الحمدلله على السلامه ونعمة الأمومه

[جنون الحب]

السلام عليكم ورحمة الله

صباحكم أو مسااائكم طيب

مدري احترت وين انزل الموضوع وقررت احطه بهالقسم لو مكانه غلط الله يعطي مشرفاتنا العافيه ينقلونه

اليوم بقولكم أحداث اليوم المفاجئ والجميل بحياتي

انا اللي تعرفني وتعرف قصتي لي 5سنوات متزوجه ولله الحمد وربي رزقني بالحمل لكن بكل مره مايكمل حملت 3مرات والرابعه شاكين انو خارج الرحم

اول حمل لي كان بعد زواجي بأربع شهور وكنت دايم اعاني من نزيف افرازات او قوي يالله لك الحمد اول حمل فقدته بعمر 5شهور والثاني شهرين ونص وكان اقوى مأسااااة كان متعب بشكل فضيع فضيع مو بس الم نفسي كان جسدي اكثر مت وحييت وقتها نمت شهر كامل بالمستشفى وانزف نزف فضيع لدرجة من قوته ملابسي اللي لابستهم تطيح ...!
والثالث كان بعمر 4شهور مع اني عامله ربط لعنق الرحم بس نزفت وجاني طلق ورابع مره كنت اروح واجي واعيد تحاليل الهرمون مره فوق ومره ولا شي لم قررو انه حمل ضعيف وبعدين شكو انه خارج الرحم واعطوني ابرا كيماوي وحذروني مااحاول احمل بأقل من3شهور ...ولو قدرت انتظر 6 شهور احسن

المهم ونجي لليوم الموعود كان يوم جمعه 24/7/1438 كنت على اواخر الأسبوع 39 من الشهر التاسع ...طبعا مايحتاج أوصف التعب وضيق الصدر من قلة النوم والثقل الفضيع والحكه بالبطن وخصوصا ان البيبي مقعدي راسه فووووق تخيلو كل ترفسه تحت والراس بضلوعي ماارتحت اشوي الا يوم فكو الربط بأول التاسع خف الضغط بس باقي الام....!
لي أسبوع لا ليلي ليل ولا نهاري نهار دخت طلوق تروح وتجي واروح المستشفى وفي التخطيط مره يبان انه غير منتظم ومرة منتظم اشوي ويكشفون مو فاتح الا واحد واطلع وارجع لهم للتخطيط وهذي حالتي بس يوم الجمعه الفجر قلت لزوجي بكرا نروح نسوي تخطيط نشوف نهاية هالألم قالي خلاص بس العصر والليل انا مشغول خلينا نروح الصباح قلت تم ...
وجا الصباح وقمت وصلت وكشفيات واسأله وحوسه وليش للحين ماولدوك خلاص انتي قيصري المفروض لك أسبوع والده
تنويم خلاص رفضت بحجة ان جمعه ومافيه استشاريين ماابغا انام عندكم ع الفاضي قالت روحي سوي تخطيط ونشوف وش يصير وصعدت وركبوه لي واتظح ان فيه طلق بس مو منتظم والرحم فاتح واحد بس لكن انتي متأخره لازم تولدين وغصب تنويم منا ومناك قلت لها يعني متى بكرا العمليه قالت لا ساعتين بالكثير قلت اجل توكلنا وجا زوجي ووقعنا ودخلوني وطول الوقت والتخطيط علي وانا بس استغفر وادعي والتلفزيون مشغل على القرآن وصلاة الجمعه وانا ماباقي وحده ما دعيت لها وادعي لنفسي
وركبولي المغذي وصار يتحرك بزياده ماشاء لله وبما ان الراس فوق احسه يصقع بقلبي الشكوى لله هو يتحرك وانا انقز لأن وقتها الألم يجي بوسطي كلا ظهر وبطن وهم الا غصب كل اشوي بيكشفون من الظهر الى 4ونص يمكن وهم رايحين وجايين علي وانا كل اشوي سيستر متى ادخل عمليات مستعجله ماابغا انام عندهم خخخخخ
جاو جهزوني للعمليات وشالو عفشي كله ونزلوني ع الساعه 5الا العصر بآخر ساعه من يوم الجمعه دخلوني ودكتور البنج يقنعني الا غصب بنج نصفي وانا ياجبل مايهزك ريح ابغا كامل اقوله انا لو ودي قبل تدخلني الغرفه تبنجني ماابغا اشوف شكل الغرفه ترعبني بعد تقولي نصفي لا لا خلاص كامل
دخلت وشفت الاستشاري كنت ابغا اكلمه قبل لا انام واقوله ان الرحم ذو قرنين مثل ماحذروني بالعيادات لازم يعرف قالي ايوا مكتوب عندنا قلت لهم أجل يلا نوموني وتركدو علي صارت الدكتوره تضحك ونمت وماحسيت الا وهم يصحوني وجسمي منهد والم برجولي وابغا مسكن هع وتعطيني مسكين واقولها بردانه وتغطيني اشويات الا خلاص سحبوني بيصعدوني غرفتي وهم مطلعيني الا اسمع بيبي يصيح وانا دااااايخه حتى راسي مو قادره ارفعه عرفت انه ولدي يارباه شعووور ودي نقزت اخذته واضمه بأقوى ماعندي
ومن صعدت وانا احن ابغا اشوفه وهم يسكتوني عارفين مافيني حيل هع
ماشفته الا يوم ثاني بالليل نزلوني للحضانه وجابوه لي شنو اول ضمه ضميته ولا اول نظره ياربي شعووووور لايوصف ربي يبلغه لكل وحده ولا يجعلنا محرومين
اول مااخذته حياتي منفخ من الطلوق اشوي وانا اتأمل وضامته والله نسيت الجرح وعواره الا يفتح عيونه يطالع ويبتسم ورجع غمض ونام حياااااتي ودي لو اخذه واطيييير فعلا حسيت اني طايره ياربي شعور ولا احلى
الحمدلله اللي بلغني لهاليوم ربي لايحرم ولا بنت من هالشعور ربي يكرمنا ويكرم كل مشتاقه ياكريم ...الحين طفلي نايم جنبي وعمره كمل الشهر يارب العمر كله وبس اناظر فيه انسى تعب حمله والم الجرح وربي يجمعنا في ابوه قريب انا من حملت وانا في بيت اهلي مادخلت بيتي ابد ربي يجمعنا على خير ويحفظ لنا النتفه حماده ويرزقنا اخوان واخوات له بس بدون عمليه متعبه
وسامحوني ع الإطاله مااعرف اختصر حيل للأسف وودي لو اقدر اوصلكم مشاعري وفرحتي يالله لك الحمد
...وربي يبلغنا رمضان ويعينا على صيامه وقيامه..