ياليتني أنسحبت من البداية !!

[مخاوية الهم]

السلام عليكم و رحمة الله وبركاته ..

شلونكم بنات عساكم طيبين .. طبعا انا من زمااااااان ودي أكتب لكم هالموضوع بس كنت مترددة وايد !
و كل ما اقول خلاص بكتب .. اكتب سطرين و أهون لأن الآيباد كلش ما يشجع

.×.×.×.×.×.

بنات انا تزوجت عن حب .. و انا ثاني وحدة بحياة زوجي .. يعني كان يحب وحدة قبلي .. و هي بنت جيرانهم و كان يحبها من يوم اهما يهال .. كبروا مع بعض
و لما كنت على علاقة معاه قبل الزواج اكتشفت أكثر من 4 مرات انه يكلمها و مرة ثالي أحبها و من هالكلام .. و بعدين تقدم لي و أهله كلموا اهلي ومشت أمورنا .. و تغير الريال 180 درجة .. صار حنون أكثر و محسسني انه يحبني موت موت مووووووووت .. و انا كنت اعشقه .. طبعا وقتها كان عمري 20 .. ياهل !
لما رحنا لـ فحص قبل الزواج اكتشفنا ان انا و هو حاملين سكلر .. حاملين مو مصابين .. و من الخبال اللي فينا و الغباء قررنا نواصل .. لما دخلونا على دكتورة استشارية قالت لي .. احتمال 50 % اتيبون حامل سكلر .. و 25% سليم .. و 25% مصاب
فـ توكلنا على الله و تمت الملجة ولله الحمد ..
يوم ملجتي كان أحلى يوم بحياتي .. سوينا حفلة بسيطة في بيتنا .. و بعدها طلعنا نتعشى .. و كنا اثنينا ننود .. ( نبي نرقد ) من تعب اليوم اللي مرينا فيه
رجعني بيتنا ورقدت و هو راح بيتهم رقد و كنا لعى اتفاق ان ثاني يوم اروح بيتهم و اسلم و و نروح نزور يدته

طبعا ثاني يوم لما ياني كنت توني قاعدة من النوم .. ياني غرفتي .. قعدنا شوية على ما اقوم مادري شنو ياني و كان تلفونه يمي .. فتحته و ياليتني ما فتحته ....
لقيت مسجات بينهم .. و يقول لها عن كل شي عني !!
قريت 3 مسجات
اول مسج: يوم اللي رحنا الفحص كاتب لها : انا شفت سيارتج بباركات المستشفى قوليلي شفيج ليش بالمستشفى لا تخشين عني .. ( للعلم هي كانت مصابة بالسرطان و تشافت منه بالكيماوي بس بدون عملية لأن توه مكتشفينه كانوا ) و هو كان يحاتيها
ثاني مسج : احنا سوينا فحص و طلعت حامل سكلر و ماتذكر الباقي .. بس كاتب لها عني وايد اشياء ..
ثالث مسج : ترى هي تغار منج .. ( يعني انا اغار منها .. ) تخيلوووووووووووا !!!!


هو كان بالحمام لما رجع شاف علامات صدمة على ويهي .. و على طول سحب مني التلفون و شاف المسج و انصدم و تم يبوس راسي و يقول هذا قبل الملجة و توبة و مادري شنو . احنا اصدقاء مو اكثر ( مادري من قاص عليهم و قايل لهم في صداقة اتيي بعد الحب .. و ان مجتمعنا يتقبل هالنوع من الصداقات )
على طول قلت له اطلع برع و مابي آطلع اليوم
مارضى يطلع و تم معاي يترجاني و يبوس يدي و ريولي عشان اسامحه ..
و اغمى عليه و انا ولا أثر فيني ولا شي
كنت مصدومة ..
اختربت فرحتي وانا عروس .. ماعشت احلى لحظات الزواج و هي بداية الملجة .. للأسف كنت بنفصل عنه و من غبائي قلت لا احبه .. !! حبني برص ..
طبعا هاليوم كان مثل القشة اللي قسمت ظهر البعير !
هالكلام بصير له ثلاث سنوات و انا ليحين ماتعايشت مع الموضوع .. ما سامحته ومانسيت خياناته .. ياما لقيته واقف معاها عند باب بيتهم و لاصق فيها كأنه طيور حب ..
ليتني مشيت بدربي و تركت عني هالخرابيط و الحب و السخافة ..

المهم ..

من 3 سنوات و خوات زوجي كل ما شافني جابوا طاريها جدامي و جدام ريلي .. لدرجة اني لما كنت ساكنة معاهم بنفس البيت كانوا يدخلونها البيت بوجودي و يودونها غرفتهم اللي لاصقة بغرفتي .. و حضرت زواجي مع اني شرطت على زوجي اذا يبي اسامحه .. فلانه ماتجي عرسي .. و اخت زوجي نحاس فيني عزمتها !! و خلتها ترقص جدامي .. :) طبعا كل هذا عناد فيني .. لأسباب تافهه و لأني كنت على خلاف بيني و بين اخته ..
و اخته الثانية كانت كل يوم تقعد معاي و تقولي اخوي كان يتواعد معاها بالمحل الفلاني
و يوم عرسها اخوي زعل و طلع من البيت
و كانت تقولي تفاصيل .. والله والله والله كنت اموت و احترق ألف مرة ..
مادري ليش صبرت و ليش ما انفصلت قبل ما آييب ولدي حبيبي

لين آخر يوم زرت فيه بيت زوجي .. قبل 4 ايام و اخته تييب سوالف عنها .. !
ليــــــــــش كل هـــــــــذا ؟
و انا والله ما نسيت شي .. كل شي كأنه أمس صاير .. حاولت انسى واعيش حياتي بس صعب جدا لأني وثقت فيه و سامحته على خياناته القبلية .. آخر صدمة لي ثاني يوم ملجة ..
حرام اللي صار فيني ..
للعلم زوجي ما يخوني .. و كل شي عنده عالمكشوف .. تلفوناته دايم بيدي و عادي .. و اعرف وين يروح و وين ايي .. بس أعرف ان مستحيل ينساها و هالشي طبيعي هو كبر معاها و عاش كل شي معاها .. لدرجة لما سألنا عنه قبل الزواج قالوا حق امي فلان يحب بنت جيرانهم فلانة و مسومينهم بالفريج روميو و جولييت .. !! و امي قالت لي هالحجي بعد زواجي ..

زوجي يدري اني عايشة معاه عشان ولدي .. ويدري اني متحسفة اني ما انفصلت ..

و يعرف اني ماعدت احبه مثل قبل .. لأنه جرحني حيــــــــــــــل .. و ما اقدر اسامحه ولا اسامح نفسي باللي سويته بروحي !

بنات شلون اتصرف مع اخت زوجي .. ؟
والله مو عارفة مع ان علاقتي فيها صارت عادية .. ومابينا شي .. بس الظاهر هي ليحين ناوية عالشر ..

مابي أطول عليكم أكثر و سامحوني عالموضوع الطويل ..
بس حبيت انصح كل وحدة .. لا تحملين بسرعة قبل ما تتأكدين من مشاعرج تجاه زوجج و مشاعر زوجج تجاهج .. و اذا كان زوجج ردي لا تحلمين بسرعة و يطيح فيها الياهل اللي ماله ذنب !