الحمدلله ولدت قطعة من روحي يوم 16/8/2013م

[توتو عبد]

السلام عليكم اخواتي

اولا الحمدلله ولدت ابني البكر واسميته ( رواد ) الله يباركلي فيه ويجعله من الصالحين يا رب

ما بدي اطول عليكم بس بدي احكي التفاصيل المهمة باختصار

قبل ولادتي باسبوع تقريبا رحت وعملت فحص وطلع عندي توسع 2 سانتي

وعندما عرفت اني صار عندي توسع استمريت على المشي وشرب الميرامية لانها تساعد على فتح الرحم

ملاحظة ( لم اشرب اي شيء قبل ما اتأكد انو صار عندي توسع لانه مشروبات التوسع سواء ميرمية او زيت خروع او غيرها من المشروبات يمنع شربها الا في حالة حدوث توسع او فتح بيت الرحم لانه شربها قبل التوسع يسبب في تحمية الطلق مع عدم فتح بيت الرحم مما يؤدي الى حدوث عملية قيصرية )

المهم قبل ولادتي بيومين صابني تنفيخ بايدي واقدامي وحسيت انو الولادة على الابواب استمريت على المشي طول الليل وشربت مرمية حسيت اوجاع الطلق صابتني وضليت صاحية بالليل ونزل علي نقاط دم الساعة وحدة ونصف منتصف الليل قبل الولادة ... وصبرت على نفسي لتاني يوم الصبح نزل مني كمان دم الساعة سبعة ... رتبت اخر اغراضي لاني نويت اطلع من المستشفى على بيت اهلي .. ورتبت اخر اشياء بالبيت واخدت حمام ساخن ولبست .. كانت الساعة عشرة الصبح وصحيت زوجي من النوم وكلمت دكتوري ورحنا المستشفى

الساعة عشرة ونص الصبح فحصوني لقيو التوسع عندي 3 سانتي اعطوني طلق صناعي وكل شوي يزيد التوسع ويزيد الوجع اضعاف وخلال هذا الوقت حطولي اكسجين ونبض الجنين ضعف والحمدلله استقر وضع الجنين وبعد ما صار عندي توسع خمسة سانتي نزلو مية الجنين وهون الوجع صار لايحتمل . . طلبت ابرة الضهر والدكتور حكالي الخمسة سانتي الي ضلو بيجو بسرعة اتحملي شوي والكل بصبرني وزوجي ما فارقني نهائيا وقرأ علي قران واستمر التوسع مرة 6 ومرة سبعة لحتى صرت بدي اموت من الوجع ... وبالاخر زااااااااااااااد الوجع وصار مستمر كل ثواني وجع لحتى حسيت بشي رح ينفجر من اجري ومن حوضي وتبين مع الفحص انو صار عشرة سانتي واخدوني على غرفة الولادة وانا اصرخ باعلى صوتي وتقريبا ضليت ما يقارب الساعة الى الساعة ونصف وانا اصرخ لحتى نزل الراس ويحكولي يلا كمان ضغطة الراس طلع وكانت اعلى صرخة من لحظة الولادة وحسيت اشي كبييييير نزل مني وبعدها ما دريت عن نفسي وين انا وصحيت على الدكتورة وهي باخر القطب

وطلعت من غرفة الولادة واحس الدنيا بتلف وكأني بحلم وزوجي ماسك ايدي وببوس فيها وببوس على راسي وخالتي ام زوجي عندي وانا كأني بحلم وطلعوني على غرفتي وكان الجنين تعبان حطوه تحت الاكسجين لحتى استقرت حالتو الحمدلله ...

وبعد الولادة خلوني لتاني يوم بالمستشفى لحتى تستقر حالتي والحمدلله طلعت من المستشفى تاني يوم مع ابني حبيبي لكن معاناة ما بعد الولادة من القطب لغاية الان

ادعولي الله يباركلي بابني ويجعلو من عباده الصالحين