كانو يسموني العقيم بس حملت بقدرة الله (قصتي لكم)

[( أم التوأم )]

السلام عليكم ورحمة الله وبركاته

بنات أنا حامل بقدرة الله وفضله بعد ماكانو زميلاتي يسموني ( من وراي) بالعقيم!

من اول ماعرفت اني حامل وانا مابين عيوني غير قسم المتأخرات بالحمل

أبي احكي لكم قصتي من اولها واشرح لكل وحده كانت جاهله مثلي وتعلمت من

المنتديات وتجارب البنات ,,,
أنا متعلمه وجامعيه واعمل مدرسه للمرحلة المتوسطه بس والله كنت اجهل حاجات
كثيررره بخصوص الحمل ولولا الله ثم قوقل والمنتديات والله ماكنت فهمت شيء
وكنت للآن والله بلا مبالغه للآن ضحية لطمع الاطباء مثل كثير منا ,,

اسمحولي بنات انا بشرحلكم اول ليش سموني زميلاتي بالعقيم وكيف كنت اعاني من
نظرتهم لي وكيف كنت أتحمل الكلام من وراي

بصراحه عالم النساء قاااسي وهو سبب قسوة المجتمع علينا وكأننا ناقصات او فينا
خلل

تخيلو يابنات اللي تحمل من زميلاتي كانت تخبر الكل الا أنا
اول ماأدخل تسكت عن الكلام
حتى أحاديثهن عن اطفالهن ومشاكلهم مايتكلمون فيها قدامي !!

عانيت معاناه مايعلم فيها الا الله واللي مرن بحالتي

مليت نظرات الشفقه والانتقاص والخوف من اني احسدهم والامر ماكان بيدي والله يعلم

اول معاناتي اني تزوجت بعد تخرجي بسنه من رجل متزوج والعذر اللي جبروني عليه
اخواني أنه ( مطوع ) وماله من الدين الا هالصفه واللحيه
قسم بالله انه كرهني بالمطاوعه والان اشوف كل مطوع كذاب وينصب على المجتمع
حتى يكون له مكانه
كان عاجر جنسيا وعارف بعلته ومع ذلك تزوجني وانا بنت البيت وقعد يلعب فيني
بزعمه يعالج نفسه فيني !
تعذبت عذاب نفسي والحياء منعني اتكلم لخواتي ولأمي والله كنت مدري وش اسوي
لين كتبت مشكلتي بموقع استشارات اسريه بعد 6 شهور من تعذيبه لي ومحاولاته
فيني اللي ماجابت لي الا الإلتهابات والقرف
وفعلا قلت له بهدوء ابي تطلقني ,, هو خاف لحظتها اني افضح سره وهو له هيبته
عند جماعته تعرفون الرجال الموضوع هذا حساس
بس طمنته ان طلقني بهدوء ماراح ابوح بسره
والحمدلله بعد شهر من السجال معاه طلقني وارتحت
وعند كل الناس حتى أهلي يظنون انه طلقني لأنه يبي عيال وانا ماحملت
وزوجته آخر عيالها عمره 8 سنوات

خلال هالمعاناه ومن الطبيعي فكرة الحمل ماكانت ببالي ولاكنت اعرف وش يعني
ايام التبويض ولا حتى وش يعني طول الدوره ولا أي شي بخصوص التخطيط
للحمل

لين ماتقدم لي شاب ماسبق له الزواج ,,, حسيت ان ربي يواسيني بعد معاناتي
مع طليقي اللي ماخاف الله فيني وكلام الناس اللي مارحمني

بالمناسبه بعد انطلاق شائعة اني عقيم ماصار يخطبني الا اللي عقيم او اللي كبير
بالسن او واحد راعي مشاكل وماأحد يقبل فيه

علشان كذا يوم تقدم لي صديق اخوي الشاب كنت مستغربه وبقيت أسئل عنه
بالخفيه لاني بنظر الناس عقيم وهو شاب اكيد يبي اطفال

وطبعا بعد طلاقي مايفوتني اخبركم ان بعض قريباتي المتزوجات صارو يكرهوني
كذا
والسبب خوفهم اني ممكن اتزوج ازواجهن وهذا كثر الكلام السيء عني !

وزميلاتي اول ماعرفو ان فيه شاب ماسبق له الزواج تقدم لي ثارن ثورة مو طبيعيه

تخيلن يابنات يقولن ( حرام تتزوجينه وهو لسا شاب يبي ضنى !!!)
واللي تقول ( نصيحه لاتتزوجينه لانه بيطلقك او يتزوج عليك !!!)
والله يابنات الأجواد اني كنت أبكي طول الليل من القهر
ليش يقنطوني من رحمة الله ؟؟؟
ليش متكاثرين علي شاب وانا مازلت شابه والحمدلله بكامل صحتي وجميله
وبنت ناس معروفين وأخلاقي ماأحد يقدر يتكلم فيها الحمدلله

صرت حتى اهرب من نقاشاتهن بموضوعي اقضي ساعات الراحه او الفطور بالمعمل
او باالمرسم او حتى بالمطبخ وأشغل وقتي مع طالباتي أشرح للي حابه واسولف
مع اللي محتاجه أحد يسمعها ,, والحمدلله عدت فترة الخطوبه وتزوجت وكونت احلى
علاقه مع جميع الطالبات وهذا أنا حامل بعد ثلاث شهور من زواجي ولله الحمد والمنه

هذا اختصار قصتي مع تسميتي بالعقيم
والقادم ان شاءالله راح اشرح لكم التفاصيل الصحيه اللي واجهتني والاكتشافات
اللي اكتشفتها قبل اتزوج وبعد الزواج

ادري طولت عليكم بس انا كنت مصررره اقولكم ياقسم المتأخرات كل كل شيء
وبالتفصيل
انا متأكده ان فيه كذا وحده الآن داخله موضوعي من قوقل تبحث وتقرأ عن اسباب
تأخر حملها وتبي تعرف كل شيء

دعواتكم لي انا الان حامل داخله الثالث والوحام مجنني الله يتمم حملي واشوف
طفلي بين يديني



أختكم أسمهان

لي عوده بس اتعشى

[حكاية]

ألف ألف مبروك وربي يعوض صبرك ويفرحك بضناك بين ايدينك يارب .

[hana kh]

الف الف الف مبرووك وربك مايضيع لعبده دعوه
وان شاءا الله يثبت حملك ويحفظ لك جنينك وتشوفيه بين اياديك وتفرحي فيه
والحمد والشكر والفضل لرب العالمين

[sahab]

والان اشوف كل مطوع كذاب وينصب على المجتمع حتى يكون له مكانه))

انا معااك في هالكلام 100% ونادر ماتشوفين مطوع بمعنى مطوع للاسف الاغلب يزعمون انهم مطاوعة وهم اسوأ خلق الله

اتوقع هذيل عقابهم اكبر عند ربي لانهم ياخذون الدين والتدين كغطااء للتضليل عن عيوبهم

والحمدلله الله عوضك وسر قلبك وكسر عين الي يتكلمون عنك

الله يهون عليك الوحااام صعب يوم كنت حامل افففف اياام صعبة

بس من تعدي الرااابع كل شي اوك

ربي يتمم لك على خييير ويقومك بالسلامة ويفرحك بالبوبو

[وجهه القمر]

حمستيني مع قصتك شفتي ربي مايضيع حق احد يارب يرزقك بالطفل السليم المعافى يارب اللي تفرحين فيه

[سموة الشوق]

الف الف مبروووووووووووووووك

والله يرزقك الذرية الطيبة من عنده

[( أم التوأم )]

الله يبارك فيك ياحكايه ويرزقك من واسع فضله

ابي اكمل لكم السالفه قبل انشغل وانسى

...

بعدما ملكت وقرب موعد الزواج قلت لازم عاد احمل من اول شهر حتى اثبت
للجميع انهم غلطو بحقي

وصرت من موقع الى موقع وليليآ أفر قوقل فرررر
قرأت عن كل شيء بخصوص الحمل
ويوم خلاص حسيت اني فاهمه رحت لطبيبه بعد ماانتهت دورتي ابي اتابع التبويض
وقلت لها اني مقبله على زواج وابي اتطمن على نفسي وفعلا طلبت لي كل التحاليل
الازمه وقالت انتظري لين تطلع ولنا كلام

اول ماجيتها كان اليوم ال14 من دورتي ولأن طول دورتي 34 كان التبويض
عندي متأخر بس ماكانت تفهم هالسالفه وطنشت واعطتني كلوميد وقالت خوذيه
ثاني يوم الدوره
وبالفعل اخذته ورجعت له يوم 14 زي ماقالت لي وبرضو حجم البويضه كان صغير
وهذا الطبيعي لان لسا موعد التبويض توه

المهم زيادة تخريع قالت عندك خمول بالمبايض وارتفاع بنسبة fsh !
كيف خمول وانا التبويض عندي ماشي ؟
قالت لا البويضه ماتوصل للحجم المطلوب تتوقف عند حجم معين !!


حسبي الله ونعم الوكيل فيها والله انها خرعتني واستنزفتني وهي ماعندها سالفه

ورجعت أقرأ بتجارب البنات بالمواقع لين عرفت

وارتفاع ال fsh كان 7 والطبيعي 5 يعني ماكان عالي
هذا لو كانت صادقه بنتائج التحاليل

المهم انا صرت آخذ أناناس جبت ثلاث حبات وقطعتها وحطيتها بالفريزر وصرت
يوميآ أخذ علبه وآكلها
وكمان صرت آخذ عين الجمل أشتريته وحطيته جنبي كل مافتح الأنترنت آكل منه
ورحت لوادي النحل وأخذت منهم خلطة الانجاب اللي يسوونها بعسل السدر ويوميآ
على الريق آخذ ملعقه واحيانآ بنص النهار اذا نسيت
وأخذت كمان دفستون مو علشان تنظيم الدوره لا الحمدلله منتظمه بس قرأت أن الدفستون
يصلح بطانة الرحم إذا كانت ماتقبل التلقيح والتصاق البويضه الملقحه (أقرأو عنه أكثر)
لذلك أخذته من باب الاحتياط والحمدلله اخذته من خامس يوم الدوره ليييين قبل موعد نزولها
المعتاد بخمس ايام

وغيرت طبيبتي الغبيه لطبيبه شاطره اول شهر قالت لي لازم اعطيكي أبر منشطه ثلاث ايام
بمنتصف الدوره قلت ليش قالت لأن سماكة بطانة الرحم تكون ممتازه لإلتصاق البويضه الملقحه وفعلا اخذتها + الحاجات اللي كنت آخذها

والحمدلله والمنه طلع لي ثلاث بويضات اثنين بمبيض ووحده بالثاني وكلهم حجمهم
مناسب

راجعت طبيبتي يوم العاشر من الدوره وكان حجم البويضات 11 وراجعت قبل موعد التبويض
بأسبوع كان وصل حجمهم لـ 17 و 16 والحمدلله حملت

للأمانه الطبيبه مع انها شاطره الا انها كادت تيأس يوم عرفت ان حجمهم
باليوم العاشر 11 فقط وقالت المفروض اكثر بس طنشتها وراجعت لين اخر شيء


يعني لاتيأسووون يابنات ولاتأخذون منشطات لين تتأكدون ان المبايض فعلا بحاجه
لتنشيط والله ايام الطبيبه الاولى كنت خايفه من التكيس لاني متاكده ان مبايضي
شغاله ومع ذلك تعطيني كلوميد !!!!!
اخذته شهر والشهر الثاني عجزت اكمله من الخوف


وأي أسئله انا حاضره
اسفه تعبت من كثر الشرح ان شاءالله تكون واضحه قصتي

[( أم التوأم )]

المشاركة الأصلية كتبت بواسطة hana kh

الف الف الف مبرووك وربك مايضيع لعبده دعوه
وان شاءا الله يثبت حملك ويحفظ لك جنينك وتشوفيه بين اياديك وتفرحي فيه
والحمد والشكر والفضل لرب العالمين

الله يبارك فيك ياقلبي
الحمدلله ان ربي مانساني ورزقني غصب عن القانطين
الله يجزاك بالخير

[( أم التوأم )]

المشاركة الأصلية كتبت بواسطة sahab

والان اشوف كل مطوع كذاب وينصب على المجتمع حتى يكون له مكانه))

انا معااك في هالكلام 100% ونادر ماتشوفين مطوع بمعنى مطوع للاسف الاغلب يزعمون انهم مطاوعة وهم اسوأ خلق الله

اتوقع هذيل عقابهم اكبر عند ربي لانهم ياخذون الدين والتدين كغطااء للتضليل عن عيوبهم

والحمدلله الله عوضك وسر قلبك وكسر عين الي يتكلمون عنك

الله يهون عليك الوحااام صعب يوم كنت حامل افففف اياام صعبة

بس من تعدي الرااابع كل شي اوك

ربي يتمم لك على خييير ويقومك بالسلامة ويفرحك بالبوبو

آمين ياشهد والله أني خرجت من تجربة زواجي بتجارب وقناعات كبيره
فعلا حنا بمجتمعنا المطوع يتزوج اللي يبي بلحيته والناس مالها الا الظاهر

الحمدلله حمدا كثيراااا

الله يهون علي الوحام والله اكتب لكم والغثيان ذابحني

[( أم التوأم )]

المشاركة الأصلية كتبت بواسطة وجهه القمر

حمستيني مع قصتك شفتي ربي مايضيع حق احد يارب يرزقك بالطفل السليم المعافى يارب اللي تفرحين فيه

اي والله شفت والحمدله
ربي ماضيع حقي
آمين الله يتمم حملي على خير ويرزق كل من تتمنى الاطفال