مازال عندي أمل

[حبيبة ووشااه]

السلام عليكم
الحمد لله على كل حال اليوم آنا باليوم الثامن والعشرين من الدورة والمغرب شرفت
واليوم تأكدت إن دورتي الحمد لله منتظمة كل 28 يوم بالضبط
المشكلة بأنابيب فالوب الله يسامحها الدكتورة اللي سويتها عندها اكتفت بس بكلمة طبيعي وخلتني أفرح إن ما فيني شي وقعدت على أمل إني أحمل هالشهر
ساورتني الشكوك وقلت لا أعتمد على كلامها ووديت الأشعة عند دكتور شاطر ولما شافها قال لي الأنابيب كانت ملتصقة وانفتحت مع الصبغة بس بقت نهاياتها ملتهبة وفيها التصاق على الأنبوبتين بالطرف وهذا اللي يمنع الحمل لأنه يمنع دخول الحيوان المنوي ليلقح البويضة يعني الباب مغلق وبويضتي أثاريها محجوزة كل شهر بالأنابيب لا جليس ولا ونيس مسكينة كسرت خاطري والله تخيلتها تسولف مع الحيوان المنوي من ورى الإلتهاب وتقول له حاول علشاني تخترق الإنسداد وتدخل هههههههههههههههههه
انصدمت طبعا من كلامه لأن الدكتورة اللي رحت عندها ماقالت لي هالكلام
وعلشان أتأكد أكثر عرضت الصبغة على استشاري أمراض نسا بمستشفى ثاني وقال لي نفس الكلام
طبعا خلاص قررت إني أكمل علاجي مع الدكتور الأول لأني بصراحة ارتحت له وحسيته فاااااااااااهم شغله
من قبل شوي لما الدورة نزلت اتصلت عليه وقلت له فقال لي بكره أراجعه علشان يعطيني مضاد حيوي يعالج التهاب الأنابيب وصارحني قال لي ترا ماراح يصير حمل قبل 4 شهور لأن معالجة الإلتهاب تاخذ وقت
ألف الحمد لله على كل حال راضية باللي ربي كتبه لي

اللي حابة أعرفه الحين الأنابيب مفتوحة بس نهايتها ملتصقة منو مرت بنفس الحالة أو سمعت فيها وفعلا تعالجت وحملت؟؟؟؟
الناس يقولون لي انسي موضوع الحمل شلووووووووووون أنساه أقل شي دعاء ( ربي لا تذرني فردا وأنت خير الوارثين ) اللي أدعي ربي فيه كل يوم يذكرني بالحمل؟
ترا يا جماعة نكذب على حالنا لو قلنا راح ننسى موضوع الحمل غصبا علي أحن للحمل وأحن إني أكون أم

ريحوني الله يريحكم دنيا وآخرة واسمحوا لي علإطالة