الجزائرياات عطوني رايكن ..

[هبة الرحمن]

السلام عليكم ورحمة الله وبركاته

اخواتي الجزائرييات انا اتفقت وزوجي على ان الشهر القادم نبداو في عملية التلقيح سواء كان اصطناعي اواطفال الانابيب او الحقن المجهري..لان مر على زواجنا 12 سنة ورغم اجراء زوجي عملية الدوالي منذ 4 سنوات الا ان لم يتم الحمل والصراحة ماليت و تعبت من الادوية بذون فائدة فقلنا نتوكل على الله ونجري هد التقنية لعلى الله يزقنا بتوام وهو القادر على كل شئ..
المهم اخواتي حبيت نسال عن احسن عياادة مختصة بالقطر الجزائري ..الصراحة انا اتصلت بثلاث عيادات "تيزيري..وفريال"بالعاصمة وعيادة"المولود بوهران

عيادة تيزيري اسعاار غالية والموعد حتى جوان "يعني عاد يستقبلوك"..وزوجي قال نروح لها هي احسن لان السعر المرتفع وكم المرضى الي يتوافدعليها اكيديكون من خيرتهم الجيدة ..
اما فريال وعيادة المولود فالاسعار متقاربة ومقدوور عليها ومتى تروحي يستقبلوك ويباشرو معك بالتحاليل بذون موعد سابق " يعني نربح شهر وايضاا ننقص من المصاريف لاني ساكنة بعيدة"..انا حبيت رايكن اخواتي بحكم تجاربكن فلا تبخلن علياوالله يرزقكن واياي من بابه الواسع..

[اميرة الحنان]

حبيبتي يا ريت لو طرحتي مشكلتك في التجمع بيتنا الثاني رانا غي بنات البلاد و أكيد كان الكل تفاعل معاك و لا تغضبي فقط راي حبيبتي المهم أنا نقلك ربي يسهلك ان شاء الله و ننصحك بزاف بالاستخارة و الله غي أنا الحمد الله لقيت راحتي في الاستخارة و طبعا الله يعلم ما لا نعلم و راح يدلك على الحل ان شاء الله و راني حاسة بيك راكي تعرفي كلنا مثل بعض و أنا راني نتبع في كلينيك تيزيري و رحت الشهر الي فات باش نبدا المنشطات و ربي مكتبش قالولي حتى الشهر الجاي و راني نستنى الدورة كي جي ان شاء الله نروح عندهم و ربي يسهل ان شاء الله و أنا منعرفش ظروفك طبعا برك حبيت نقلك شوفي الي ساعدك ربي هو الرزاق و الكلينيك سبب فقط وين كتبلك ربي تنجحلك و أنا والله ما هتميت وين خير جات من عند ربي و ساعدتني تاع تيزيري و ان شاء الله ربي يفرحك و يرزقك الحمل السليم عاجلا غير اجل يارب

[المياسه بوظبي]

ان شاء الله البنات يفيدووونك :)

[هادية]

حبيبتي اولا وقبل كل شيء ربي يجيب اللي فيه الخير و كما قالتلك الاخت الاولى اللي ردت الاستخاااااااااااااااااااااارة
اختي انا كنت رايحة اتيزيري و مبعد سمعت بعيادة ابن رشد شكروهالي و مزال مرحتش المهم انا درت ربي ف قلبي و ين كتبلي ربي نروح

[basouma26]

الله ييسر لك امرك و يوفقك للي فيه الخير و يفرحك بالذرية عاجلا غير آجلا يا رب

[ام بلقاسم الجزائرية]

ماعندي اي معلومة بصح حبيت ندعيلك ربي يوفقك ويفرحك انشاء الله بالحمل

[ابتسامه رغم الالم]

حبيبتي هبه الله يرزقك ويسخرلك كل الخير ويارب تبشرينا بحملك عاحلا غير اجل وبدون عمليات ولاتعب

موفقه يارب

[Nourelhouda]

انا عندي موعد في عيادة الوالدين جاية بين بئرمرادرايس و سيدي يحي شكروهالي بزاف ، الموعد 26 ماي عندي شهر من اللي اتصلت بيهم،،،، انا عندي عام و نصف رحت الفريا يا بنتي الغاشي و الخدمة ما عجبتنيش نهار الاول دخلوني عند الطبيبة استنينا قريب 7 سوايع و من بعد دخلتلها قالتي نحي حوايجك السروال باش ديرلي ايكوكرافي مهبلي و راجلي كان معايا حشمت قالتي نورمال قلتلها لا لا ما كان فراش تتغطاي بيه ما كان سيتارة والوووو المهم شلفتلي الرحم قالتلي مليح و اعطاتنا تحاليل نديروهم انا و راجلي خارج العيادة تحاليل الهرمون بصح تحليل المنوي داخل العيادة و كلما تروحي تماك على زيارة تخلصي و من بعد درنا التحاليل و جبناهم كانو نورمال الهرمونات تاعي و تاع راجلي بصح التحليل تاع السائل صفر قالك نديرولو عملية تفتيش في الخصية و اعطاونا موعد بعد 15يوم رحنا دارها راجلي و رقدوه و من بعد حطوه في غرفة طلعت ليه اعطاولو كرواسون و قهوة و قعد عشربن دقيقة و خرج دارولو تخدير موضعي و اعطاونا علبة فيها الخلايا اللي ناحاوهم الراجلي قالونا ادوهم لل لانابات تماك يحوسو على الحيوانات رحنا اديناهم مزية عندي البرمي و سقت انا راجلي كان فشلان رحنا حطيناهم قالك على عشرة ايام خلصنا قريب مليون و نص و العملية تاع الخصية خلصنا زوج ملاين و نص و غير الدوا و التحاليل و هما دارولو بحث في خصية وحدة و ما درناش تلقيح علاخاطر حتى الخصية ما فيها حيوانات منوية كاين بصح غير ناضجة و كي دينا نتيجة التحليل للعيادة تاع فريال قالنا الطبيب خلوها على ربي كي قلنالو و الخصية الثانية قالي ماكلاه خلوها على ربي و ما درنا والو،،،،،،،انا ما عجبتنيش و دراهم يدوهم بزاف و زيد الغاشي عندهم تقولي الدنيا كامل راهي ما تولدش تسمعي حكايات تاع الناس تماك كاين بزاف اللي نجحتلهم و جابو توام و جاو يعاودو و كاين اللي كيما حالتي ماكان والو غير خسارة الدراهم،،،،،،،و ربي يسهلك ان شاء الله،،،،،

[lozette]

السلام عليكم . أنا يا أختي راني من 2011 في تيزيري درت تلقيح صناعي و ما نجحش و كان ثمن العملية لوحدها 1.5 مليون . ثم في 2012 درت أطفال الأنابيب و نجحش و كان ثمن العملية لوحدها عشرة ملايين بلا التحاليل و الدواء يعني قريب 25 مليون . و راني إذا كتب ربي رايحة نعاودها في نفس المكان . واش نقولك أختي بالنسبة للدواء و التحاليل أظن أنها واحدة لا تتغير أما العملية فأنا لم أسأل في باقي العيادات و ما عليك سوى المقارنة بين ما قالوهلك و بين ما قلته لك. موفقة أختي

[هبة الرحمن]

المشاركة الأصلية كتبت بواسطة اميرة الحنان

حبيبتي يا ريت لو طرحتي مشكلتك في التجمع بيتنا الثاني رانا غي بنات البلاد و أكيد كان الكل تفاعل معاك و لا تغضبي فقط راي حبيبتي المهم أنا نقلك ربي يسهلك ان شاء الله و ننصحك بزاف بالاستخارة و الله غي أنا الحمد الله لقيت راحتي في الاستخارة و طبعا الله يعلم ما لا نعلم و راح يدلك على الحل ان شاء الله و راني حاسة بيك راكي تعرفي كلنا مثل بعض و أنا راني نتبع في كلينيك تيزيري و رحت الشهر الي فات باش نبدا المنشطات و ربي مكتبش قالولي حتى الشهر الجاي و راني نستنى الدورة كي جي ان شاء الله نروح عندهم و ربي يسهل ان شاء الله و أنا منعرفش ظروفك طبعا برك حبيت نقلك شوفي الي ساعدك ربي هو الرزاق و الكلينيك سبب فقط وين كتبلك ربي تنجحلك و أنا والله ما هتميت وين خير جات من عند ربي و ساعدتني تاع تيزيري و ان شاء الله ربي يفرحك و يرزقك الحمل السليم عاجلا غير اجل يارب

اهلا اميرة ...شكرا على الرد ..وعلاش نزعف اختي حنا هنا باش نساعدو بعض ونصحوبعض ..وانا حطيت الموضوع هنا باش يكون واضح لكل الجزائرييات الي بالمنتدى واي وحدة عندها فكرة ترد علياا ..هدا هوالقصد..وربي يسعدك ويسعدني.