اليسار مثل الورم والدكتور اضطر بهالحاله انه يشيل اليسار بعد لان هالورم 50٪ ممكن يتطور ويصير ورم خبيث والحمدلله على كل حال رضيت باللي الله كاتب لي مع العلم كنت حيل متضايقه من الاستأصال بس شنو بيدي الحمدلله ودعيت ربي يرزقني ويوفقني بخطوه اطفال الانابيب لان بعد ماراجعت عشان اسوي حقن المجهري ( اطفال انابيب ) انصدمت بأن الدكتوره تقولي مخزون التبويض عندج ضعيف ويارب لو تطلع لنا بويضه وحده بس صالحه … بصراحه انا هني حييييييل حسيت بضيقه والنفسيه تعبت عندي وكنت ادعي واقرا قران واستغفر كثر ما اقدر

والحمدلله وقت السحب طلع معاها 3 بويضات بس ووقت الارجاع رجعتلي بويضتين فقط قالت الثالثه ماتصلح للتلقيح وعطتني حبوب تثبيت الحمل وتحاميل تثبيت وحبوب بروجيلوتون وهالحبوب بالشريحه نوعين من الحبوب وحده نصها لون ابيض ونصها بني وقالت لي بس اخذ منها الحبوب البيضا والبنيه ما اخذها لمده 14 يوم لي يوم التحليل الهرموني وحمدت ربي وشكرته وقعدت اريد بالدعاء والقران وكنت اكل خيار وكان اول يومين من الارجاع حسيت بشد مو طبيعي بس بعدها راح الشد وخفت بصراحه وحاولت ما افكر كثير وانسى الموضوع لدرجه مرات اقول لنفسي اذا الله كاتب لي الحمل بيصير وكنت مرات اشتغل بس خفيف ومرات لا ارتاح كنت متوتره جدا جدا وكثر مازاد التوتر كنت ادعي وصار معاي حاله من العاطفه صرت ابكي على مشكله صارت بيني وبين زوجي وسبب تافه بس كنت ابكي مثل الاطفال يومين ابكي بس ومتضايقه وبعد كنت اروح للحمام اكثر من المعدل الطبيعي وكانت فيني عروق بالصدر خضراء واضحه ومرات كنت احسه ثقيل ومرات خفيف وهذا اللي زاد توتري بعد وسويت تحليل منزلي باليوم 4 من الارجاع ومابين معاي شي كلش سويته مرتين عشان اتأكد بس مافي شي كانت الشاشه يطلع فيها خط واحد فقط وبعد 10 يوم من الارجاع حسيت ان ما ابي اكل شي ومرات ابي الليمون او شي مالح وكرهت السكر الكثير مع العلم كنت احب السكر كثيييييير واليوم 12 من الارجاع قلت بسوي تحليل منزلي وبشوف لان بس مافيني انطر بعد وسويت بليل وطلع خط خفييييييف حيل وثاني يوم سويت بعد ما قعدت من النوم الصبح وطلع الخط اوضح من اللي امس والحمدلله حمدت ربي وقلت ان شاء الله انها بشارة خير ورحت اليوم سويت تحليل والحمدلله طلع في حمل اللهم لك الحمد واسأل الله ان يثبت حملي ويرزق كل وحده يااااااااارب العالمين