تمنيتك باحلامي.....ادخلي

[حنان معوض]

السلام عليكم ورحمة الله وبركاته

اهليين حبيبتي
كثير اشوف تفاعلك في المنتدي
ومن ردودك فهمت انك سويتي حقن او تلقيح

ياريتك تفيدينا بتجربتك وبتفاصيلحا

[انثى تكره الظلم]

ان شاء الله بترد عليكى الاخت تمنيتك احلامى

موفقه خيتى

[تمنيتك بأحلامي]

وعليكم السلام
فعلا انا سويت حقن مجهري وبكتب لكم التفاصيل المملة لذلك تحملوني

صار لي سنتين ونص متزوجة عندي تكيس من انا بنت بس للاسف مااحد من الدكاترة اللي اروح لهم علمني باللي فيني بس كل اللي كنت اعرفه ان عندي كيس عالمبيض وقالوا مالك علاج والكيس عمره مايروح @_@ ومن بعد هالكلام قطعت المواعيد
وبعد زواجي ب 3 شهور سويت عملية كيس على المبيض اليمين او اليسار مادري وين خخخخ
طبعا العملية فتح بطن لان الكيس كان حجمه 10 سم
والدورة ماكانت تنزل الا بالحبوب كل شهر تتأخر ومافي حمل واخذ حبوب ينزلها بس ماينظمها لي ><
ونادر تنزل لحالها وقعدت سنتين اطارد من مستشفى للثاني ويعطوني بهالمنشطات ولا في فايدة اكبر حجم للبويضات 11 سم
وطبعا لازم يكون الحجم 18 او اكثر علشان يصير حمل وحتى لمن مرت فترة التبويض صار ممتاز ويوصل الحجم الى 20 وتقول الدكتورة فاليوم الفلاني لازم يصير جماع ونسوي بكلامها بس مايصير حمل ><
طبعا مايحتاج اقول لكم عن النفسية كنت أصيح بشكل يومي .... ماابالغ والله كنت يوميا وكل وقت اصيح ليل ونهار
الى ان أصحاب زوجي بالعمل دلونا على دكتورة قالوا له كثير شاطرة وناس كثير تأخروا بالحمل ولمن راحوا لها الله كتب لهم الحمل
ورحت لها كلمتها عن مشكلتي وعن العملية وكلشي وقالت نسوي لك أشعة الصبغة باليوم 9 من الدورة
وفعلا سويت الاشعة والمصيبة طلعت الأنابيب عندي مسدودة
قالت لي مالك إلا أطفال الأنابيب وانا اللي تتجمع الدموع بعيني قلت لها مافي علاج يفتحهم؟
قالت لاتضيعين الوقت وبسرعة سوي الانابيب أحسن من تضيعين وقتك وفلوسك على اشيا ممكن ماتنفع
وقلت لزوجي وجلسنا كم شهر مو متقبلين فكرة ان نسوي انابيب وانا زادت عندي الكآبة خاصة بعد ما اقتنعت بالفكرة بس زوجي لا
وكل أصيح إلى أن جا رمضان وبعده العيد
ورحنا للمدينة المنورة 4 أيام وجلست أطلب أن ربي ييسر لي الأمور وطلبت ان زوجي يوافق عالعملية وبعد مارجعنا الحمد لله زوجي اقتنع ورحت لمستشفى المانع لأن قالوا هم يسون أنابيب بس الدكتورة الله يهداها كانت تماطل بالموضوع
كانت تقول لي لازم تجين أول يوم من الدورة علشان احولك عالدمام وتسوينها هناك وانا تصير لي ظروف أكون أول يوم عند أهلي>>اهلي واهل زوجي بمنطقة غير منطقتنا
كنا كل اسبوع نروح نزورهم مدة يومين ونرجع للخبر
المهم كنت اروح لها ثاني يوم الدورة وهي تعصب تقول ماينفع لازم أول يوم مو ثاني ولاثالث يوم
وحتى لمن مرة رحت لها أول يوم ماادري شنو صار وأجلتها للشهر الجاي
أنا حسيتها تتلاعب وقلت لزوجي ماابيها ابي اروح لغيرها وصرت أبحث بالنت عن الموضوع واقرا مواضيع لناس سووا العملية وتجاربهم
الى ان شفت وحدة ردت على موضوع قالت أنها سوت العملية بمركز سمير عباس بالخبر وقلت لزوجي عنه قال أحسن لنا بالخبر قريب عن الدمام
وبحثنا بالنت عن المركز وطلعنا رقمهم وكلمهم زوجي قالوا تعالوا ثاني يوم أو ثالث يوم من الدورة
احنا استغربنا لان دكتورة المانع كانت تعصب لمن مااروح لها أول يوم وقلت له معناتها ماتعرف هالدكتورة والا اشكثر ناس يبدأون العلاج ثاني يوم
المهم ونزلت الدورة ورحنا للمستشفى فتحنا الملف ودخلت عالدكتور قال هالشهر ماراح نبدأ بالعلاج لازم نسوي لك تحاليل للأجسام المضادة علشان لو مانجحت العملية نعرف الاسباب وانا قلت له ليش ماتسوون التحاليل ونبدأ بالعلاج في نفس الشهر؟
قال لان التحاليل تطول على ماتطلع النتايج يبي لها اسبوعين
سويت التحاليل وجلسنا ننتظر للشهر الجاي وانا ليل نهار افكر بالموضوع واطلب من ربي تتيسر الأمور وطبعا لازم اصيح >>تحملوني تراني أحب الكآبة
وطلعت التحاليل وكلمنا المستشفى قالوا عندي نسبة من الاجسام المضادة وبيعالجونها وقت التنشيط
وجا الشهر اللي بعده وأخذت حبوب ينزل الدورة ورحت للمستشفى ومن ثاني يوم الدورة بدأنا بالمنشطات أبر
كنت أخذهم يوم ورا يوم
يعني يوم اي يوم لا وبعد اسبوع سويت تحاليل كلها ممتازة الا هرمون ماادري أي هرمون مااعرف اسمه بس هذا اللي يبين لو البويضات حجمها زين او لا
وكان الهرمون نازل 25 وهو المفروض يوصل لفوق ال1000 ....... ركبوا لي مغذي لونه أبيض مثل الحليب وهذا مثبت للأجنة علشان يساعد على ثبات الأجنة بعد العملية
واستمريت عالمنشطات وقالوا تعالي بعد يومين وأروح لهم يسون التحليل للهرمون والهرمون كل ماله وينزل >>ماادري كيف اقول لكم شعوري وقتها بغيت انجن بسبب هالهرمون
وقال الدكتور عندنا خيارين إما نأجل للشهر الجاي.......
أنا على طول قلت له لا مأأجل أبي هالشهر
هو كمل كلامه وقال أو نزيد لك جرعة المنشطات إلى 300>>أنا كنت أخذ 150
قلت له ليش من البداية ماعطيتوني جرعة كبيرة؟>>تدور الهواش مع الدكتور خخخخخخخخ
قال لأن أنتي عندك تكيس وأحنا أصحاب التكيس مانعطيهم جرعة كبيرة على طول لازم نبدأ بجرعة أقل لأن ممكن يسبب لهم افراط بالتنشيط>>نسيت كلامه بالضبط بس كأن هو قال كذا ><
وزاد لي الجرعة أخذتها لمدة يومين وارجع له بعد يومين والحمد لله ارتفع الهرمون من 25الى 450 وسوا لي سونار داخلي يشوف التبويض وشاف بويضة جهة اليمين حجمها 19 وأربع بويضات بالجهة اليسار حجمهم 15 وكتب لي منشطات لمدة يومين
وبعد يومين رحت له وسويت التحليل والحمد لله الهرمون ارتفع اكثر وصار عندي 3 بويضات ناضجة وأحجامهم 18 و 19و 20 أما البويضات الباقية كانوا 16 وقال الدكتور العملية على 3 بويضات فيها مجازفة >>لازم أقل شي 4 بويضات
وقال ماندري ممكن حجم البويضات الباقية يتضاعف الى موعد العملية بس انتوا شنو قررتوا نسويها والا ننتظر الشهر الجاي؟
أنا بدون تفكير قلت نسويها وقال خلاص توكلنا على الله
وقعنا على اوراق العملية وكتب لي ابرة تفجيرية أخذتها بالليل الساعة 10 ومن اليوم الثاني "الأحد" أصوم من 10 الليل
وعملية السحب يوم الاثنين الساعة 8 أو 8 ونص
وجا موعد العملية رحنا المستشفى الساعة 7 ونص الصبح والساعة 8 دخلوني غرفة بدلت ملابسي وجا زوجي عطونا علبة علشان ياخذون عينة من الحيوانات المنوية
والساعة 9 ونص خذوني لغرفة العمليات ركبوا لي ابرة المغذي ومنها دخلوا البنج وعلى طول بديت احس بالنوم ومااشوف زين احس اني انحولت خخخخخخ
صحيت 10:25 ورجعوني للغرفة وبعد دقايق جا الدكتور قال سحبنا 9 بويضات 3 فاضيات مايصلحون للتلقيح و 6 بنلقحهم
كتب لي علاج مثبتات ومسكنات الى يوم الترجيع
بعد 3 أيام رحنا المستشفى الساعة 10 علشان الترجيع
قالوا لي لازم اشرب ماي وتكون المثانة نص ممتلئة وبعدها ودوني لغرفة العمليات وجا الدكتور قال تلقحوا 5 بويضات من الستة اللي سحبناهم
وأجيكم أنا الذكية أقول له ليش ماتلقحت هالبويضة؟
هو حسيته جاته الضحكة خخخخخخخخخخ
قال اسألي ربنا >< يافشيلتي
قال لي الحين عندك 5 بويضات تبينهم نرجعهم للرحم كلهم والا بس نرجع 3؟
قلت له رجع 3 وجمد الثنتين الباقي قال لازم يتطورون أكثر علشان نجمدهم
رجع لي البويضات وقال لي لاتتحركين احنا نشيلك وشالوني للسرير الثاني ورجعوني الغرفة ووقف يعطيني النصايح
لازم اظل منسدحة ساعتين مااقوم وقال بننتظر اسبوعين وبعدها نسوي تحليل حمل رقمي
وقال لاتشتغلين او تجهدين نفسك ولاتطبخين خليك مرتاحة واكلي فواكه وخضار والدرج ممنوع وكل هذا تسوين به لمدة شهرين لو حصل حمل وخليك مستمرة عالادوية اللي وصفتها لك المثبتات والابر>>ابر مسيلة للدم علشان يوصل دم للجنين
وركبوا لي المغذي الابيض اللي مثل الحليب
وبعد ساعتين قمت علشان بنرجع للبيت والحمد لله وقتها كنا فرحانين وانا مو متخيلة ان في بطني كتاكيت صغار وكل اشوي المس بطني وزوجي ماسكني لاتمشين بسرعة اشوي اشوي ولاتشتغلين حسيت كأن احنا في مسلسل خليجي هههههههههههههههههههههههههههه

وجلست انتظر هالاسبوعين يخلصون على نار واستغليت وقت الانتظار بالتسبيح والعبادة وقراءة القرآن والسبحة ماكانت تنزل من يدي
وفي اليوم الرابع من الترجيع نزل مني إفراز لونه بني ولما سألنا الدكتور قال طبيعي لاتخافين وخليك مستمرة عالمثبتات
انا وزوجي بحثنا بالنت عن هالافراز البني وقرأنا أن هذا يكون وقت تعشيش البويضة بجدار الرحم ينزل هالافراز البني واحنا استبشرنا خير قلنا ان شاء الله ثبت الحمل

واليوم العاشر نزل مني نقطة دم وأنا خفت قلت شكله نزلوا مافي حمل ><
كلمت الدكتور قال وقفي الابر المسيلة للدم وزيدي المثبتات 3 مرات باليوم الى يوم التحليل>>كان باقي على يوم التحليل 3 أيام

طبعا طول هالاسبوعين كان تجيني الام نفس الام الدورة ظهري وبطني يألموني وماغير كل منسدحة مااقدر اتحرك وتعبانة وكان عندي إمساك تكرمون وصرت اكل سلطة وفواكه والدكتور قال لو تبين تاخذين ادوية للامساك قولي للصيدلي يعطيك ادوية للحوامل بس انا خفت اخذ اي شي وظليت عالخضار

وجا يوم 14 من الترجيع اللي هو موعد التحليل الرقمي bhcg
قعدت من نومي الصبح ورحت أغسل وجهي مااشوف الا تلوع كبدي واستفرغ >< قلت شكله من علاج التكيس اللي اخذه لانه يسبب غثيان واستفراغ>>ماكنت حاطة ببالي اني 100% حامل علشان ماانصدم من النتيجة لو طلعت سلبية
رحت المستشفى الساعة 9 وسويت التحليل وقالوا لنا نهاية الدوام الدكتور بيكلمك عالجوال يعلمك بالنتيجة
رجعت البيت وقت الظهر وزوجي راح للعمل وانا طول الوقت على اعصابي كل اشوي اطالع الساعة وكل ماقربت الساعة من 4 بطني يألمني كااني انتظر نتيجة المدرسة خخخخخخخخ
وبس صارت الساعة 4 صرت اتخيل كيف بيكون شعوري لمن الدكتور يقول مافي حمل بقعد اصيح الى ان انام ولو طلعت حامل كيف بيكون شعوري نفس الشي ممكن اصيح من الفرحة
والى 4 وربع اتصل الدكتور وانا اللي ارتبك وارد عليه الو
الدكتور:مدام...
انا:نعم
الدكتور بفرحة:مبرووووك انتي حامل
انا مو مصدقة:صج؟؟
الدكتور:مبروووك مبروووك حامل
انا:الله يبارك فيك الحمد لله
شكرت الدكتور وسألته عن الادوية والمثبتات قال لي استمري عليهم الى ان يثبت الحمل وسكرت الجوال وانا حدي فرحانة وطول الوقت اردد :الحمد لله
ورحت توضيت وصليت لربي ركعتين وشكرته على هاليوم
وكلمت زوجي وعلمته بالنتيجة
ويارب يرزقكم بفرحة نفس فرحتي اللي فرحتها وأكثر وان شاء الله كل وحدة تنتظر الحمل ربي يرزقها هالشهر وتجي تبشرني

[انثى تكره الظلم]

ماشاء الله ما قصرتى اختى

الله يتمملك على خير ياااااااارب

تحياااااااااتى

[ملاك الليل]

الله يتمم فرحتك على خير

[حنان معوض]

روووووعه
ما شاء الله
الف الف الف مبروووووك اختي
الله يتمم حملك علي خير
ويرزقني وكل واحدة بالمنتدي الذريه الصالحه ولا يحرمنا
توقعت قصه رائعه
وفعلا هي رائعه
وبتمني الكل استفاد منها
مشكورة اختي
يعطيك العافيه

[تمنيتك بأحلامي]

الله يبارك فيكم حبيباتي ويارب يرزقك ياحنان بالذرية الصالحة ويرزق كل وحدة تتمنى طفل
وان شاء الله ماتجي السنة الجاية الا وكل وحدة في حضنها طفلها ومشيب راسها>>اهم شي يشيب الراس خخخخخخخ

[يآ أرحم الرآحمين]

تمنيتك باحلامي .. ماشاء الله تبارك الله .. ربي يثبت أجنتك يارب مبروووك و عقبالنا يارب

[مسك أبيض]

الله يرزقك ويرزقني وكل منتظره يارب اختي حنان

[غادوشكا]

1000 1000 1000 مبروووووك تمنيتك با حلامي .. ربنا حقق مناك ويا رب يتم نعمته عليك وتولدي بالسلامة
ويعطيك يا حنان زي ما اعطاها ويعوض انتظارك فرحة كبيرة يا رحيم
وانا كمان وكل مشتاقة يااااااا رحيم