ولدت بفضل الله وجبت عبدالعزيز

[أماني]

الحمدلله حمدا كثيرا .. ولدت يوم اﻷحد 20 ربيع اول وجبت ولد قمر ماشاء الله ( عبد العزيز )..
قبله باسبوع كان فيني آلام طلق ولمن رحت المستشفى قالوا لي مفتوح 2 سانتي .. روحي البيت وامشي وشربي قرفة واذا زاد اﻷلم تعالي..
رحت وسويت مثل ماقالوا ورجعت بالليل يوم زاد اﻷلم ونزل دم .. قالوا كمية الدم شوية مو حق ولادة .. خخخ مدري ايش كانوا يبون .. نزيف مثلا..
رحت البيت وصرت امشي ولمن رحت لهم يوم ثاني قالوا سكر .. فعرفت ان الوقت مابعد يحين..
يوم الخميس كان شكلي يكسر الخاطر ووضعي جدا مؤثر .. بطني نازل تحت كلش..
يوم السبت من صحيت والآلام ذابحتني .. والمغرب خشيت اتروش الا حسيت بمثل مغص الدورة ونزلت مني قطعه دم .. طلعت وشبيت لي عود وشربت دارسين .. صارت الالام تزيد وصرت احسب لها كل ربع ساعة وشويات كل نص ساعة صارت .. الين الفجر صار الالم مايجي الا كل ساعة..
بعد صلاة الفجر بدت تتقارب اوقات الطلق .. نمت من شدة التعب .. وقمت الساعة 7.30 ..
رحت المستشفى على 9.30 قالوا مفتوح 2 وروحي البيت .. رفضت وطلبت تنويم على ماخلصت الاجراءات صارت الساعة 10.30 وحطوا علي تخطيط لمدة 45 دقيقة وكان فيه طلق بس ع قولتها بسيط..
صرت اقرا قرآن وادعي والطلق كل 10 دقايق وبعدين كل 5 دقايق..
ناديت الممرضة يمكن 10 دقايق او ربع ساعة وبالموت جات .. قلت لها ابي اقوم اتوضأ عسان اصلي الظهر بس مو قادرة من شدة اﻷلم .. فقامت كشفت علي وطلع مفتوح 8 ولله الحمد..
ودتني ع غرفة الولادة وبعدها قابلتني وحدة وقالت لي بتكشف عشان تشوف زاد او لا وطلع مفتوح 10 وعلى طول ع غرفة الولادة بدلوا لي ملابسي والقابله اللي ولدتني كانت لطيفة جدا .. والممرضة اللي كشفت علي في الغرفة ولقته مفتوح 8 ماشاء الله عليها ذوق وطيبه حيل ساعدوني لحتى ولدت الساعة 1.36 ظهرا ..
الحمدلله والشكر