قصة ولادتي بنور عيوني (( البراء ))حبيب ماما..

[أم عبووودي]

السلام عليكم ورحمة الله وبركاته
مرحبــا احلى كروشات واحلى امهــات

اليوم راح احكيكم فلم المرمطه والبهدله حق ولادتي

بدات معاناتي يوم الثلاثاء 10/4/1432هـ الساعة 3 الفجر صحيت من النوم وانا احس بألم مو طبيعي كل بعد شوي يجي خفت وحسيت ان ساعة الصفر قربت اخذت اللاب وطلعت الصالة شغلت سورة البقرة وقمت امشي لحد الساعة 4 حسيت بتعب ورجعت الغرفة انسدحت اذن الفجر قمت صليت وصحيت ابو الشباب يصلي بعدين قلتله بروح المستشفى ومشينا على الساعة 7 تقريبا على مستشفى باشراحيل <<من كثر ماتمدح حبيبتي ثلجه عالدكتورة بسمه رحت ويااااليتني مارحت مالقيت الدكتورة بسمه ودخلت على فطيمه قلتلها احس بألم يمكن ولادة اكشفي علي قالت مافي لازم اول تسوي سونار وتحاليل قلتلها طيب قالتلي اول تعالي نشوف نبض البيبي اطمنت عليه الحمد لله تمام اعطتني اوراق التحاليل والسونار نزلت سويت اللي تبغاه بس من الغباء في تحليل ما يطلع الا بعد اسبوع ما ادري ايش فايدته وانا اقلها ولادة ولليوم ما اخذت نتيجته وشكلي ما راح اروح اخذها .. المهم طلعت للدكتورة لقيتها في العمليات عندها ولادة قيصريه وانا داخله الاستراحة في وحده برى على كرسي شكلها باكستانيه تصيح وتتوجع بقوووة قلبي وقف دخلت استنى الدكتورة وبالي مع اللي تصيح برى وكانت معايا اخت زوجي الله يسامحها راحت عند اهل البنت وقالتلهم لا تخلوها على الكرسي بعدين الجنين يطلع فوق ويسولها عمليه وهم ماصدقوا راحوا دخلوها على الاستراحة وسدحوها على الارض وهي تصيح ولمت رجولها قامت وحدة تفك رجولها وانا هنا دورولي ماغير نقزت من عندهم وجري عند زوجي قلتله يالله على البيت قال ليش قلتله مافيني وجع والدكتورة في العمليات ووحدة تولد في الاستراحة قال ما ارجعك ثاني مرة قلت امشي طار الوجع خلاص ورحت ناديت اخت زوجي من عند الباب وعلى البيت طلعت عند مامتي خلاص ما ابغى اجلس في بيتي خايفة وطول الوقت افكر اروح اي مستشفى كل واحد يطلع بمستشفى في النهايا ابويا الله يحفظه قال مستشفى ام القرى وانا اكرها احسها مجزرة مو مستشفى المهم دعيت دعاء الاستخارة ورحت العصر ام القرى دخلت على الدكتورة بتحاليل وسونار اللي سويته في باشراحيل وكشفتلي من تحت قالت الرحم مو فاتح وراح تولدي بعد 5 ايام وكتبتلي ادويه وقالتلي اشرب عصيرات كثير عشان البيبي صغير ..رجعت البيت وانا محبطه اخذت الدوا وكل شوي اشرب عصير وحالتي حالة والالم يجي ويروح نمت وصحيت قبل الفجر يوم الأربعاء 11/4/1432هـ الالم زااااااااااااااااد وصياااااااااح جات امي عندي وشوي جاء ابويا وانا اصيح زي الاطفال حاطه يدي على عيني وصياااااااااااح اتصل ابويا على زوجي صحاه من النوم وسي السيد ثقيييييييييييييل بقوووة وانا حالتي حالة اخذني ابويا على ام القرى وقاله لا تتاخر الحقنا المهم رحت انا وامي وابويا كشفت علي الدكتورة وقالت الرحم مو فاتح ولا سانتي واحد وشكلها مخيف وهي تكشف وتقول عمليه وشكلها قلقانه جابتلي الرعب قمت اسال فيه شي ماترد وماعندي غير الصياح اخذوني سويت سونار وتحاليل ومن غرفة لغرفة اخر شي دخلوني غرفة حطوا على بطني تخطيط نبضات البيبي شوي وجات الاستشاريه وانا مسكت فيها دخيلك فيه شي البيبي فيه شي تقلي لا كل شي تمام قلتلها طيب بسرعة سوي عمليه عشان البيبي لا يتعب ويصير فيه زي ولدي الاول قامت تهديني وقالت عندهم الجهاز مو كويس ما يوضح نبض الجنين تمام وما عندهم حضانه كويسه عشان البيبي وحولتني على مستشفى حراء بعد ما اعطتني مغذي ما ادري ايش هوا المهم الله يكرمكم استفرغت وانا باخذه خلصت وعلى مستشفى حراء وطول الطريق صياح والم وابويا كل ما صرحت يقول قولي يالله لا تصرخي وانا ساعتها مافيني لأحد المهم دخلت حراء عند الدكتورة باكستانيه حالها في خشمها انسدحت على السرير وجاني الم صحت قامت خاصمتني ايش هذا في رجال برى ما يصيح حقت عليها بس سكت لأني محتاجتها ولا كان نفسي ارد عليها جاتني وشفتها حامل من قهري قلت في نفسي ربي يذوقك اخس من اللي شفته استغفر الله ساعتها كنت مقهورة منها المهم قالت الرحم فاتح 2سانتي شوي قالت فين رجال جاء ابويا وزوجي قالتلهم مافي سرير كلها ملياااانه خرجنا من عندها راح ابويا كلم واحد ما ادري مين اكدله ان كل السرر مليااانه طلعنا من حراء قمة التعب والمرمطه من مستشفى لمستشفى المهم رسينا على بخش وعلى طول استقبلونا السسترات والدكتورة وكشف واستقبال حلوووو وهم مبتسمين سوتلي التلفزيون ونبضات البيبي قلتلها بسرعة سوي عمليه ما ادري هوا انا قادرة اولد طبيعي او لا المهم كان قلبي معلق بالطفل خايفة يرتفع الضغط ويتعب اللي ببطني زي عبودي وافقدة كان همي كله يطلع متعافي المهم بسررررعة على العمليات دخلت شفت كل شي بس مشوش الحمد لله لاني من غير نظارة :) وماحسيت الا شوي بعد العمليه الدكتورة حنان تصحيني وانا احس شوي واغيب شوي شفت زوجي وانا في غرفة الملاحظة سالته عن الولد قالي طيب بس شوي اختنق وحاطين عليه اكسجين قمت احلفة صدق طيب ولا فيه شي ..بعد ما قمت قالي اني كنت اتكلم وانادي على نفسي وعلى بنت اختي انواع الفضايح .. بعد العمليه ارتفع عندي الضغط كم ساعة بعدين استقر ونقلوني على التنويم وما خلوني اشوف حبيبي الا يوم الخميس في المغرب رحت شفته رجعت ابكي زوجي خاصمني قالي مافيه شي بس انتي تدوري على المرض تبغي الضغظ يرتفع .. نمت وانا زعلانه بعدين في الليل نادوني على الحضانه عشان ارضعوا فرحت ورحت بسرعة والحمد لله الجمعة طلعوا من الحضانه وجابولي هوا الغرفة وطلعت السبت انا واحلى بيبي حبيب امه البراء من المستشفى

وهذا بروئي وهوا في الحضانه فديت قلبه

اتمنى ما اكون طفشتكم وتكون قصتي خفيفة عليكم مع اني ماخليت شي الا كتبته :)

[يارب سهل لي]

ربي يخليه لك والحمدلله ع سلامتك وسلامه البراءه وربي يحرسه من اعين الجن والانسس

[التفاحه الحلووه]

الحمد الله ع سلامتك
مشاء الله يجنن
الله يخليه لك ويحفظه
ويهديه
ومبروووك ياعسل

[*الجوري*]

واوو اكشن قصتك بس اهم شي سلامتك وسلامة بيبي الحمدالله على سلامتك عمري

[رباه فرج همي]

ياعمري انتي

الحمدالله على سلامتك ياقلبي

الله يخليه لك ياعسل وتشوفينه عريس يارحيم

دعواتك لي ربي يرزقني ذريه طيبه صالحه



سؤال اشفيه عبودي ؟؟ وليش هو اختنق وقت الولاده ؟؟ الله يشفيه لك يارب

[أم عبووودي]

يارب سهل لي
اللهم آآآآآمين الله يسلمك ويحفظلك كل غااالي


التفاحة الحلوة
الله يسلمك ويبارك فيك يارب وينولك اللي تتمنيه


الجووري
الله يسلمك ياعسل ويهون عليك وتفرحي بالبيبي

[أم عبووودي]

رباه فرج همي
امين ياااارب الله يسلمك ياعمري
ربي يرزقك الذريه الصالحة عاجل غير اجل ويفرح قلبك وينولك اللي تتمنيه يااارب


عبودي الله يرحمه ويجعله شفيع لنا يااارب
ارتفع عندي الضغط وقت الولادة وصار معاه ضمور في المخ وتولد ومعاه مرض تصلب العضام
جلس معايا مريض سنه وخمس اشهر وتوفى في العيد 6/10/1431الحمد لله على كل شي ..
ربي اكرمني وعوضني خير الحمد لله ..

[همسة دلع]

الف مبروك ,,
والحمد لله على سلامتكم ...

[ام رتيل]

الحمدلله على سلامتك وسلامة البراء
والله يرحم عبودي ويجعله شفيع لك ياااااااااااااااااااااارب
يعني انت ام البراء مثلي الله يحفضهم ياااااااااااااااااااااارب

[حلمي اشوفك دنيتي]

الف مبروك والحمدلله على سلامتك ماشاءالله يجنن ربي يخليه لك