قصة ولادتي التانية

[ملكة روحه]

السلام عليكم ورحمة الله وبركاته .....

مرحبا ياعسولات كيفكم والله اشتئتلكم كتير كتير

المهم جاية النهاردة لخبركم بئصة ولادتي التانية بابني أحمد ^^

الئصة بلشت بيوم 1\8\2011 يوم الاثنين الصبح كانت الساعة 6 الصبح



هلأ انا من اول ما فت السابع وانا عارفة اني راح اولد قيصري بالشهر السابع

يعني عارفة انو اول ما يخلص السابع راح اروح المشفي كرمال اولد

لانو صار عندي نزيف وكنت تعبانة كتير والدكتور حكالي لازم تفضلي ع ضهرك وما تتحركي لانو النزف عندك ئوي وكان في دم عند الجنين

وفعلا سمعت كلام الدكتور وفضلت نايمة ع ضهري من غير حركة كتيرة

وكان موعدي مع الدكتور يوم 30\7\2011 يعني ئبل بيوم من الولادة

روحت وفحصت لانو بكون خلصت السابع بهاليوم

لما كنت عند الدكتور فحصني وطول وهو عم يفحص انا خفت كتير

وبعدين ئلتلو شو يادكتور شوفي مالك طولت هيك اطلع فيه وحكالي اسمعي يا بنتي

انتي وضعك ما بستحمل تئعدي كمان يوم واحد لازم تفوتي ولادة

لانو الدم صاير عند الجنين بالرحم وهيك في خوف ع الجنيبن وعليكي

صرت ابكي وخفت كتير حكيتلو تيب شو وكيف وضع ابني حكالي هو بسم الله ما شاء الله وضعو هلأ منيح بس الدم الموجود هو الى بخوف

لهيك يا بنتي بكرة الصبح الساعة 6 تكوني عندي بالمشفي لنعملك الفحوصات ونفوتك علي العمليات

تبعا بكون تاني يوم الا هو اول يوم برمضان يوم 1\8\2011

روحت ع البيت حاولت انام دون فايدة كنت خايفة وزوجي كان خايف بس حاول يطمني

بعدها تاني يوم الصبح جهزت اغراضي وروحت ع المشفي

وعملو الى كل الفحوصات والضغط وغيرو وكل شي

حكولي تمام جاهزة للعميلة والساعة 8 بالضبط فوتوني غرفة العمليات

كنت خايفة وبرجف وحالتي حالة وكان زوجي معي بس ما اتحمل يضل

لهيك طلع وحكولو لانو هاى عملية قيصرية بلاش تحضرها وما فات

هلأ بعد هيك خدروني وما عدت اعرفت او حسيت بشي

بعد ساعة الا ربع طلعت من العمليات طبعا انا نايمة لسة ما فئت من البنج

واولدت الحمدلله والله رزقني بصبي وسميتو احمد ونوووور دنيتي كلها

طبعا احمد كان صغير كتير لانو سبعاوي كان وزنو 1 كيلو

واخدو بالحضانة نام فيها 3 اسابيع ويومين يعني ما الى كم يوم جيباه ع البيت

لانو هلأ صار عمرو شهر الحمدلله

بس الوجع الى شفتو بعد العملية موتني كان وجع مو طبيعي

ولما صرت ئادرة وشفت الجرح اللتمست كان نفسي لو اولدت طبيعي متل ما اولدت ابني عمرو

بس قدر الله وماشاء فعل والحمدلله علي كل حال

وهلأ الحمدلله انا بخير واحمد بخير وبصحة تمام والف الحمدلله

وهلأ صارو متل التوأم هو وعمرو اخو

عمر عمرو هلأ 10 شهور اسم الله عليه واخوه احمد عمرو شهر

وهلأ مجنني عمر باشا كل شوي بنكش اخوه ولا لما ببكو ببكو الاتنين سوا

هبلوووووووني

والحمدلله ع كل حال

معلش طولت عليكم