الكلوميد - الدوفاستون - الابرة التفجيرية - ثم التحزيم

[ميمي ليبيانو]

السلام عليكم ورحمة الله وبركاته

حبيت نشارك تجربتي مع كل المنتظرات مثلي بعد مدة طويلة من الاكتفاء بالقراءة فقط :)

انا متزوجة من سنتين .. لم يرزقني الله بالحمل !

اول فترة زواجي كان عندي هرمون الحليب ملخبط وقعدت 7 شهور تقريبا الى ان تعدل
بعدها بديت نستخدم في الكلوميد واستمريت عليه لمدة 4 شهور .. مع الدوفاستون طبعاً ومع دلك ربي ما سخرش الحال

بس تفاجأت ف رابع شهر من استخدامي للكلوميد ان الدورة نزلت لمدة يومين فقط ؟ ولما مشيت للدكتورة قالتلي انه كان تلقيح غير ناجح

وفرحت بالخبر وقلت الحمد لله احسن من لا شي

يعد هالشهور من استخدام الكلوميد وتوابعه تعبت منهم .. اكتسبت وزن زيادة وبثور ف الوجه بسبب الدوفاستون ف قررت اني نبحت عن ادوية جديدة و بتأثيرات جانبية اقل

الحمد لله ربي سخرلي وقريت على دواء الميتفورمين وكلمت عليه الدكتورة ونصحتني بيه .. ووصفت ليا الميتفورمين و دواء اسمه فيرتي بوست مقوي خصوبة

وانا الان ف تاني شهر من استخدامي للدوائين

والشي الجديد اللي جربته الشهر هدا هو ( التحزيم )
التحزيم اعتقد انه شبيه من التمريخ عند بعض الدول العربية

وللي مايعرفوشي .. التحزيم هو طب شعبي معروف ف ليبيا .. تمارسه نساء معدودات وكبيرات ف السن .. الحمد لله اليوم مشيت وكشفت عليا وقالتلي الاتي :

قالتلي ان الرحم نازل هلبا و مايل :(
والشي هدا لم يكتشفه ولا طبيب من اللي قاموا بالكشف علي طول السنتين :)

عالعموم قامت بفعل بعض الحركات لظهري .. وبعدها وضعت مايشبه لخيوط الصوف مانعرفش الحق ادا كان فيهم شي ف نهايتهم بس لما انزيلهم ح نقوللكم .. طبعا وضعتهم داخل المهبل وطلبت مني اني انزيلهم تالت يوم .. انا درته اليوم الجمعة يعني ان شاء الله ح انزيلهم يوم الاحد ف الليل

ومن ثم ربطتني من وسطي على عظام الحوض تحديدا و قعدت وقت بسيط ثم فكتني

وكتبتلي وصفة اعشاب نشربها لمدة تلاتة ايام ابتداءاً من غدوا
جذرة + فيجيل + ميرمية + بردقوشه

طبعا هي وضحتلي ان حالتي محتاجة اني نحزم مرتين بس قالتلي ان قدرة ربي فوق كل شي وممكن نحمل حتى الشهر هدا :)

انا مبسوطة بمشيئة الله وحبيت نشارك قصتي مع كل اخت نشرت قصتها ف المنتدى هدا و غيره .. وتشوقت لقصتها و تمنيت اني نشوف نهاية سعيدة للكل