أبشركم ولدت وهاذي قصتي

[روضة المها]

لله الحمد والمنه ولدت يوم الأحد تاريخ 12 / 6 / 2011 م وجبت فهودي حبيبي الله يحفظه ان شالله
وانا اصلا كانوا مقررين لي الولادة 13 / 6 / 2011 م
المهم كانت الالام معاي من يوم الخميس شي خفيف كالعاده ويوم السبت حسيت نفسي تعبانه كله ابغي انام وبالليل على الساعه 9 بدأ ينزل معاي افرازات بنية مع الم خفيف جدا وكانت امي عندي فديتها وعلى الساعه 12 قالت لي اروح البيت مافيج شي قلت لها توكلي ع الله لوصار شي ابلغج
وسهرت بعدها مع الاولاد وابوالعيال لين صلاة الفجر صلينا والكل رقد وانا قعدت اقرى قران والاذكار وعلى الساعه 4 بدأ الجد كل ربع ساعه الم لين الساعه 6 نزل علي شوي ماي وكلمت امي قالت لي روحي مو زين اذا الماي نزل قلت بانتظر شوي الالم اقدر استحمله لين الساعه 7 ونص خلاص ماقدرت وقظت زوجي وعلى المستشفى ومعاي ام زوجي فديتها وامي جاتني مع اختي هناك
وطبعا كل ماجاني الم نزل الماي اكثر وتشنجت ريولي ويدي قبل مااوصل بشوي وعلى طول اول ماوصلت زوجي جاب الكرسي وجوني ممرضتين عند الباب ساعدوني ودخلوني على طول غرفة الكشف قالت الدكتورة ماشاء الله 6 سم ولادة
ودخلوني داخل وجهزوني وجهزوا المكان والنيرس كانت ولله الحمد متعاونه معاي وحنونه كثير وانا كل ماجاني الم اقول اللهم هون الطلق وحسن الخلق والله يروح الالم على طول وقالت لي النيرس تبغين ابرة الظهر قلت لها لا وجات بعدين الدكتورة وكشفت قالت لي 7 سم يله هانت وعطتني ابرة في العضل كمسكن ودخلت علي امي شوي والا اقول حق الممرضة راح اولد خلاص والحمدلله على الساعه 9 فهودي حبيبي كان في حضني ومااحتجت للجراحه يعني كلها ساعه من دخولي لين ولادتي ولله الحمد
والله يابنات الاستغفار والادعية وقراءة القران هي السبب في تسهيل الولادة كل ماكنا قراب من رب العالمين كان هو قريب منا وملبي لدعواتنا
الله يقوم كل حامل بالسلامه ويرزق خواتنا انشاء الله في القريب العاجل
والسموحه طولت عليكم