بنات الحقوني دخلت التاسع ووزن بنتي ناقص مره والدكتوره شكلها تبى تولدني قيصري

[Ḿٱ۾ڵيڼٱỄ]

السلام عليكم ورحمة الله وبركاته

بنات اليوم الاربعاء رحت المستشفى وياريتني مارحت الحمدلله على كل حال

عملتلي الدكتوره سونار وقالتلي انو وزن بنتي 1.300 يعني كيلو وربع
وانا من زمان بحاول ازيد وزنها وسبحان الله يارب مو راضي يزيد الوزن وانا والله العظيم باكل كويس مره

والحمدلله تطمنت انو راس البيبي سار تحت يعني تباشير ولاده طبيعيه

لكن : الدكتوره شكلها مو ناويه خير الله يستر جلست تكلمني على ابر عشان تولد بنتي بدري وانا بصراحه خفت منها بعدين قالت ممكن نولدها قيصري عشان وزنها صغير وممكن تحتاج رعايه خارج الرحم وانها ماتقدر تدفع وجلست تتكلم زي كذا
بعدين قامت قالت خلاص انتي اعملي اشعه سونار عشان نشوف الدم يوصل للجنين كويس ولا لا <<< المشكله كل اسبوع وانا اعمل سونار يعني كل الاسابيع اللي فاتت وانا اعمل هادي الاشعه وتكلفة الاشعه الوحده 600 ريال وفوق
ورحت عملتها وقلنا امرنا لله
ولما عملتها الدكتوره الثانيه حقت الاشعه قالت كل شي في البيبي سليم والدم يوصله كويس يعني مافيه أي مشكله ابدا
من وقت ماخرجنا وانا نفسيتي تعبانه مره ومعصبه ومقهوره
شكلها الدكتوره تبغى تضحك عليا وبس تلهط فلوس ومره عادي عندها
انا يابنات مو مشكله اني اعمل اشعه لما تكون ضروريه لكن كل اسبوع نفس الاشعه؟! ونفس النتيجه ؟!
يعني الحمدلله بنتي كويسه ليش كل شويه بس اشعه ولهط الفلوس
لا وتتكلم بكل ثقه انو ممكن تولدي قيصري عشان انو الجنين مايقدر يدفع بالولاده الطبيعيه

بنات قلبي محروق مره يعني بالله تخيلو : الجنين صحته سليمه والحمدلله مافيه مشاكل اللهم انو بس وزنها قليل وانا بتغذى كويس ولله الحمد وبحاول اكل عشان يزيد الوزن
وراسها تحت يعني مو راسها فوق ولا على جنب عشان نقول طيب امرنا لله نعمل قيصري
يعني صحتها سليمه ووضعها طبيعي ليش تبغى تولدني قيصري ؟؟!! ومره مصره وبس تتكلم عن الابر والولاده القيصريه اعوذ بالله

متضايقه مره والله اعوذ بالله من الشيطان الرجيم

زوجي يقولي نصبر الاسبوع الجاي مراجعه نشوف ايش مويتها حسينا انها حتنصب علينا نغير المستشفى نروح مستشفى ثاني اهم شي نصبر عشان ناخد نتايج السونار اللي انعمل دحين

طيب انا خلاص دخلت شهري التاسع ومن اول الحمل وانا اتابع عندها من اول شهر والله تخيلو يابنات يعني خلاص رحتلها وانا مغمضه وقلت ان شاء الله خير يارب وانصدم بيها كذا معاملتها وعدم صبرها ؟!
طيب فين أروح ؟!! ابغى دكتوره تولدني طبيعي وتصبر عليا ما ابغى قيصري ابدا

بعد ماحكيت قصة حياتي عندي سؤالين بس

الأول : فين احصل دكتوره بجده كويسه وتولد طبيعي وتصبر عليا ؟
انا اتابع بالاطباء المتحدون وياريت تقولولي على دكتوره ثقه ومجربينها كثير

الثاني : مين ولدت ووزن جنينها كيلو وشويه ؟؟ وكيف حيكون الوضع هل يحتاج حضانه ولا عادي ؟