تجربتي مع الحمل خارج الرحم

[just a girl]

السلام عليكم حبيت اكتب اللي صار لي علشان الكل يستفيد وينتبه لنفسه
انا من فتره احاول احمل وفي يوم حست قبل الدوره بعدة ايام نزل مني افراز مخلوط بشويه دم حسيت بسعادة قلت اكيد اني حامل سويت تحليل بالبيت مافي شي قلت راح انتظر وقت الدوره جاني الم في صدري قوي
بعئها بكم يوم حللت بالبيت طلع خط خفيف جدا فرحت مره قلت لزوجي قال انتظري يومين ونتاكد صرت كل يوم اسوي بالبيت يطلع خطين انتظرت يومين رحت سويت تحليل دم قالوا احتمال بس ضعيف انا تضايقت
رجعت البيت نزل مني دم بني واحمر
رحنا مستشفى ثاني يسوون تحليل الهرمون.. سويته طلع 32 قالت الدكتورة يمكن اجهضتي تعالي بعد،يومين نشوف يرتفع والا ينزل
اي صح بنفس الوقت سويت سونار عادي قالوا الرحم فاضي 😭 هنا بكيت انا قلت احساسي اني حامل حتى لما نزل مني الدم ماخف الالم اللي بصدري لاني بالعاده من تنزل الدوره يختفي الالم انا بديت اوسوس واقراء عن هالشي
قبل موعد الدوره كان يجيني الم في جنبي يروح ويجي
المهم رحت البيت حاولت ما اتحرك والدم ينزل كانه دوره عاديه
انا اقوم الحمام وارجع انسدح وارفع رجلي
بعدها بيومين رحنا قال الدكتور تضاعف الهرمون صار 140
ولسى الدم ينزل مني
قال الدكتور خذي مثبت وارتاحي وتعالي بعد 4 ايام نسوي سونار المهم المهم الدم بداء يخف كثير بس ماوقف بعدها
بس كنت خايفه من الالم ( ليش كنت خايفه لاني قريت انو نزول دم زي الدوره مع الم في الجنب احتمال حمل خارج الرحم) المهم رجع علي وجع جنبي رحت المستشفى قالت الدكتوره لازم سونار # مهبلي # رحت سويته قالت دكتورة السونار من قال لك انك حامل الرحم فاضي قلت اسمعي انا شاكه ان حملي خارج الرحم تاكيد اذا في شي يسار او يمين صارت تشوف يمين يسار شافت شي صغير مره بس ما كانت متاكدة قالت احتمال هو هذا صورته وارسلته للدكتوره
المهم رحت لنفس الدكتوره قالت لي احتمال خارج الرحم بس تعالي بعد كم يوم طبعا سويت تحليل الهرمون وارتفع صار 370
رحت البيت نفسيتي متدمرة ما ادري وش يصير المهم اليوم الثاني دقت علي الدكتوره قالت الاستشاري يقول تعالي ضروري
رحت سويت سونار مهبلي وشافوه مره ثانيه وتاكدوا انه خارج الرحم قالوا نسوي لك منظار بكرا اذا حابه سالنا مافي خيار ثاني قالوا يمكن ينزل بس لو رحتي وحسيتي بوجع في جنبك تجين ع طول لان يمكن يسبب انفجار الانبوب المهم رحت البيت وجاني الم لا يطاق سبحان الله لو اوصف الالم الوحده ماتتوقع انه من الحمل الم في الجنب يذبح مع وجع فوق فتحة الشرح ابي اروح الحمام ما اقدر اتبول وانتم بكرامه وجع يذبح تحملت اليوم الاول قلت بيخف اليوم الثاني ماقدرت ورحت وقرروا العمليه الحمد لله كانت منظار وسحبوا الجنين
المهم اللي بقوله اللي تشك بنفسها انها حامل حتى لو تجيها الدوره تحلل بالبيت واللي تطلع حامل ويجيها الم بجنبها والا يقولون الرحم فاضي والهرمون يزيد تتاكد انه مو خارج الرحم
ترى الحمل خارج الرحم لو ما اكتشف بدري يمكن يسبب انفجار الانبوب ويمكن يسبب الوفاه لانه يسبب نزيف داخلي
واقروا تثقفوا كثير في موضوع خارج الرحم لانه صار كثير
والحمد لله الله يعوضني بخير ويرزقني الحمل المعافى
الاهم من هذا كله طوال الوقت وانا اقول لاحول ولاقوة الا بالله العلي العظيم … و… سبحانك إني كنت من الظالمين
واللهم اني وكلتك أمري فكن لي خير وكيل ويسر لي أمري فإني لا أحسن التدبير..