افرازات ودم ومفيش حاجة باينة من السونار انا تعبت :(

[أحلام جميلة]

السلام عليكم أحبابي

انا بصراحة جاية افضفض لكم وعايزاكم تفيدوني وتقولولي الحقيقة ومتجاملونيش عشان انا بجد نفسيتي خلاص اتدمرت

انا الدورة متأخرة عندي دلوقتي بقالها 9 ايام

اخر دورة عندي كانت يوم 17 مايو (يعني المفروض انا في الاسبوع الخامس)

بعد تأخرها بخمس أيام عملت تحليل بول في البيت وطلع ايجابي، بس مكنتش مصدقة فرحت في نفس اليوم عملت تحليل دم وطلع ايجابي .. طرت من الفرحة ومكنتش مصدقة نفسي

رحت تاني يوم لدكتورة (كان يوم السبت اللي فات) وقالتلي مبروك وبتاع وكتبتلي على فوليك آسيد وعملتلي سونار بس مكنش باين حاجة وقالتلي ده طبيعي وقالتلي اني اروح لها بعد 10 ايام

وساعتها قلتلها ان بينزل ساعات دم خفيييف لونه بينك كدة قالتلي ده عادي ايام الدورة وكدة

وبعدين امبارح لقيت نقطتين كدة لونهم بني فطنشت .. وبعدين النهاردة حصلت مرتين وقريت ع النت لقيت الناس كلها بتحذر من الافراازات البني لانها بتكون بداية اجهاض واني لازم اروح لدكتورة

ففعلا قلت هروح وقبل ما انزل نزل مني شوية دم احمر .. قلت هقول للدكتورة بالمرة

ورحت لها عملتلي سونار برضه مبانش حاجة خالص في الرحم ولا خارج الرحم !!!

مع ان اللي اعرفه ان المفروض بعد 10 ايام من تأخر الدورة بيبان في السونار ودلوقتي عدى 9 فمش فارقة كتير


فهي قالتلي يا اما حصلك اجهاض والدم هينزل خلال الفترة دي

يا اما انه هيظهر الاسبوع الجاي لما اروح لها

وقالتلي مقدرش اكتبلك مثبتات لاني مش شايفة حاجة لسة وقالتلي اتجاهل الافرازات دي واكمل حبوبي عادي والراحة والحاجات دي


بجد انا خايفة ومتضايقة وخنووقة .. انا طبعا مؤمنة بقدر الله وكل حاجة يجيبها ربنا حلوة الحمد لله .. بس انا كنت منتظرة الحمل ده من زماان وفررررحت جدااا بقدومة ودلوقتي مش قادرة استوعب فكرة اني ممكن اخسره :(


ارجوكو قولولي تجاربكو ايه في الموضوع ده ؟؟ وهل حد عمل سونار قبل كدة ومظهرش معاه الا متأخر ؟؟


ياااااااااااااارب مليش غيرك :(

معلش طولت عليكم كتيير بس متنسونيش من دعواتكم .. ومن نصايحكم وتجاربكم